ГъэхъэгъэшIухэр ешIых

Адыгэ къуаер къыдэзыгъэкIырэ предприятиябэ рес­публикэм ит. Ахэм ащыщ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Щэ заводэу «Джаджэ» зыфиIорэр. ХъызмэтшIэпIэ пэрытхэм мы заводыр ащыщ.

Адыгэ лъэпкъыр зэрыгушхорэ гъомылапхъэм идэгъугъэ къыкIемыгъэчыгъэнымкIэ пред­приятием пшъэдэкIыжьышхо ехьы. Адыгэ къуаер тиреспуб­ликэ нэмыкI къыщыдамыгъэ­кIынэу зэрагъэнэфагъэм ишIуа­гъэкIэ Урысыем ичIыпIэ зэфэшъхьафхэм продукциер ащы­IуагъэкIы, къуаехэм ядэгъугъэ зэлъашIэ. Щэу агъэфедэрэр Адыгеим имызакъоу Краснодар краим ыкIи Ростов хэкум къыщащэфы. Непэрэ мафэм ехъу­лIэу «Сыр Адыгейский», «Чечел», «Косичка», «Сулугуни», «Охотничий», «Моцарелла» зы­фиIохэрэр цIынэу ыкIи ащыщ­хэр гъэгъугъэхэу, джащ фэдэу тхъу зэфэшъхьафхэр къыда­гъэкIых.

Продукциер дэгъоу зэращэфырэм къыхэкIэу 2010-рэ илъэ­сым заводым зырагъэушъом­бгъугъ. ЦехыкIэ ашIыгъ ыкIи аужырэ шапхъэхэм адиштэрэ оборудование зэрагъэгъотыгъ. Ащ ишIуагъэкIэ къыдагъэкIырэ къуаер фэдитIукIэ нахьыбэ хъугъэ.

Хэхъоныгъэу ашIыгъэм щыщ пыдзафэхэр ямыIэу Iоф зэра­шIэрэр. Щэу зэрагъэгъотырэр гощыгъэу къыдагъэкIы. Щэта­шъхьэр тырахы, тхъу цIынэ зэ­фэшъхьафхэр, къуаехэр хашIы­кIых. Къоепсэу къакIэкIырэри джы къыдагъэкIыжьы. 2007-рэ илъэ­сым къыщегъэжьагъэу мыщ тегъэпсыхьэгъэ цех яIэ хъугъэ.

Непэрэ мафэр пштэмэ, «Щэ заводэу «Джаджэм» ипродукцие Адыгеим имызакъоу Урысыем щызэлъашIагъ. Я ХХ-рэ лIэшIэгъум ия 90-рэ илъэсхэм адэжь зэрэхэгъэгоу сатыушI чIыпIэхэр къащызэIуахыхэу аублэгъагъ. Продукциер ахэм ащыпщэным пае къуаехэр зэрэщылъырэ мэфэ пчъагъэм хэбгъэхъон фэягъ. КъыдагъэкIырэр мэфи 5 — 6 нахьыбэ щылъыщтыгъэп. Джащ дэжьым къуаехэр «вакуум пакетхэм» акIоцIащыхьанхэу унашъо ашIыгъ. Анахь макIэми мэфэ 60-рэ ахэр щылъынхэ алъэкIы. Адыгэ къуаер къыдэзыгъэкIыхэрэмкIэ апэрэу мы шIыкIэр заводым щагъэфедэнэу аублагъ.

Аужырэ шапхъэхэм адиштэрэ шIыкIэхэр агъэфедэх нахь мы­шIэми, «Адыгейский», «Спагетти» ыкIи «Косички» зыфиIорэ къое лъэпкъхэр IэкIэ ашIых. Непэрэ мафэм ехъулIэу «Щэ заводэу «Джаджэм» нэбгырэ 572-рэ щэлажьэ. Джыри Iоф­шIэпIэ чIыпIэхэр арагъэгъотынхэ амал яI. Предприятием кIуачIэу IэкIэлъымкIэ продук­циеу къыдигъэкIырэм хигъэхъон ылъэкIыщт.

Продукциер адештэ, IэшIу ыкIи цIыфым ипсауныгъэкIэ ишIогъэшхо къэкIо. ЫпэкIэ ар Казахстан ыкIи Абхъазым ащэщтыгъэ, джы Урысыем ичIыпIэ зэфэшъхьафхэм ащыIуагъэкIы. Заводым итранспорткIэ продукциер къэлэшхохэм анагъэсы, нэужым зэбгыращы.

Непэ щэ заводым ипащэр Шамиль Гусейновыр ары. Ащ гъэхъэгъэшIухэр ышIыхэзэ предприятиер ыпэкIэ лъегъэкIуатэ. ГущыIэм пае, мы илъэсым Дунэе къэгъэлъэгъонэу «ПРОД ЭКСПО 2022-м» изэнэкъокъоу «Лучший продукт» зыфиIорэм илауреат хъугъэ. Къуаеу «Адыгейский», тхъу цIынэу ыкIи жъожьыгъэу «Гиагинский молза­вод», «Главмаслопром» зыфиIо­хэрэм апае предприятием ды­шъэ медаль къыфагъэшъошагъ.

ДЕЛЭКЪО Анет.