Къушъхьэ гъогум игъэпсын тегущыIагъэх

ЗыгъэпсэфыпIэхэу «Лэгъо-Накъэ», «Архъыз» ыкIи «Гъэхъунэ плъыжьыр» зэзыпхын къушъхьэ гъогу загъэпсыкIэ, Кавказым, хэгъэгум ыкIи IэкIыб къэралыгъохэм ащыIэ къушъхьэкъечъэхыпIэ зыгъэпсэфыпIэ хъопсагъо тиIэ хъущт.

Къэралыгъо Советым изэхэсыгъо бэмышIэу мы Iофым щытегущыIагъэх. Къушъхьэ гъогум ишIын вице-премьерэу Дмитрий Чернышенкэм къы­дыригъэштагъ. Къэрэщэе­Щэрджэсым, Шъачэ ыкIи Адыгеим ащыIэ кIымэфэ зыгъэпсэфыпIэхэр зэрэзэпэмычыжьэхэр, ау ахэр зэнэзыгъэсынхэ гъогу зэрящыкIагъэр ащ къы­Iуагъ. Ащ фэдэ гъогу загъэпсыкIэ, анахь курорт инхэу дунаим тетхэм Кав­казым щыIэ зэхэт зы­гъэпсэфыпIэри ахалъы­тэщт. Курортищым къызэ­лъаубытыщт чIыгу гектар пчъагъэмкIэ гъэнэфагъэу апэ ишъыщт.

«Францием щагъэпсыгъэ къечъэхыпIэу «Три до­лины» зыфаIорэм ар нахь ин хъущт», — къы­Iуагъ Д. Чернышенкэм. Зигугъу къышIыгъэ зыгъэ­псэфыпIэ чIыпIэр къэралыгъуабэмэ къарыкIырэ цIыфхэм агу рехьы, ягуапэу къэкIох. Ар Францием, Швейцарием ыкIи Италием ягъунапкъэхэм апэ­благъ, курорт пчъагъэ хэхьэ, ахэм ащыщэу Урысыем икIырэ зекIохэм нахьыбэу къыхахырэр зыгъэпсэфыпIэу Куршавель ары.

Кавказ къушъхьэхэм апхырыкIыщт гъогум ишIын къин зэрэхъущтыр Урысыем и Президентэу Вла­димир Путиным къыIуагъ. «АпэрэмкIэ, «Лэгъо-На­къэ» IофшIэнхэр джыри щырагъэжьагъэхэп, «Ар­хъыз» ахэр щэкIох, — къы­Iуагъ ащ. — Сыд фэдэу щытми, къушъхьэ автомобиль гъогоу зыгъэ­псэфыпIэхэр зэзыпхыщтхэм ишIын епхыгъэу УФ-м хэгъэгу кIоцI IофхэмкIэ и Министерствэрэ хэ­гъэгур къэухъумэгъэнымкIэ федеральнэ къулы­къумрэ апэ зэзэгъыныгъэ адэшIыгъэн фае».

ЯтIонэрэу ащ ынаIэ зытыридзагъэр зэзэгъыныгъэхэр зэдашIыхэмэ, цIыфхэр илъэс псаум къыздэкIонхэ алъэкIыщт зыгъэпсэфыпIэхэм яшIын зэрэрагъэжьэщтыр ары.

Кавказ биосфернэ заповедникым икъушъхьэхэу зыгъэпсэфыпIэхэу «Ар­­хъыз», «Лэгъо-Накъэ» ыкIи «Гъэхъунэ плъы­жьыр» зыгощыхэрэм ялъэ­гагъэ метрэ минрэ ны­къорэм къыщегъэжьагъэу минищым нэсы.

Къалэу Шъачэ иадминистрацие ипащэу Алексей Копайгородскэм тызхэт илъэсым ибэдзэогъу мазэ къыIогъагъ 2025-рэ илъэсым ыкIэ нэс къушъхьэ къечъэхыпIэ зыгъэпсэфыпIэу «Роза Хутор» зыфиIорэр, «Гъэхъунэ плъы­жьыр» ыкIи «Альпикэр» зэхагъэхьажьынхэу. Курортышхохэм язэхэщэн тапэкIи яшъыпкъэу дэлэжьэщтых.

Шъаукъо Аслъангуащ.