НыбжьыкIэ ыкIи студенческэ туризмэмкIэ программэм къыдыхэлъытагъэу мы мафэхэм Адыгэ къэралыгъо университетым хьакIэхэр иIагъэх. Мэфищым къыкIоцI ахэм Iофтхьэбзэ зэфэшъхьафхэр афызэхащагъэх.
Адыгэ къэралыгъо университетым иапэрэ хьакIэхэр Белгород ыкIи Санкт-Петербург къарыкIыгъэх. Ахэм Мыекъуапэ итарихъ епхыгъэ чIыпIэхэр къарагъэкIухьагъэх, республикэм идэхагъэ арагъэлъэгъугъ.
— ХьакIэхэм хэушъхьафыкIыгъэ зекIо программэ афызэхэдгъэуцуагъ. Программэм къыдыхэлъытагъэу тиапшъэрэ еджапIэ имузей, АР-м и Лъэпкъ музей ыкIи нэмыкI чIыпIэ дахэу республикэм иIэхэр ныбжьыкIэхэм ядгъэлъэгъугъэх, — къыщаIуагъ Адыгэ къэралыгъо университетым ипресс-къулыкъу.
НыбжьыкIэ ыкIи студенческэ туризмэмкIэ программэр гъэрекIо къыщегъэжьагъэу щыIэныгъэм щыпхыращы. Студент 600 фэдиз ащ хэлэжьагъ. 2022-рэ илъэсым апшъэрэ еджэпIи 191-рэ хэлэжьэнэу щыт.
Апшъэрэ еджапIэм щеджэрэ студентхэр, шIэныгъэлэжь ныбжьыкIэхэр, аспирантхэр, ординаторхэр, шIэныгъэ-ушэтын IофшIэнхэм ахэлэжьэрэ ыкIи урысые зэнэкъокъоу «Большая перемена» зыфиIорэм текIоныгъэ къыщыдэзыхыгъэ кIэлэеджакIохэр арых программэм хэлажьэхэрэр.
НыбжьыкIэхэр зэхэтхэу е язакъоу нэмыкI къалэхэм кIонхэ амал яI. УФ-м ихэушъхьафыкIыгъэ сайтэу «Студтуризм» зыфиIорэм Урысыем ишъолъырхэр къэзыкIухьэ зышIоигъо ныбжьыкIэхэм зыфэе къалэр, апшъэрэ еджапIэр ыкIи лъэныкъоу къыхахыщтыр щатхын алъэкIы.