ТекIоныгъэр къыдахыгъ

Адыгэ къэралыгъо университетым ишIэныгъэлэжьхэм шъолъыр поли­ти­кэм иушэтынкIэ грант къахьыгъ.

Проектэу «Региональная по­литика идентичности в усло­виях современных геополитических и социокультурных вызовов» зыфиIоу агъэхьазырыгъэм текIоныгъэр къыдихыгъ. Социальнэ ушэтынхэмкIэ ин­ститутыр, УФ-м гъэсэныгъэмрэ шIэныгъэмрэкIэ и Министерствэрэ ыкIи шIэныгъэмкIэ Урысые академиер арых Iофтхьа­бзэм кIэщакIо фэхъугъэхэр.

Ушэтынхэм язэхэщэн пэIуагъэхьанэу сомэ миллиони 3 къафатIупщыгъ, 2022-рэ илъэсым ыкIэ нэс проектыр щыIэныгъэм щыпхыращыщт. Купым ипащэр философие шIэныгъэ­хэмкIэ докторэу, профессорэу Лаушэ Светлан.

ЗэкIэмкIи зэнэкъокъум проект 850-рэ къырахьылIэгъагъ, ахэм ащыщэу 74-р ары къыхахыгъэр. Адыгэ къэралыгъо университетым инаучнэ куп хэтыгъэх философиемкIэ ыкIи социологиемкIэ кафедрэм, этно­культурэмкIэ ыкIи социологическэ, диагностикэмкIэ лабора­торием яаспирантхэр, шIэныгъэлэжьхэр.

Общественнэ-политическэ шIэныгъэм епхыгъэ проектхэм афэгъэхьыгъэ зэнэкъокъум Адыгэ къэралыгъо университетыр щэгъогогъо текIоныгъэ къыщыдихыгъ. 2020-рэ илъэсым сомэ миллион грантэу къыфагъэшъошэгъагъ. 2021-м сомэ миллион 1,7-рэ къыратыгъ.

Адыгэ къэралыгъо университетым ипресс-къулыкъу