Спортым хэхъоныгъэ ышIыным фэшI

Армян къушъхьэтхым дэжь лъыхъон экспедицие щызэ­хащагъ. АСТиРМУП-мрэ об­щест­вэу «Боевое братство» зы­фаIорэм и Адыгэ шъолъыр отделениерэ Iофтхьабзэм кIэ­­щакIо фэхъугъэх.

Купым ипэщагъэх академи­кэу, «Боевое братство» зыфи­Iорэм хэтэу Г. Азэщыкъымрэ академием ичлен-коррес­пондентэу И. Бормотовымрэ. Мые­къуапэ дэт лицееу 19-м июнармейцэхэр ахэтыгъэх. Ныб­жьыкIэ сэнаущхэм яшъолъыр зэIукIэу «Фыщт-2022» зыфиIоу АР-м и ЛIышъхьэу КъумпIыл Мурат кIэщакIо зыфэхъугъэм ар рап­хыгъ.

Адыгеим ар яплIэнэрэу щы­зэ­хащэ. Коронавирусым ыпкъ къикIыкIэ мы аужырэ илъэситIум зэпа­гъэугъагъ. Хабзэ зэрэхъугъэу, зэ­IукIэм хэлэжьэщтхэм километри 10 хъурэ гъогууанэр зэпачи, къэуцупIэу «Фыщт» дэжь къыщызэрэугъоигъэх. Апэрэ пчыхьэм республикэм имуниципалитетхэм къарыкIыгъэ купхэм зыкъагъэлъэгъуагъ, концерт цIыкIу къатыгъ.

Мы илъэсым Iофтхьабзэхэр плIэу зэтеутыгъагъ: культурнэ, спортивнэ, зекIо ыкIи экологие лъэныкъохэмкIэ. Тематическэ площадкэм къэгъэлъэгъон зэфэшъхьаф­хэр щы­кIуагъэх, республикэм ит апшъэрэ еджапIэхэм ыкIи муни­ципалитетхэм къагъэхьазырыгъэ пре­зента­циехэр, спорт зэнэкъо­къухэр, экспедициехэр, экологие ыкIи просветительскэ Iофтхьабзэхэр зэхащагъэх.

Адыгеим спортым хэхъоныгъэ ышIыным мэхьэнэ ин щыра­ты. Республикэм щыпсэухэрэр спортым пыщагъэ хъунхэм пае ищыкIагъэр агъэцакIэ. ДжырэкIэ республикэм спорт псэолъэ 982-рэ ит, ащ щыщэу 590-р къоджэ псэупIэхэм адэт.

(Тикорр.).