Республикэм ибаиныгъэ шъхьаIэхэм ащыщ

Адыгэ къуаем иIэшIугъэ Урысыем имызакъоу, IэкIыб къэралыгъохэми дэгъоу ащызэлъашIэ. Мы гъомылапхъэр республикэм ибаиныгъэ шъхьаIэхэм ащыщ.

УФ-м и Апшъэрэ хьыкум унашъоу ышIыгъэмкIэ, адыгэ къуаер къыдэзыгъэкIын ыкIи ащ ыцIэ зыгъэфедэн зылъэкIыщтыр Адыгеим ит предприятиехэр ары.

Адыгэ Республикэм и ЛIышъхьэу КъумпIыл Мурат зэрэхигъэунэфыкIыгъэмкIэ, мыщ фэдэ екIолIакIэм ишIуагъэкIэ шъолъырым къыщыдагъэкIырэ адыгэ къуаем хэпшIыкIэу хэхъуагъ. Мы аужырэ илъэсхэм щэ заводхэр агъэкIэжьыгъэх, ахэм япродукцие дунэе шапхъэхэм адештэ. БлэкIыгъэ илъэсым къое тонн мин 21-м ехъу республикэм къыщыдагъэкIыгъ, къыпэрэ илъэсым егъэпшагъэмэ а пчъагъэр процент 11,6-кIэ нахьыб.

Адыгэ къуаер жъугъэу республикэм къыщыдагъэкIэу зырагъэжьагъэр 1968-рэ илъэсыр ары. Джырэ уахътэ мыщ епхыгъэу предприятии 8-мэ ыкIи унэе предприниматель пчъагъэхэм шъолъы­рым Iоф щашIэ. Ахэм зэкIэми щытхъу хэлъэу япшъэрылъхэр агъэцакIэх, зыми фэмыдэ тиады­гэ къуаер нэмыкI чIыпIэхэм алъагъэIэсыным, тибренд шъхьаIэ тыди щызэлъашIэным яIахьы­шхо халъхьэ.