Тэхъутэмыкъое районым ипоселкэу Яблоновскэм дэт хъызмэтшIапIэу «ДомБытХим» зыфиIорэр ежь зыщылэжьэрэ лъэныкъомкIэ Урысыем ибэдзэршIыпIэ анахь чIыпIэ ин щызыубытыхэрэм ащыщ.
Джырэблагъэ Тэхъутэмыкъое районым тызэкIом ащ тыщыIагъ. КъытпэгъокIыгъэр ыкIи IофшIэным нэIуасэ тыфэзышIыгъэр хъызмэтшIапIэм икоммерческэ пащэу Натхъо Саныет. ХъызмэтшIапIэм чIыпIэшхо къызэлъеубыты, цехэу иIэр бэ. Совет хабзэм илъэхъан фабрикэшхоу е заводышхоу щыIэщтыгъэхэр угу къыгъэкIыжьэу IофшIэныр щыжъот.
Илъэс 23-м ехъугъ «ДомБытХимыр» зыщыIэр, химие зыхэлъэу унагъом щагъэфедэхэрэр (бытовая химия) къыдегъэкIых. «Полный цикл» зыфаIорэм тетэу Iоф ешIэ. Ащ къикIырэр бэшэрэбэу зэрытыщтыри, ащ ышъхьэ тегъэчэрэгъэгъощтыри, ахэм арагъэхъожьыщтыри ежьхэм къызэрэдагъэкIыхэрэр ары. Къуаджэу Афыпсыпэ зы цех дэт, ар бэшэрэб шъхьатепIохэр ары зыфэгъэзагъэр, адрэр зэкIэ Яблоновскэм къыщашIы.
Нэбгырэ 250-мэ мы уахътэм Iоф щашIэ. Химие зыхэлъэу тхьэкIэным, гыкIэным щагъэфедэрэ зэфэшъхьаф 200 къашIы, мазэм бэшэрэб миллиони 2-м къыщымыкIэу къыдагъэкIы.
ХъызмэтшIапIэр шъолъыр мэхьанэ зиIэхэм ясатырэ хэт, «бытовой химиер» къыдэзыгъэкIырэ предприятие анахь инэу Урысыем итхэм ащыщ. Ащ ипродукцие щэпIэ зэхэтышхохэу «Магнит», «Пятерочка», «Лента», «Ашан» зыфаIохэрэм ащаIуагъэкIы, ахэр зэрыт субъект 60, IэкIыб къэрал благъэхэр къызэлъаубытых. Илъэс заулэ хъугъэу «Лучший экспортер года» зыфиIорэ Урысые зэнэкъокъум промышленностым ылъэныкъокIэ апэрэ чIыпIэхэр къыщызыхьыхэрэм ащыщ.
Ащ фэдэу Iофхэр дэгъухэми, мы уахътэм зэкIэри зыгъэгумэкIырэ упчIэр яттыгъ — IэкIыб къэралхэм ащыщхэм Урысыем къыпагъохыгъэ санкциехэм къиныгъоу къыздахьыгъэхэр зэхашIагъэмэ.
— Продукциер зыхэтшIыкIырэр, сырьер, Европэм икъэралыгъохэр ары нахьыбэу къызщытщэфыщтыгъэр, — къыIуагъ Саныет ащ джэуап къыритыжьызэ. — Ахэм «гъогур къызэфамышIызэ» IэпэчIэгъанэ тшIынэу игъо тифагъ. Арышъ, джыри мы лъэныкъомкIэ гумэкIыгъо тиIэгоп.
Бэшэрэбэу продукциер зэрагъэхъощтыр къэзышIырэ оборудованиеу технологие пэрытхэм адиштэрэри Италием къыращынэуи къадэхъугъ. Ар зыхашIыкIыщт IэпэчIэгъанэу яIэр аухымэ яIофшIэн къызэтемыуцоным пае Китаим, КъокIыпIэ Чыжьэм яхъызмэтшIапIэу ахэр къэзышIыхэрэм ащыщхэм зэзэгъыныгъэхэр адашIыгъэх.
Арэу щытми, санкциехэм зыпари яягъэ къэмыкIуагъэу щытэп. Саныет къызэриIуагъэмкIэ, продукциер зыхашIыкIыщтыр пэшIорыгъэшъэу зэрэзэрагъэгъотыгъэм Iофыгъохэр дигъэзыжьыхэрэп. Ахэм ауасэ хэпшIыкIэу дэкIоягъ. ГущыIэм пае, Китаим иахъщэ къэлъэпIагъ, ащ фэшI сырьер нахь лъапIэу къызэрафыдэкIыщтыр нафэ. ЗыхашIыкIырэр къэлъапIэмэ, хашIыкIыгъэм ыуаси дэкIоен фаеу мэхъу. Ар зыгъэгумэкIыхэрэм ащыщ.
