Шъэумэн Хьазрэт итхылъ сигъэгушIуагъШъэумэн Хьазрэт итхылъ сигъэгушIуагъ

ТхэкIошхоу, дунаим щыцIэрыIоу, тилъэпкъкIэ тинамысэу МэщбэшIэ Исхьакъ Шумафэ ыкъом дэжь тызычIахьэм, зэрихабзэу, зэрыс пхъэн­тIэкIу шъабэм къитэджыкIыгъ, къытпэгъокIыгъ.

МэщбашIэр сятэ илэгъу ­шъыпкъ, зыслъэгъукIэ, сятэ слъэгъугъэу къысщэхъу. НэшIо- гушIу, хьалэлыгъэ нэшIукIэ къы­оплъы, угу илъыр зэкIэ епIо пшIоигъоу укъешIы. Сятэ ыпа­шъхьэ сисым фэдэу сшIоигъор есэIо.

Бэмэ тарыгущыIагъэу, дэхэ­кIаерэ тыщысыгъэу Исхьакъ Шу­мафэ ыкъор исекретарэу Гощнагъо къеджагъ. Бзылъфыгъэр бэрэчэтэу къытэплъи, сэлам къытихыгъ.

— Сыд, Шумафэвич? — къе­упчIыгъ.

— ТихьакIэмэ Шъэумэн Хьазрэт итхылъ зырыз шIухьафтынэу къят.

Гощнагъо тхылъэу къыхьы­гъэхэр пIэтынэу екъу. Адэ да­хэшъ къэмланэу зыдэлъыр, ежь тхылъым ышъо фэдэкъабз — дышъэпсыкIэ тхыхьагъэ. Къэмланым къыдэсхыгъ къысатыгъэ тхылъ лъапIэр, пытэу сыбгъэ есыубытылIагъ, Шъэумэным иды­шъэ тхылъ щыщ сэри къыз­нэсыгъ. «СыщэIэфэ сэпацэ тесымыгъахьэу згъэшIон» сIуагъэ.

Шъэумэн Хьазрэт ишIушIагъэ илъэс къэс хегъахъо. ЦIыфмэ агу къызэриIэтыщтым пылъ. Мыгъэ «Адыгэ макъэр» почтэмкIэ къызыфэкIощтмэ сэри ащыщ сыхъугъэшъ, сэгушIо, Шъэумэн Хьазрэт «тхьауегъэпсэушхо» есэIо. Мы илъэсым Шъэумэн Хьазрэт илъэс тIокIиплIырэ тфы­рэ зэрэхъурэр сэшIэти, усэ цIы­кIу фэстхыгъ. Ипчыхьэзэхахьэ сыкъыщыфеджэ сшIоигъуагъ, ау о пIорэр арэп, Тхьэм ыIорэр ары нахь, сыкъэсымаджи IэзапIэм сычIэлъынэу хъугъэ. Сыз­фэкIуагъэри къыздэхъугъэу, тын лъапIэу къысатыгъэми сыщыгушIукIэу, «гъогу мафэкIэ» сыкъэзыгъэкIотэжьыгъэмэ мафэкIэ тызэIукIэнэу къясIожьи тигъогу тыкъытехьажьыгъ.

Мыекъуапэ тыкъыдэкIыжьыгъэу гъогоу тыкъызэрыкIорэм ыбгъуитIукIэ зысэплъыхьэ. Лэ­жьыгъэу илъым сыщэгушIукIы, нэм ыплъыщтыр тыгъэгъаз, ялъэ­­гагъи яинагъи зэфэдиз, анэгу цIыкIухэр тыгъэм игъунджэу укъагъэтхъэжьы. Натрыфри шхъонтIабз, къэбзэ-лъабз. Коцыр зырахыжьыгъэ чIыгухэр агъэу­шъэбыжьыгъахэх. Адыгэм ичIыгу хэгъэгур егъашхэ. Мэшэлахь, Тхьэм псауныгъэ къарет ти­кIалэхэу акIуачIэрэ япкIантIэрэ халъхьэзэ лажьэхэрэм. СынасыпышIоу зысэлъытэжьы, сиадыгэ чIыгу рэхьат, щапхъырэр щэбагъо, хьалэлэу тыщэшхэ, тикIалэхэр IорышIэх, типшъашъэ­хэр щысэтехыпIэх.

Сиусэу Шъэумэным фэстхыгъэр имэфэкI блэкIыгъэми, къы­хэшъуутымэ сигопэщт.

Дышъэм ипсыхъо уесэу ухэсми,
УзшIодэгъоу, узшIошIыжьэу къыхэкIыгъэп зы мафи.
ЧIымэ агъунэу
Сыбыр ущыIэми,
Уилъэпкъ пщыгъупшэрэп,  упылъ бгъэбаиным.
УипсэпэшIагъэмэ укъаухъумэ,
ШIушIагъэу уиIэмэ анэшIу къыпщафэ.
Тыгъэпсы фабэу о укъытфепс,
УтиIэшъ, тыбай, тынасыпышIу.
УзыпэтшIын тетэп дунаим,
Хьазрэт!
ЛIэшIэгъоу тызхэтым уихъишъэ хэхьагъэу,
Урыси, адыги уишIушIагъэ аIуат.
Уимылъку ушъхьамысэу огощы,
Бгощырэм иблэкIи
Тхьэм къыуетыжьы.
Узэрэпсаоу убэрэчэт,
Бэрэчэт-бэрэчэтэу уичIыгу урэкIо.
Уичылэ цIыкIуми ощ фэдэ кIалэ
Къызэрэщыхъун ылъэкIыщтыр ебгъэшIагъ хэгъэгум.
ИлъэсыкIэм ипэгъокIэу сабый мин пчъагъэ
УишIухьафтынхэм арыбгъэгушIуагъ.
Тыдрэ къуапи пцIэ дахэу щыраIо.
Дунаим зырызэу тетмэ уащыщ.
Непэ уимафэшъ, Хьазрэт, сыпфэгушIо!
Хъохъу гущыIэхэр къыппэсэгъохы:
Уипсауныгъэ щылычэу, тхъагъор уимафэу,
ШIоу щыIэр къыбдэхъоу,
Гъэ мин огъашI, ти Хьазрэт!

Хъунэ Разет.