АР-м и ЛIышъхьэу КъумпIыл Мурат къызэриIуагъэмкIэ, псэупIэхэм Iэрыфэгъу щыIакIэр ащыгъэпсыгъэным фытегъэпсыхьэгъэ IофшIэныр шъолъырым щылъагъэкIуатэ.
— Тэ пшъэрылъ шъхьаIэу тиIэр республикэм щыпсэухэрэм ыкIи хьакIэу къакIохэрэм Адыгеир ашIогупсэфэу гъэпсыгъэныр ары. А IофшIэным епхыгъэу Мыекъуапэ итеплъэ нахь дахэ зэрэтшIыщтым тыпылъ, зекIон лъэныкъори ащ къыдыхэлъытагъ, — къыIуагъ республикэм ипащэ.
Джырэ уахътэм Шварц ыцIэ зыхьырэ аллеем изэтегъэпсыхьан республикэм икъэлэ шъхьаIэ щэкIо. ТIысыпIэхэр кIэу ашIыгъэх, къэзыгъэнэфырэ пкъыгъохэр агъэуцугъэх.
Адыгеим и ЛIышъхьэ къызэрэхигъэщыгъэмкIэ, мы аллеер къэлэдэсхэмкIэ кIуапIэу зэрэщытым имызакъоу, Шварц Мыекъуапэ зыщыпсэугъэ лъэхъаным епхыгъэ зекIо маршрут 15-м язэу щыт. ШIэжь мэхьанэ зиIэхэр зэкIэ QR-код зыхэт къэбарлъыгъэIэс таблицэхэмкIэ зэтегъэпсыхьагъэх. Ащ ишIуагъэкIэ нэбгырэ пэпчъ ежь зэрэфаеу зекIо кIон ылъэкIыщт, ар бэхэм ашIогъэшIэгъоныщт.
МыекъуапэкIэ зекIо гъогухэр зыгъэпсыгъэхэр волонтер проектхэу «Шварц и Ун» ыкIи «Мые- къуап — уикъалэ шIу плъэгъуныр ыкIи пшIэ-ныр» зыфиIохэрэм яактивистхэр ары. АщкIэ IэпыIэгъу къафэхъугъ президент грантхэр.
— Мыщ фэдэ гукъэкI гъэшIэгъонхэм сыдигъуи адетэгъаштэ, щыIэныгъэм ахэр щыпхырыщыгъэнхэм тынаIэ тет. Ахэм якIэщакIохэм тапэкIи IэпыIэгъу тафэхъущт, — къыIуагъ Адыгеим и ЛIышъхьэ.