АР-м и Къэралыгъо Совет — Хасэ ияблэнэрэ зэIугъэкIэгъу иапэрэ илъэс IофшIэгъу ыухыгъ. Тыгъуасэ, депутатхэм зыгъэпсэфыгъо уахътэр рагъэжьэным ыпэкIэ, я XIII-рэ зэхэсыгъор яIагъ. Зэрэхабзэу, Парламентым и Тхьаматэу Владимир Нарожнэм ар зэрищагъ.
Повесткэм щыгъэнэфагъэхэм апэрэхэм ащыщэу тегущыIагъэх Хъут Аминэт Шэуджэн районым ихьыкум участкэ изэгъэшIужь судьяу гъэнэфэгъэным ыкIи ащ дырагъэштагъ.
Нэужым лъэныкъо зэфэшъхьафыбэхэм афэгъэхьыгъэ законопроектхэр, хэбзэгъэуцугъэхэр апэрэ ыкIи ятIонэрэ еджэгъухэмкIэ аштагъэх. Къолъхьэ штэн-Iыхыным, бюджет IофшIэным бюджет зэфыщытыкIэхэм, мылъкум пае хэбзэIахьэу организациехэм атырэм, лэжьыгъэ чылапхъэхэм япхыгъэ Iофхэм ягъэIорышIэн, электроэнергием икъэухъумэн, физкультурэм, спортым, гъэсэныгъэм, цIыфым ипсауныгъэ зишIуагъэ езгъэкIэу чIыопсым къытыхэрэм, зыгъэпсэфыпIэхэм, фэтэрыбэу зэхэт унэхэм ачIэсхэм зэдагъэфедэхэрэм ягъэкIэжьын, цIыфхэм ыкIи ахэм ябагаж язещэн, хэбзэIахьхэм ятынкIэ нахь къызэрыкIоу гъэпсыгъэ системэм къыдэлъытэгъэ ставкэхэм, нэмыкIхэм ахэр афэгъэхьыгъэх.
НыбжьыкIэ парламентым изэIугъэкIэгъукIэ хагъэхьагъэхэри мы зэхэсыгъом щаштагъэх.
НэмыкI субъектхэм яхэбзэихъухьэ къулыкъухэр кIэщакIо зыфэхъугъэхэми депутатхэр ахэплъагъэх, адырагъэштагъ.
ХЪУТ Нэфсэт.