2023-рэ илъэсым экотехнопаркыр Адыгеим щатIупщыщт

Адыгеим и ЛIышъхьэу КъумпIыл Мурат Урысые Федерацием и Вице-премьерэу Виктория Абрамченкэм тхьамэтагъор зыщызэрихьэгъэ зэIукIэм хэлэжьагъ.

Къыблэ федеральнэ шъолъы­рым пыдзэфэ коммунальнэ пытэхэм зэращыдэзекIохэрэ Iофым мыщ щытегущыIагъэх. Урысые Федерацием Къыблэ федеральнэ шъолъырымкIэ и Полномочнэ лIыкIоу Владимир Устиновыр, министерствэхэу ыкIи ведомствэхэу а Iофым фэгъэзагъэхэм яIэшъхьэтетхэр, Урысые экооператорым ипащэ, Къыблэм ишъолъырхэм ягубернаторхэр а IофшIэным къыхэлэжьагъэх.

Iофтхьабзэр зыщырагъэжьэщтым Виктория Абрамченкэм агу къыгъэкIыжьыгъ 2030-рэ илъэсым ехъулIэу пыдзафэхэр зэкIэ зэхадзыхэзэ ашIынэу, ахэм япроцент 50-р переработкэ ашIынэу Урысыем и Президентэу Владимир Путиным пшъэрылъ къызэригъэуцугъэр.

Шъолъырхэм яIофхэм язытет къытегущыIэзэ Правительствэм и Тхьаматэ игуадзэ къыхигъэщыгъ пыдзэфэ пытэхэмкIэ Адыгеим Iофтхьабзэхэр дэгъоу зэрэщызэшIуахыхэрэр.

Урысые Федерацием чIыопс къэкIуапIэхэмкIэ ыкIи экологиемкIэ иминистрэ игуадзэу Дмитрий Тетенькиным ипсалъэ къыщыхигъэщыгъ пыдзэфэ пытэхэм япереработкэкIэ планым къыдилъытэхэрэм респуб­ликэм къызэраригъэхъугъэр. Ащ дакIоу чIатIэжьырэ пыдзафэхэм къакIыригъэчыгъ.

ППК-у «Урысые экологическэ операторыр» зыфиIорэм игенеральнэ директорэу Денис Буцаевым агу къыгъэкIыжьыгъ экотехнопаркым игъэпсынкIэ Адыгеим инвестиционнэ проектыр зэрэщыпхыращырэр. Ащ къызэриIуагъэмкIэ, Къыблэ федеральнэ шъолъырым имызакъоу, УрысыемкIи а лъэныкъомкIэ Адыгеир апэ итхэм зыкIэ ащыщ.

Адыгеим и ЛIышъхьэу КъумпIыл Мурат къызэгущыIэм а проектым игъэкIотыгъэу къыщы­уцугъ. Джырэ уахътэм диштэрэ экотехнопаркым ипроекткIэ инвесторыр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ЭкоЦент­рэм» иоператор ары. Мы псэолъакIэм хэхьащтых тонн миллиони 3,1-рэ фэдиз зэрыфэщт полигоныр, хэкIыр зэхэзыдзыщт автоматическэ линиер ыкIи нэмыкIхэр. ПстэумкIи инвестициехэр сомэ миллион 950-рэ фэдиз хъущтых.

Проектым игъэцэкIэн рагъэ­жьэгъах. ПроектымкIэ документацием дырагъэштагъ, ащ ишIын­кIи Iизын къаратыгъах.

«Тэ талъэныкъокIэ ищыкIэгъэ IэпыIэгъур зэкIэ инвесторым етэты: инвестпроектыр джырэ уахътэм диштэу алъы­тагъ; полигоным ыубытыщтыр гектар 16 фэдиз. «Гъогу кар­тэкIэ» заджэхэрэм диштэу илъэсэу къихьащтым ия IV-рэ квартал псэуалъэр атIупщынэу ары. Урысыем и Президент къыгъэуцугъэ пшъэрылъхэр Адыгеим ипIалъэм къыпэу мы лъэныкъомкIэ ыгъэцэкIэнхэ ылъэкIыщт», — къыIуагъ Къум­пIыл Мурат.

Джырэ уахътэм диштэрэ экотехнопаркыр республикэм иIэ зыхъукIэ, 2024-рэ илъэсым икъихьэгъум дэжь пыдзафэхэр зэкIэ обработкэ ашIышъущтых, чIатIэжьхэрэм фэдитIукIэ къащагъэкIэщт.