ИIофшIагъэ гъунэнчъ

Филологие шIэныгъэхэмкIэ докторэу, АМАН-м иакаде­микэу, нартоведэу ХьэдэгъэлIэ Аскэр къызыхъугъэр мыгъэ Iоныгъом и 20-м илъэси 100 зэрэхъурэм фэгъэхьыгъэ Дунэе шIэныгъэ симпозиумэу «Нартоведение в XXI веке:


историография, парадигмы, поиски и решения» зыфи-Iорэр зэхащэ. Iофтхьабзэм икIэщакIох АР-м гъэсэныгъэмрэ шIэныгъэмрэкIэ и Министерствэрэ гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэмрэ.

Iофтхьабзэм хэлэжьэнэу агъэнафэ Адыгэ Респуб­ликэм и ЛIышъхьэу КъумпIыл Мурат.

Iоныгъом и 15-м, сыхьатыр 10-м симпозиумым иIофшIэн АР-м и Къэралыгъо филармоние щырагъэжьэщт.

Зэхэсыгъор къызэIуихыщт филологие шIэны­гъэхэмкIэ докторэу, профессорэу, гуманитар ушэтынхэмкIэ Адыгэ респуб­ликэ институтым иди­рек­торэу ЛIыIужъу Адам. Iоф­тхьабзэм хэлэжьэщтых Дагъыстан, Абхъазым, Къэрэщэе-Щэрджэсым, Краснодар, нэмыкI шъо­лъырхэм къарыкIыгъэ хьа­кIэхэр ыкIи шIэныгъэлэжьхэр.

Мафэм сыхьатыр 2-м къыщегъэжьагъэу 5-м нэс Адыгэ къэралыгъо университетым инаучнэ тхылъеджапIэ секциехэм яIоф­шIэн щылъагъэкIотэщт. Сыхьатыр 19-м симпозиу­мым хэлэжьэгъэ хьа­кIэ­хэм апае ансамблэу «Ислъамыем» АР-м и Къэ­ра­лыгъо филармоние концерт къыщитыщт.

Iоныгъом и 16-м шIэныгъэлэжьэу ХьэдэгъэлIэ Аскэр къызыщыхъугъэ къуаджэу Хьатикъуае хьа­кIэхэр еблэгъэщтых, ащ Iэнэ хъурае щызэхащэщт.

Шъугу къэдгъэкIыжьын, шIэныгъэлэжьым Адыгэ лъэпкъ культурэм, наукэм иIахьышIу ахишIыхьагъ, щытхъушхуи къылэжьыгъ. Аскэр Урысые Федера­цием культурэмкIэ изаслуженнэ IофышI, рес­публикэм шIэныгъэхэмкIэ изаслуженнэ IофышIэшху, Адыгэ Республикэм инароднэ поэт, «Адыгеим и Щытхъузехь» зыфиIорэ ме­далыр къыфагъэшъо­шагъ, Адыгэ Республикэм и Къэралыгъо премие илауреат, Дунэе Адыгэ академием иакадемик, къалэу Шъачэ, поселкэу ПсышIуапэ, къызыщыхъугъэ Хьатикъуае, районым, къуаджэхэу Нэшъукъуае, Щынджые яцIыф гъэ­шIуагъ. Европэм икавказоведхэм яобществэ хэтыгъ. Институтым IорIуа­тэмкIэ иотдел шIэныгъэлэжьым ыцIэкIэ 2017-рэ илъэсым Дунэе симпозиум зэхищэгъагъ, непэ къызнэсыгъэми игугъу дахэкIэ ашIы.

КIАРЭ Фатим.