Урысыем культурэмкIэ и Министерствэ хэгъэгу зэнэкъокъоу «Урысыем исэнаущ ныбжьыкIэхэр» зыфиIорэм икIэуххэр зэфихьысыжьыгъэх.
Москва икъэралыгъо консерваториеу П.И. Чайковскэм ыцIэ зыхьырэм и Академическэ музыкальнэ училищрэ Урысыем культурэмкIэ и Министерствэрэ илъэс къэс зэнэкъокъур зэхащэ.
Хэгъэгум ишъолъырхэм язэIукIэгъухэм текIоныгъэр къащыдэзыхыгъэхэм ащыщэу нэбгыри 7 финалым хэхьагъ.
Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм иеджэкIуитIумэ хагъэунэфыкIырэ чIыпIэхэр къафагъэшъошагъэх.
«Оркестрэм ибзэпс Iэмэ-псымэхэр» зыфиIорэ зэнэкъокъум Алена Гуляевар хэлэжьагъ. ВиолончелымкIэ произведениехэр къырегъаIох, Лариса Ромашкинар икIэлэегъадж.
ШыкIэпщынэмкIэ орэдышъор зыгъэжъынчырэ Хьаджымэ Самирэ икIэлэегъаджэр ГъукIэ Замудин.
— Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм ипащэу Анзэрэкъо Марзет, гъэхъагъэ зышIыгъэ еджакIохэм, кIэлэегъаджэхэм тафэгушIо, —къыIуагъ Адыгэ Республикэм культурэмкIэ иминистрэ иапэрэ гуадзэу Ольга Гавшинам. — Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэр IофшIэгъэ дэгъухэмкIэ хэтэгъэунэфыкIы.
ИскусствэхэмкIэ еджакIохэм яIэпэIэсэныгъэ хагъэхъонэу, нахьыбэрэ тагъэгушIонэу афэтэIо.
Сурэтхэм арытхэр: Алена Гуляевар ыкIи Хьаджымэ Самир.