Адыгеим и ЛIышъхьэу КъумпIыл Мурат зыхэлэжьэгъэ игъэкIотыгъэ зэхэсыгъоу тыгъуасэ щыIагъэм АР-м инахьыжъхэм я Совет хэтхэр Адыгэ Республикэм ия 100-рэ илъэс игъэмэфэкIын епхыгъэ Iофыгъохэм щатегущыIагъэх, республикэм иныбжьыкIэхэм афэкIорэ Джэпсалъэр щаштагъ.
Нахьыжъхэм я Совет итхьаматэу ГъукIэлI Нурбый Iофтхьабзэр зэрищагъ. Зэхэсыгъом хэлэжьагъэх УФ-м и Общественнэ палатэ хэтэу, Урысыем IофшIэнымкIэ и ЛIыхъужъэу МэщбэшIэ Исхьакъ, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, республикэм иминистрэхэм я Кабинет хэтхэр, Адыгеим и Къэралыгъо Совет – Хасэм идепутатхэр, общественнэ, лъэпкъ-культурэ организациехэм япащэхэр.
Адыгеим икъэралыгъо суверенитет ехьылIэгъэ Декларацием зыкIэтхагъэхэр илъэс 31-рэ зэрэхъурэр зэхэсыгъом щыхагъэунэфыкIыгъ. Нахьыжъхэм я Совет хэтхэм ащыщхэр ыпэкIэ щыIэгъэ хъугъэ-шIэгъэшхохэм ахэлэжьагъэх, республикэм икъэралыгъо лъапсэхэм язэхэщэн яIахьышIу хашIыхьагъ.
КъумпIыл Мурат къэзэрэугъоигъэхэм зафигъазэзэ зэрэхигъэунэфыкIыгъэмкIэ, республикэм ия 100-рэ илъэс культурэ, спорт, общественнэ Iофтхьэбзабэ зэрэзэрахьащтхэм нэмыкIэу, Адыгэ Республикэм и Мафэхэр УФ-м ФедерациемкIэ и Совет бэдзэогъум щызэхищэнхэу Адыгеим зегъэхьазыры. Къэралыгъо гъэпсыкIэ яIэ зыхъугъэр мыгъэ илъэси 100 зэрэхъурэр хэзыгъэунэфыкIырэ Къэбэртэе-Бэлъкъарми, Къэрэщэе-Щэрджэсми яхудожественнэ купхэм ягъусэу Адыгеим и Мафэхэр Москва зыщыкIощтхэ лъэхъаным, Iоныгъом, концерт къызэдатынэу рахъухьэ. Джащ фэдэу Москва щызэхащэщт мэфэкI Iофтхьабзэхэм анэмыкIэу, чъэпыогъу мазэм Адыгеим ия 100-рэ илъэс ихэгъэунэфыкIын тегъэпсыхьэгъэ Iофтхьэбзабэ Мыекъуапэ щызэрахьанэу рахъухьэ.
«Республикэм июбилей игъэмэфэкIын епхыгъэ федеральнэ планым илъэсищ хъугъэу Iоф дэтэшIэ. Хэгъэгум ипащэхэми, Урысые Федерацием и Президентэу Владимир Путинми лъэшэу тафэраз анаIэ тиреспубликэ къызэрэтырагъэтырэм фэшI. Планым ичэзыухэм ягъэцэкIэнкIэ ренэу IэпыIэгъу къытфэхъу тичIыпIэгъоу, Урысыем и Правительствэ ивице-премьерэу Дмитрий Чернышенкэр. Федеральнэ планым дакIоу Адыгеим шъолъыр планри щагъэцакIэ. Культурэ Iофтхьабзэхэм анэмыкIэу, спорт, просветительскэ, гъэсэныгъэм епхыгъэ Iофтхьабзэхэри ащ хэхьэх», — къыIуагъ КъумпIыл Мурат.
Республикэм культурэмкIэ иучреждение пэрытхэр юбилеим ехъулIэу зэрагъэцэкIэжьыгъэхэр зэхэсыгъом щыхагъэунэфыкIыгъ. Адыгэ Республикэр зызэхащагъэр илъэси 100 зэрэхъурэм фэгъэхьыгъэ почтэ маркэм икъыдэгъэкIын ыуж итых. Джащ фэдэу юбилей медалэу «АР-р зызэхащагъэр илъэси 100 мэхъу» зыфиIорэмрэ сомищэу зэрыт тыжьын ахъщэрэ къыдагъэкIыщтых.
Республикэм социальнэ-экономикэ хэхъоныгъэ зэришIыщт нэмыкI лъэныкъохэмкIи Iофышхо зэшIуахы.
«ЛъэгэпIэшхом тетэу юбилеим епхыгъэ Iофтхьабзэхэр зехьэгъэнхэмкIэ тфэлъэкIыщтыр зэкIэ тшIэщт. МэфэкIым епхыгъэ Iофтхьабзэхэм республикэр зэрыгушхорэ гъэхъагъэхэр къахэщынхэ фае Адыгеим нахьыбэу анаIэ къытырадзэным, ащ къэкIуапIэу иIэхэм ягъэфедэнкIэ амалыкIэхэр къэгъотыгъэнхэм афэшI», — къыIуагъ КъумпIыл Мурат.
АР-м инахьыжъхэм я Совет итхьаматэу ГъукIэлI Нурбый зэхэсыгъом къыщыгущыIагъ. Ащ зэрэхигъэунэфыкIыгъэмкIэ, зэоуж лъэхъаным автоном хэкур зэрэзэтырагъэуцожьыгъэр, Адыгеим хэхъоныгъэ зэришIыгъэр тинахьыжъхэм анэгу кIэкIыгъ, непэрэ гъэхъагъэу ащ иIэхэм арэгушхох.
Адыгеим къэралыгъо гъэпсыкIэ иIэ зыхъугъэр илъэси 100 зыщыхъурэм ехъулIэу нахьыжъхэм я Совет республикэм иныбжьыкIэхэм афэкIорэ Джэпсалъэр ыштагъ. Нахьыжъхэм хэбзэ шIагъоу яIэр ныбжьыкIэхэм лъагъэкIотэн, республикэм ихэхъоныгъэ лIэуж пэпчъ иIахь хишIыхьан, лъэпкъ зэгурыIоныгъэр гъэпытэгъэн зэрэфаер ащ щыхагъэунэфыкIыгъ.
АР-м культурэмкIэ иминистрэу Аулъэ Юрэ зэхэсыгъом хэлажьэхэрэм пэшIорыгъэшъ Iофтхьабзэу зэрахьагъэхэм ыкIи гухэлъэу яIэхэм афэгъэхьыгъэу къафиIотагъ. Культурэм ылъэныкъокIэ юбилей Iофтхьабзэхэр: къэгъэлъэгъонхэр, фестивальхэр, творческэ купхэм яконцертхэр зэрэщыIэщтхэр зэхэсыгъом шъхьафэу щыхагъэунэфыкIыгъ.
Нахьыжъхэм я Совет хэтхэми, лъэпкъ-культурэ общественнэ движениехэм япащэхэми мэфэкI Iофтхьабзэхэм язехьанкIэ еплъыкIэу яIэхэр къыраIотыкIыгъэх.
АР-м и ЛIышъхьэ ипресс-къулыкъу