Пчъагъэр зэфэдиз

«Спартак» Налщык — «Зэкъошныгъ» Мыекъуапэ — 1:1 (1:1).
ШышъхьэIум и 27-м Налщык щызэдешIагъэх.

«Зэкъошныгъ»: Хьачыр, Гусенгаджиев, Лысенко (Хьасанэкъу, 74), Датхъужъ, Крылов, Макоев, Васильев (Байрамян, 74), Орзей, Пекъу (Телепов, 63), Малкандуев (Къонэ, 63), ХъуакIо.
Къэлапчъэм Iэгуаор дэзыдза­гъэхэр: Хъут, 12 — «Спартак», Васильев, 33 — «Зэкъошныгъ».

Зэкъош республикэхэм яфутбол командэхэр гъэшIэгъонэу зэдешIагъэх. ТекIоныгъэр зыхьыщтыр язэрэмыгъашIэу зэнэкъокъугъэх. Къэралыгъо гъэпсыкIэ иIэу Къэ­бэртэе-Бэлъкъарыр зыпсэурэр илъэси 100 зэрэхъурэм фэгъэхьыгъэ мэфэкI зэхахьэхэр а мафэм Налщык щыкIуагъэх. Адыгэ Рес­публикэм иансамблэ цIэрыIохэу «Налмэсыр», «Ислъамыер» Къэ­бэртэе-Бэлъкъарым имэфэкI зэхахьэхэм ахэлэжьагъэх. Концертым къыщышъуагъэх, орэд къыщаIуагъ.

«Зэкъошныгъэр» мэфэкIым футбол ешIагъ. Тикомандэ итренер шъхьаIэу ШакIо Ащэмэз изэфэхьысыжьхэм къащыхигъэщыгъ командэхэр гуетыныгъэ ахэлъэу зэнэкъокъум зэрэхэлэжьагъэхэр.

Я 12-рэ такъикъым «Спартак» иешIакIоу Дэхъум угловоир къызетым, метри 6 фэдизкIэ Хъутыр къэлапчъэм пэчыжьэу шъхьэкIэ дауи, хъагъэм Iэгуаор ридзагъ — 1:0.

Я 33-рэ такъикъым «Зэкъошныгъэм» иешIакIоу Макоевым тазырыр дэгъоу ыгъэцэкIагъ. Метрэ 30 фэдизкIэ къэлапчъэм пэчыжьэу Iэгуаор къызетым, Васильевыр метрэ 14 фэдизкIэ зыпэчыжьэ къэлапчъэм шъхьэкIэ дэуагъ. «Спартак» икъэлэпчъэ­Iутэу Мицаевым Iэгуаом зылъи­дзыгъ, ау къыубытын е къызэкIидзэжьын ылъэкIыгъэп. Хъагъэм Iэгуаор щычэрэгъугъ — 1:1.
Пчъагъэм зэхъокIыныгъэ фашIы ашIоигъоу командэхэм зэнэкъо­къур лъагъэкIотагъ, ау ямурадхэр къадэхъугъэхэп. «Зэкъошныгъэм» икъэлэпчъэIутэу Т. Хьачырым IэпэIэсэныгъэ дэгъу къыгъэлъэгъуагъ, заулэрэ Iэгуаор къызэкIидзэжьыгъ. Пчъагъэр зэфэдэу зэIукIэгъур аухыгъ – 1:1.

Урысыем футболымкIэ щыкIорэ зэнэкъокъум ия 2-рэ куп хэлэжьэрэ командэхэр зэрешIагъэ­хэр зэтэгъапшэх.

Я 6-рэ зэIукIэгъухэр

«Ессентуки» — «Черноморец» — 1:2, «Биолог» — «Кубань-Холдинг» — 2:1, «Форте» — «Ле­гион» — 1:0, «Мэщыкъу» — СКА – 0:0, «Ротор» — «Алания-2» — 0:1, «Чайка» — «Динамо» Ст – 2:0.
Ауж къинэщтыгъэ командэу «Алания-2-р» апэ ишъыгъэ «Ротор» Волгоград зэрэтекIуагъэр тэгъэшIагъо. Футболыр хырыхыхьэм зэрэфэдэр ащ къегъэ­шъыпкъэжьы.

Хэт тыдэ щыIа?

1. «Чайка» — 15
2. «Ротор» — 15
3. «Биолог» — 13
4. «Форте» — 10
5. «Черноморец» — 10
6. «Кубань-Х.» — 9
7. СКА — 9
8. «Спартак» — 8
9. «Динамо» Ст – 6
10. «Зэкъошныгъ» — 5
11. «Легион» — 4
12. «Алания-2» — 4
13. «Ессентуки» — 3
14. «Мэщыкъу» — 3.
Я 7-рэ ешIэгъухэр
3.09
«Зэкъошныгъ» — «Ротор»
«Легиог» — «Спартак»
«Кубань-Х» — «Мэщыкъу»
«Алания-2» — «Биолог»
«Динамо» — «Ессентуки»
«Черноморец» — «Форте».
4.09
СКА – «Чайка».
Урысыем и Кубок
Финалым и 1/128-м командэхэр щызэIукIэщтых.
31.08
«Черноморец» — «Зэкъош­ныгъ».