Сабый 240-рэ зычIэфэщт кIэлэцIыкIу IыгъыпIэ станицэу Джаджэм щашIыгъ. ДжырэкIэ тхылъхэм ягъэпсын ыуж итых, «Чебурашкэм» ипчъэхэр шIэхэу къызэIуихыщтых.
«Къоджэ псэупIэхэм хэхъоныгъэ ашIыныр» зыфиIорэ программэм ишIуагъэкIэ гъэрекIо учреждением ишIын аублэгъагъ. Сомэ миллион 221-рэ ащ пэIуагъэхьагъ. IофшIэнхэр зэрэзэхащэрэм АР-м и ЛIышъхьэу КъумпIыл Мурат гъунэ лъифыгъ. Охътэ кIэкIым къыкIоцI шапхъэхэм адиштэу ар ашIынэу, зэрифэшъуашэу агъэдэхэжьынэу пшъэрылъ къафигъэуцугъагъ.
1907-рэ илъэсым ашIыгъэ учреждениер ары ыпэкIэ кIэлэцIыкIуи 150-р зыщаIыгъыгъэхэр. Джы аужырэ шапхъэхэмкIэ зэтегъэпсыхьэгъэ кIэлэцIыкIу IыгъыпIэм сабыйхэр къекIолIэщтых. Ар къатитIоу зэтет, квадратнэ метрэ 5673-рэ мэхъу. НэмыкI чIыпIэхэми къарыкIыхэзэ кIэлэцIыкIухэр мыщ къэкIощтых. ЗипсауныгъэкIэ илэгъухэм адимыштэрэ кIэлэцIыкIухэм Iоф адэзышIэщт дефектолог, логопед ыкIи психолог аштагъэх.
Шъугу къэдгъэкIыжьын, 2020-рэ илъэсым станицэу Дондуковскэм кIэлэцIыкIу IыгъыпIэу жъы хъугъэм ычIыпIэ кIэ зэрэщашIыгъагъэр. Непэрэ мафэм ехъулIэу Джэджэ районымкIэ кIэлэцIыкIу IыгъыпIэм кIощтхэм ячэзыу зи хэтыжьэп. Мыщ фэдэ IофшIэнхэр республикэм имуниципалитетхэм зэкIэми ащэкIо.