Апэнэс Астемир искусствэм щызэлъашIэ. Хэгъэгу ыкIи дунэе зэнэкъокъухэм щытхъуцIэхэр къащыдихыгъ.
Астемир Адыгэ Республикэм, Къэбэртэе-Бэлъкъарым, Къэрэщэе-Щэрджэсым язаслуженнэ артист, дунэе ыкIи хэгъэгу зэнэкъокъухэм щытхъуцIэхэр къащыдихыгъ.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэу адыгэ къуаем ия ХI-рэ фестивалэу Мыекъопэ районым щыкIуагъэм Апэнэс Астемир зэрэхэлэжьагъэм тигъэгушIуагъ.
Культурэм ехьылIэгъэ Iофтхьабзэр А. Апэнэсым къызэIуихи, иорэдхэмкIэ искусствэр зышIогъэшIэгъонхэм алъыIэсыгъ. Орэдым тамэу ритырэм зыригъэушъомбгъузэ, Адыгеим ичIыопс идэхагъэ нэгум къыкIегъэуцо. Дахъо игъэхъунэ щызэхащэгъэ фестиваль-зэнэкъокъум ухэлэжьэныр хъопсагъоу щытыгъ.
Тамэм зырегъэIэты
Жьыр щыкъабз, къушъхьэтх лъагэхэм тыгъэм инэбзыйхэр ащызэпэшIэтых. АдыгабзэкIэ, урысыбзэкIэ, нэмыкI бзэхэмкIэ Астемир къыIорэ орэдхэм уядэIузэ, адыгэ чIыгум идэхагъэ икIэрыкIэу нэгум къыкIэуцо. Артистым ошъогу къаргъом, Кавказ икъушъхьэ жэкIэфхэм зафищэизэ, гукIэ уегъэлъыхъо. «Адыгеир сыдэу даха! Икъушъхьэхэр, ипсыхъо чъэрхэр, илэжьыгъэшIапIэхэр сыдэу хъопсагъоха!» зыфэпIощт гупшысэхэр шъхьэм къырегъахьэх.
Анахьэу етIани тызэгупшысэрэр цIыфхэм ящыIакI. Лъэпкъыбэ зыщыпсэурэ Адыгеим тхакIохэр, композиторхэр фэусэх. Щытхъоу фаIорэр орэдхэм ащызэхэтэхых.
ШIулъэгъу къабзэм, партизанхэм, мыгощыгъэ шIулъэгъум, нэмыкIхэм афэгъэхьыгъэ орэдхэр А. Апэнэсым гур зыфищэу къыIуагъэх. Жэнэ Къырымызэрэ Сэмэгу Гощнагъорэ зэдаусыгъэу дунаим щашIэрэ орэдэу «Адыгэмэ яхабзэ джащ фэд» зыфиIорэр Апэнэс Астемир къызыхедзэм, нэбгырэ шъэ пчъагъэу къедэIухэрэм ащыщыбэ къыдежъыугъ.
А. Апэнэсыр фестивалым хэлажьэхэрэм нахьышIоу алъыIэсыным фэшI сценэшхом къытекIызэ цIыфхэм къахахьэщтыгъ. Орэдыр къыIозэ къашъощтыгъ, уджыщтыгъ.
Мыекъопэ къэралыгъо технологическэ университетым щеджэрэ Нэхэе Дианэ волонтерхэм якуп хэтэу адыгэ къуаем ифестиваль хэлажьэзэ А. Апэнэсым иконцерт едэIущтыгъ. Астемир орэдыр къыIозэ пшъашъэр къыдэшъонэу пчэгум къыригъэблэгъагъ. НэбгыритIуми лъэпкъ къашъор дахэу къызэдашIыгъ, нэбгырабэ Iэгу афытеуагъ.
— Адыгэ къашъохэр лъэшэу сыгу рехьых, — къытиIуагъ пкъыр ищыгъэу, дахэу лъэпкъ къашъор къэзышIыгъэ Нэхэе Дианэ. — Апэнэс Астемир артист цIэрыIу, тигъэгушIуагъ…
ЗэдэгущыIэгъухэр
Концертыр А. Апэнэсым къызеухым, нэбгырабэ гущыIэгъу къыфэхъугъ, зэгоуцохэзэ нэпэеплъ сурэтхэр атырахыгъэх. Адыгэ Республикэм лъэпкъ культурэмкIэ и Гупчэ ипащэу Бадый Къэплъан, Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэ иIэнатIэ зыгъэцэкIэрэ Хьакъуй Аслъан адыгэ къуаем ифестиваль- зэнэкъокъу изэхэщэкIо куп хэтых, пшъэрылъэу агъэцакIэрэр макIэп. Арэу щытми, артист цIэрыIом гущыIэ фабэхэр раIонхэу, нэпэеплъ сурэтхэр атырахынхэу игъо ифагъэх. Адыгэ Республикэм, Къэбэртэе-Бэлъкъарым, Къэрэщэе-Щэрджэсым язаслуженнэ артистэу, орэдусэу Лъачэ Альберт концертым зыфигъэхьазырзэ уахътэ къыхигъэкIи, Апэнэс Астемир гущыIэгъу фэхъугъ.
Ансамблэу «Мыекъуапэ инэфылъэхэр» Астемир иныбджэгъушIу. Художественнэ пащэу, Урысыем культурэмкIэ изаслуженнэ IофышIэу, Къэбэртэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр къытиIуагъ Апэнэс Астемир ансамблэм иконцертхэм зэрахэлажьэрэр, къэшъуа-кIохэм щысэшIу зэрафэхъурэр.
Журналистэу Ахэджэго Рузанэ концертыр зэрищагъ. ОрэдыIо цIэрыIом итворчествэ нахь пэблагъэ хъугъэу елъытэ.
— Адыгэ къуаем ифестиваль сшIогъэшIэгъон, лъэпкъыбэ зэфищагъ, нэбгырабэмэ саIукIагъ. ЗэхэщакIохэм тафэраз, — къытиIуагъ Апэнэс Астемир.
А. Апэнэсым концертитIу мыгъэ Адыгэ Республикэм и Къэралыгъо филармоние къыщитыгъ. Республикэм зэпхыныгъэу дыриIэр щыIэныгъэм щегъэпытэ. ШIэныгъэр тыдэ щыIэми лъыкIозэ, искусствэм нахь цIэрыIо щэхъу, Адыгэ Республикэм, Къэбэртэе-Бэлъкъарым, Къэрэщэе-Щэрджэсым язаслуженнэ артист, дунэе ыкIи хэгъэгу зэнэкъокъухэм щытхъуцIэхэр къащыдихыгъ. Орэдыр тамэ зыфэхъугъэ артистым цIыфхэм гушIуагъоу къафихьырэр лъэхъаным щытэлъэгъу.
ЕмтIылъ Нурбый.