Европэм самбэмкIэ изэнэкъокъу Сербием икъалэу Новый Сад Iоныгъом и 15 — 18-м щыкIуагъ.
Илъэс 18 — 21-рэ зыныбжь кIалэхэр, пшъашъэхэр зэIукIэгъухэм ахэлэжьагъэх.
Урысые Федерацием ихэшыпыкIыгъэ командэ хэтэу Екатерина Соловьевар килограмм 78-м нахьыбэ къэзыщэчыхэрэм якуп щыбэнагъ.
Лъэустэнхьаблэ щыщ Е. Соловьевар пэшIоры-гъэшъ зэIукIэгъухэм ауж апэрэ чIыпIэм фэбэнагъ. Армением къикIыгъэ бэнакIор нахь лъэшэу зэнэкъокъум къыщылъэгъуагъ, дышъэр фагъэшъошагъ.
Екатерина Соловьевам ятIонэрэ чIыпIэр Европэм къыщыдихыгъ. Тренерэу Нэныжъ Байзэт ипащэу самбэ бэнакIэм зыфегъасэ.
Адыгэ къэралыгъо университетым физкультурэмрэ дзюдомрэкIэ и Институт Е. Соловьевар щеджэ. Дунаим иныбжьыкIэхэу илъэс 16 — 18 зыныбжьхэм язэIукIэгъухэу мыгъэ Армением щыкIощтхэм ахэлэжьэнэу фитыныгъэ иIэ хъугъэ.
— Тиспортсменхэм, тренерхэм Европэм гъэхъагъэу щашIыгъэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фагъэхьы, — къытиIуагъ АР-м самбэмкIэ иеджапIэ ипащэу, спортымкIэ дунэе класс зиIэ мастерэу Делэкъо Адам. — Самбэм республикэм зыщиушъомбгъуным, спорт псэуалъэхэр нахьышIу шIыгъэнхэм афэшI ти ЛIышъхьэу КъумпIыл Мурат, Правительствэм лъэхъаным диштэу Iофыгъуабэ зэрагъэцакIэрэмкIэ лъэшэу тафэраз. НыбжьыкIэхэм
пIуныгъэ дэгъу ятыгъэным, ямедальхэм ахагъэхъоным тишъыпкъэу тыпылъ.