2022-рэ илъэсым «ЭКО» зыфаIорэм ишIуагъэкIэ республикэм щыпсэурэ бзылъфыгъэ 26-рэ ны хъугъэх, сабый 29-рэ къэхъугъ, зэтIуазэхэу щы къахэфагъ.
АР-м псауныгъэр къэухъумэгъэнымкIэ и Министерствэ къызэритырэмкIэ, лъэпкъ проектэу «Демографием» къыдыхэлъытагъэу ЭКО-р ыпкIэ хэмылъэу ашIы. 2022-рэ илъэсым зэкIэмкIи Адыгеим щыпсэухэрэм апае ЭКО-м епхыгъэ протоколи 130-рэ фэдиз ашIынэу агъэнафэ, бзылъфыгъэ 70-мэ мы шIыкIэр къызфагъэфедэгъах.
ЭКО-р нахь шIэхэу пшIы къэс сабый къыппыфэныр нахь IэшIэх. Ащ ишIуагъэкIэ бзылъфыгъэ пчъагъэ ны хъугъэ. Илъэсым къыкIоцI сабый унагъом къызыфэмыхъукIэ, илъэс 35-м ехъугъэхэм илъэсныкъом зышIокIыкIэ, охътабэ тырамыгъашIэу ЭКО-р арагъэшIымэ нахьышIоу специалистхэм алъытэ.
ШIокI зимыIэ медицинэ страхованием епхыгъэу Iоф зышIэрэ медицинэ организациехэр республикэм щыпсэурэ бзылъфыгъэхэм IэпыIэгъу къафэхъух. ЭКО-р къыпфашIыным пае ищыкIэгъэ уплъэкIунхэр, анализхэр зыфэдэхэр, нэмыкI упчIэхэр зиIэхэр мы лъэныкъом епхыгъэ врачым е АР-м псауныгъэр къэухъумэгъэнымкIэ и Министерствэ ителефонэу 8(8772) 210-234-м (номер тедзэр 2062-рэ) теохэмэ, зэхэфыгъэ джэуап къаратыщт.