Сабый къызэрыхъухьэгъэ унагъохэм ыкIи ахэр мы чIыпIэм дэзытхагъэхэм Тэхъутэмыкъое район сымэджэщхэм яадминистрациехэм шIухьафтынхэр аратыщт.
— Тэхъутэмыкъое район сымэджэщым ыкIи Инэм сымэджэщым яадминистрациехэм сабый къызэрыхъухьэгъэ унагъохэм зэрафэгушIохэрэм имызакъоу, шIухьафтынхэр аратых, — къыщаIуагъ АР-м псауныгъэр къэухъумэгъэнымкIэ и Министерствэ ипресс-къулыкъу.
КъызэраIуагъэмкIэ, сабый къызыфэхъугъэ бзылъфыгъэр сымэджэщым чIатхыкIыжьы зыхъукIэ, къэхъугъакIэм къэбзэныгъэм ылъэныкъокIэ апэрэ мазэм ищыкIэгъэщт Iэмэ-псымэхэр аратых.
— Тэхъутэмыкъое районым къыщыхъугъэ ыкIи мыщ датхэгъэ сабыйхэм зэкIэми мыщ фэдэ шIухьафтынхэр афэтшIыхэзэ тшIынэу дгъэнэфагъэ, — еIо Тэхъутэмыкъое сымэджэщым иврач шъхьаIэу Юлия Мусинам.
Шъугу къэдгъэкIыжьын, лъэпкъ проектэу «Псауныгъэр къэухъумэгъэныр» зыфиIорэм къыдыхэлъытэгъэ шъолъыр проектым кIэлэцIыкIухэм япсауныгъэ къэухъумэгъэныр, медицинэ IэпыIэгъу зэрифэшъуашэу арагъэгъотыныр къыделъытэ. Проектым пшъэрылъ шъхьаIэхэм ащыщ сабый къэхъугъакIэу лIэжьыхэрэм япчъагъэ нахь макIэ шIыгъэныр.