— ЛъэпIэ дэдэ тымышIыным пае ащ фэдэу зыуасэ дэкIоегъэ сырьехэм ащыщхэр къэтымыщэфынхэу итхъухьагъ. Джы зыуж титыр рецептэу зэрэтшIыхэрэм зэхъокIыныгъэхэр афэтшIынхэр ары, — къыIуагъ коммерческэ директорым. – Ащ пае узэрытхьэкIэщт е узэрыгыкIэщт продукциеу къыдэдгъэкIырэр нахь дэи хъущтэп. Ащ къыкIэзгъэтхъымэ сшIоигъу.
Химие зыхэлъэу унагъом щагъэфедэхэрэр къыдэзыгъэкIырэ IэкIыб къэрал компаниешхохэр Урысыем ибэдзэршIыпIэхэм зэрарыкIыжьырэм хэти непэ щыгъуаз. Ащ къыхэкIыкIэ, ахэм къыдагъэкIыгъэу щэпIэ зэхэтышхохэм ямэкIайхэм ателъым лъэшэу къыщыкIагъ, къатенэжьыгъэ тIэкIури лъэпIэ дэдэу IуагъэкIы. Ащ фэшI «ДомБытХимым» иассортимент хагъэхъоным, мазэм къыдагъэкIырэм ипчъагъи нахьыбэ ашIыным фэхьазырынхэу ащ ипащэхэм пшъэрылъ яI. ЩэпIэ зэхэтышхоу Iоф зыдашIэхэрэри ащ къыкIэлъэIух.
Саныет къызэриIуагъэмкIэ, ар акIуачIэ къымыхьынэу щытэп, ау уахътэ ищыкIагъ. IэпыIэгъу фэенхэу къызэрэхэкIыщтыри ыушъэфырэп. Сыда пIомэ ассортиментым зыхахъокIэ ар зыхашIыкIыщтыр, зэрашIыщт оборудованиер къащэфынхэ фай. Мазэм къыдагъэкIырэм ипчъагъэ хагъэхъоным пае линиеу Iоф зышIэхэрэм зарагъэушъомбгъунэу хъущт. ГущыIэм пае, сабын пытэхэр хъызмэтшIапIэм мы уахътэм къыдигъэкIыхэрэп. ТапэкIэ ари яассортимент хагъэхьан фае. Ащ оборудование гъэнэфагъи, сырье нэмыкIи ищыкIагъэх. Джа Iофыгъохэм ядэгъэзыжьын непэ анахьэу зыуж итхэр.
— Сыд хъугъэми, къыдэдгъэкIырэм къыщыдгъэкIэщтэп, IофшIэпIэ чIыпIэу тиIэри нахь макIэ хъущтэп. Джы зэрэщытым фэдэу тапэкIи хъызмэтшIапIэм цIыфэу щылажьэхэрэр къызэрэкIощтхэми, щэджэгъуашхэ зэрашIыщтыми, IофшIэкIэ амал тэрэзхэр яIэнхэми, «социальнэ пакетым» къыдэлъытагъэхэр зэрафэдгъэцакIэрэми тынаIэ тетыщт. ЩапIэу Iоф зыдатшIэхэрэми титовар идэгъугъэ къызэрэщытымыгъэкIэщтымкIэ гущыIэ ятэты, — къыIуагъ Саныет.
Химие зыхэлъ продукцием Iоф дашIэ нахь мышIэми, тыкъэзыуцухьэрэ дунаим яягъэ емыкIыным пае санитар шапхъэу щыIэхэр хъызмэтшIапIэм ипащэхэм агъэцакIэх. ЦIыфэу чIэтхэм япсауныгъэ зэрар къафимыхьыными анаIэ тет. ЗэкIэ шIыкIэу агъэфедэрэр, яоборудование ащ фытегъэпсыхьагъэх. Бэшэрэбхэр ашIыхэ зыхъукIэ зыпари пыдзафэ рамытэкъужьэу шъхьатепIохэр ахашIыкIыжьых.
Гухэлъэу яIэ пстэур къадэхъунэу, пшъэрылъэу апашъхьэ къиуцохэрэр щыIэныгъэм щыпхыращышъунэу тафэлъаIо. Яассортимент хагъахъоу, къыдагъэкIырэм ипчъагъи нахьыбэ хъумэ, IофшIэпIэ чIыпIэу къатырэми, хэбзэIахьэу бюджетым къыхалъхьэрэми ахэхъощт.
ХЪУТ Нэфсэт.