Къиным, лъыгъэчъэ заом къахэкIыжьыхи ятарихъ чIыгу къэзыгъэзэжьыгъэ тилъэпкъэгъухэм янахьыбэр Мэфэхьаблэ щэпсэу.
— Унэгъо 67-рэ Мэфэхьаблэ дэс, — къытиIуагъ къуаджэм иадминистраторэу Хьасани Мыхьамэт. — Хэкум къэзыгъэзэжьыгъэм и Мафэ фэгъэхьыгъэ мэфэкI зэхахьэхэм къащытфэгушIуагъэхэм лъэшэу тафэраз, «тхьашъуегъэпсэу» ятэIожьы. Тикъуаджэ тапэкIи хэхъоныгъэхэр фэхъущтых.
— Косово, Тыркуем, Сирием, фэшъхьафхэм къарыкIыжьыгъэ тилъэпкъэгъухэр республикэм щыщ хъугъэх, тищыIакIэ псынкIэу хэгъозагъэх, — къеIуатэ республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан. — Тарихъым, культурэм, спортым афэгъэхьыгъэ зэхахьэхэр зэхэтщэщтых.
Зэшъхьэгъусэхэ Цэй Имэррэ Цэй Бэлэрэ якIалэхэу Ибрахьимэрэ Мадинэрэ мэфэкI зэхахьэм щалъэгъугъэр ашIогъэшIэгъон, къуаджэм зыкIожьхэкIэ яныбджэгъухэм къафаIотэжьыщтыр макIэп.
— Цэй Иснэт джыри сабый, тиунэкъощхэм якIэлэцIыкIу сэры зыIыгъыр, — къытиIуагъ 1998-рэ илъэсым Косово къикIыжьыгъэ купым хэтыгъэ Цэй Адам. — Тинепэрэ мэфэкI зыфэдэр къыгурымыIорэми, мэгушIо, Iэгу къытфытео…
Цэй Индар ыкIи Цэй Емал яIахьылхэм ягъусэх. Сурэтыр атетхы зэхъум кIэлэцIыкIухэм гумэкIыгъо зэрямыIэр къахэщыгъ. Янэ-ятэхэр къашъхьащытых. Ошъогур къаргъо, бомбэхэр апашъхьэ къыщыохэрэп. Мамырэу зэрэщыIэхэм Цэй Имэр рэгушхо. АдыгабзэкIэ мэфэкI зэхахьэр зэрэкIуагъэм, артистхэм адыгэ орэдхэр къызэраIуагъэхэм, лъэпкъ къашъохэр къызэрашIыгъэхэм Цэй зэунэкъощхэр ыгъэгушIуагъэх.
Цэйхэр Мыекъуапэ къэкIох, яIахьылхэм, янэIуасэхэм аIокIэх, лIэужхэм язэпхыныгъэхэр мамыр щыIакIэм щагъэпытэ.