Баджэр, тыгъужъыр…

Адыгэ Республикэм и Къэралыгъо филармоние инысхъэпэ театрэу «Дышъэ къошыным» икъэгъэлъэгъон Мыекъопэ районым ит зыгъэпсэфыпIэу «Лань» зыфиIорэм щызэхащагъ.

Херсон хэкум и Геническэ район икIэлэцIыкIухэм апае В. Орловым ытхыгъэм техыгъэ къэгъэлъэгъонэу тыгъужъым ищыIэкIагъэм ехьылIагъэр гъэшIэгъонэу кIуагъэ.

Хъоршэрыгъэ зезыхьэрэ ба­джэм тыгъужъыр ыгъапцIи, лIы­­жъымрэ ныомрэ ядышъэ кIэнкIэ къыригъэтыгъунэу фе­жьагъ. Мафэ къэс кIэнкIэ къа­фихьынэу мэгугъэх. Ау кIэнкIэр закъутэм, атакъэр къырахыгъ. Баджэм къэбарыр зызэхехым, атакъэр ышхынэу унашъо ышIыгъ.

Зыфэдэ мыхъурэ щыIэп. Тыгъужъымрэ атакъэмрэ гъусэ зэфэхъухи, къымыгъэзэжьынэу баджэр щагум дафыгъ.

Къэгъэлъэгъоным рольхэр къыщашIыгъэх Адыгэ Респуб­ликэм изаслуженнэ артисткэу Къапэ Саидэ, театрэм иартистхэу Виктория Токаренкэмрэ Аванес Татосянрэ. Режиссерыр Нэгъой Асыет, сурэтышIыр Павел Гурин. Еплъыгъэхэм къэгъэ­лъэгъоныр агу рихьыгъ. Тыгъу­жъым изекIуакIэ нахь ашIогъэ­шIэгъоныгъ.
Геническэ районым икIэлэцIыкIухэр артистхэм бэрэ Iэгу афытеуагъэх.

— ШышъхьэIум и 28-м илъэсыкIэ IофшIэгъур театрэу «Дышъэ къошыным» къызэIуихышт, — къытиIуагъ художественнэ пащэу, Адыгэ Респуб­ликэм инароднэ артистэу Сихъу Станислав. — Тыгъужъым ищы­IэкIагъэм ехьылIэгъэ къэ­шIы­ныр къэдгъэлъэ­гъощт. Шъукъеблагъэх театрэм.