Адыгеим илэгъу

Адыгеим къэралыгъо гъэпсыкIэ иIэ зыщыхъугъэ 1922-рэ илъэсым къэхъугъэу непэ рес­публикэм нэбгырэ 22-рэ щэпсэу. УФ-м ПенсиехэмкIэ ифонд и Къутамэу АР-м щыIэр ары ащ тыщызгъэгъозагъэр.

А илъэсым къэхъугъэ тинахьыжъхэм ащыщ Тэхъутэмыкъое районым ит къуаджэу Щынджые щыпсэурэ Тэмыкъое Хъаныщэ. Ар 1922-рэ илъэсым бэдзэогъум и 1-м къэхъугъ. Ежь нэнэ цIыкIум ипсауныгъэ къы­хэIагъ, тыдэгущыIэнэу хъугъэп. Ыпхъоу Саныет къызэрэтиIуагъэмкIэ, Хъаныщэ Теуцожь районым ит къуаджэу Аскъэлае къыщыхъугъ, къыгъэшIагъэм инахьыбэм ащ дэсыгъ. Ыныбжь хэкIуати, изакъоу псэуныр къин зэхъум, Саныет зэрищэлIэжьыгъэу, илъэс 17 хъугъэу Щынджые дэс.

Хъаныщэ Хэгъэгу зэошхом иилъэсхэм ыныбжь икъугъэу къахиубытагъ, тылым щыIэу ар Советскэ Дзэхэм IэпыIэгъу афэ­хъугъэхэм ащыщ. Зы пхъу закъо, ащ иехэу пхъорэлъфищ иI.

Тэмыкъое Хъаныщи, нэмыкIэу Адыгеим къэралыгъо гъэпсыкIэ иIэ зыщыхъугъэ илъэсым къэ­хъугъэ тинахьыжъэу исхэми япсауныгъэ къыщымыкIэу джыри бэрэ къытхэтынхэу тафэ­лъаIо!

ХЪУТ Нэфсэт.