ГъэцэкIэжьынхэм ахэлэжьагъэх

Социальнэ программэм къыдыхэлъытагъэу, псэолъэшIыным фэгъэхьыгъэ сэнэхьат зэзыгъэгъотырэ студентхэм республикэм ит гурыт еджапIэу гъэцэкIэжьынхэр зыщыкIохэрэм Iоф ащашIагъ. НыбжьыкIи 127-рэ ащ фэдэ IофшIэнхэм ахэлэжьагъ.

Подрядчикхэр ягъусэхэу студентхэм джэхашъохэр зэблахъу­гъэх, штукатуркэу жъы хъугъэр тырахыжьыгъ, дэпкъхэр агъэлагъэх ыкIи нэмыкI IофшIэнхэр агъэцэкIагъэх.

— ШIэныгъэу зэрагъэгъотыгъэмкIэ студентхэм заушэтыжьын амал яIагъ, гъэсэныгъэ учреждениехэм ягъэкIэ­жьын ныбжьыкIэхэм яIахьышIу халъхьагъ, — къыщаIуагъ АР-м гъэсэныгъэмрэ шIэныгъэмрэкIэ и Министерствэ.

Шъугу къэдгъэкIыжьын, мы илъэсым къыщегъэжьагъэу гурыт еджапIэхэм ягъэкIэжьын фэгъэхьыгъэ федеральнэ программакIэ щыIэныгъэм щыпхыращы. Ащ ишIуагъэкIэ Iоны­гъом и 1-м нэс республикэм ит гурыт еджэпIи 9 агъэкIэ­жьыщт. Джащ фэдэу спортзал 58-мэ гъэцэкIэжьынхэр ащыкIонхэу щыт.

ДЕЛЭКЪО Анет.