Зыпкъ итэу Iоф ешIэ

Адыгэ РеспубликэмкIэ зыпкъ итэу Iоф зышIэрэ предприятиехэм зэу ащыщ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мыекъопэ машинэшI заводыр». Мыгъэ ар загъэпсыгъэр илъэс 80 мэхъу. Мы уахътэм къыкIоцI ащ хэхъоныгъэхэр ышIыхэзэ ыпэкIэ лъыкIотагъ, ылъэ пытэу теуцуагъ. Гидравлическэ манипуляторхэм якъыдэгъэкIынкIэ Урысыем пэрытныгъэ щиIыгъ.

Заводыр хэушъхьафыкIыгъэ ыкIи дунэе къэгъэлъэгъонхэм, рекламнэ кампаниехэм чанэу зэрахэлажьэрэм ишIуагъэкIэ, ащ къыдигъэкIырэ продукциер тыди щызэлъашIагъ, ахэр аужырэ шапхъэхэм адештэх. Ащ къыкIэлъыкIоу предприятием медаль ыкIи диплом пчъагъэ къыфагъэшъошагъ. 2000-рэ илъэ­сым къыщыублагъэу заводыр Урысые зэнэкъокъоу «Урысыем итовар анахь дэгъуи 100» зыфиIорэм пчъагъэрэ ифиналистэу ыкIи илауреатэу хъугъэ.

Предприятием къыдигъэкIырэр идэгъугъэкIэ нэмыкIхэм къахэщы, ар зыгъэфедэхэрэм япчъагъи бэ.

Заводым» илъэсэу тызыхэтым имэзих манипулятор 320-рэ къыдигъэкIыгъ. БлэкIыгъэ илъэ­сым мыщ фэдэ иуахътэ а пчъа­гъэр 130-рэ хъущтыгъэ. Продукциер зэкIэ IуагъэкIы. Ащ фэдэ къэбар къытыгъ предприятием игенеральнэ директорэу ЕмтIылъ Руслъан. Ащ къызэриIуагъэмкIэ, тэрэзэу гъэпсыгъэ стратегическэ планым ишIуагъэкIэ мыщ фэдэ къэгъэлъэгъонхэм къа­фэкIуагъэх.

— Мы мафэхэм зыпкъитыныгъэ тиIэу Iоф тэшIэ, — еIо заводым игенеральнэ пащэ. — Предприятием иIофшIэн зыпари зэхъокIыныгъэ фэхъугъэп, зы нэбгыри IудгъэкIыгъэп, продукцием икъыдэгъэкIын проценти 100-м кIахьэ.

ЕмтIылъ Руслъан къызэриIуа­гъэмкIэ, гумэкIыгъохэр щыIэхэми, агу агъэкIодырэп, къыдагъэ­кIырэр нахьыбэ ашIыным, ар IуагъэкIыным, ащ дакIоу заводым Iут цIыфхэм яфэIо-фашIэхэр зэрифэшъуашэу агъэцэкIэнхэм, агу къыдащэеным пылъых. Предприятием хэбзэIахьхэр етых, республикэм иэкономикэ хэхъоныгъэ ышIыным иIахьышIу хелъхьэ.

Непэрэ мафэм ехъулIэу заводым вакансиехэр иIэх. Апшъэ­рэ ыкIи гурыт хэушъхьафыкIыгъэ гъэсэныгъэ зиIэ специалистхэр ищыкIагъэх. Гурыт лэжьапкIэр сомэ мин 47-рэ мэхъу. Предприятием Iутхэм медицинэ фэIо-фашIэхэр афагъэцакIэх, зисэнэхьат хэшIыкIышхо фызиIэ специалистхэм — неврологым, кардиологым, стоматологым, терапевтым Iоф ашIэ. Игъом лэжьапкIэр араты, зыгъэпсэфыгъо уахътэм IофышIэхэр хы ШIуцIэ Iушъом агъакIох, ыпкIэ хэмылъэу мэфитфырэ ащ зыкъыщагъэпсэфын алъэкIы.

Гидроманипуляторхэм якъыдэгъэкIынкIэ Урысыем пэрытныгъэ щызыIыгъ предприятиеу щыт пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мыекъопэ машинэшI заводыр». 1985-рэ илъэсым щегъэжьагъэу а лъагъом тет. Непэрэ мафэм ехъулIэу промышленностым щагъэфедэрэ пкъыгъо зэфэшъхьафхэр заводым къыдегъэкIых, ахэр чIыпIэ зэфэшъхьафхэм ащыIуегъэкIы.