2021 — 2022-рэ илъэсхэм «Билет в будущее» зыфиIорэ проектым Урысыем икIэлэеджэкIо мин 600 фэдиз хэлэжьагъ.
Гъэсэныгъэм иорганизациехэр, гъэсэныгъэ тедзэ языгъэгъотырэ кIэлэегъаджэхэр, апшъэрэ ыкIи гурыт сэнэхьат зыщарагъэгъотырэ еджапIэхэр, Урысыем ит компание инхэр, проектым игъэцэкIэн хэлажьэх.
Шъугу къэдгъэкIыжьын, 2021-рэ илъэсым иIоныгъо мазэ къыщегъэжьагъэу «Билет в будущее» зыфиIорэм иэлектроннэ онлайн-платформэр bvbinfo.ru зыфиIорэр ары. Гуманитар ПроектхэмкIэ Фондыр ары проектым иоператорыр.
Егъэджэныр сэнэхьатэу къыхэпхыщтым зэреппхыщтыр джы ашIэ станицэу Джаджэм дэт гурыт еджапIэхэу NN 9-рэ 10-рэ яя 9-рэ классхэм ащеджэрэ кIэлэеджакIохэм. Ветеринарием фэгъэхьыгъэ егъэджэнхэр ахэм акIугъэх, Дондуковскэ мэкъумэщ техникумым щыIагъэх. Мыекъопэ къэралыгъо технологическэ университетым Мыекъуапэ щеджэрэ кIэлэцIыкIухэр екIолIагъэх ыкIи «Былымахъу» зыфиIорэ лъэныкъомкIэ яшIэныгъэхэм ахагъэхъуагъ.
Псэушъхьэхэм яIэзэгъэным зищыIэныгъэ гъогу езыпхы зышIоигъохэм а IофшIэныр зыфэдэр нахь игъэкIотыгъэу зэрагъэшIагъ.
Егъэджэнхэр Н. Д. Нэгъоимрэ Г. В. Ващенкэмрэ гъэшIэгъонэу кIэлэцIыкIухэм афызэхащагъэх. Сэнэхьат зэфэшъхьафхэр зыфэдэхэр нэрылъэгъу къафашIыгъ.
Я 9-рэ классым щеджэрэ Виталий Соловьевыр ветеринар врач хъунэу зэрэфаер къеIо. Мэкъумэщ техникумым чIэхьан мурад ащ иI, ыгукIэ зыфэщэгъэ псэушъхьэхэм ищыIэныгъэ гъогу арипхыщт.
Iоныгъо мазэм кIэлэеджакIохэм джыри егъэджэн зэфэшъхьафхэр афызэхащэщтых.
ДЕЛЭКЪО Анет.