Наркотик зыхэмыт щыIэныгъэр

Мы шъхьэр зиIэ зэдэгущыIэгъу сыхьат Гавердовскэ къоджэ тхылъеджапIэм бэмышIэу щыкIуагъ. Наркоманием ыкIи наркотикхэр хэбзэнчъэу къезыгъэкIокIыхэрэм апэуцужьыгъэным и Дунэе мафэ ипэгъокIэу ар зэхащагъ.

Псауныгъэм зэрар езыхырэ шIыкIэхэр щыгъэзыегъэнхэм фытегъэпсыхьэгъэ Iофтхьабзэм къырагъэблэгъагъэх тхылъеджэхэр.

Пэублэ гущыIэу тхылъеджапIэм ипащэу Наталья Алексе­евам къышIыгъэр наркотикхэр цIыфым ыпкъынэ-лынэ ыкIи обществэм зэрарэу къафихьырэмкIэ къыригъэжьагъ. Непэрэ щыIэныгъэм наркоманиер анахь гумэкIыгъоу тызэутэкIыхэрэм ащыщ хъугъэ. Ащ ыпкъ къикIыкIэ унагъохэр зэхэкIыжьых, цIыфым ипсауныгъэ зэщэкъо, шэн дэйхэр къыхафэхэ мэхъу. ГухэкI нахь мышIэми, хъулъфыгъэхэм ямызакъоу, зыныбжь имыкъугъэхэм, бзылъфыгъэхэм ащыщхэми мыр уз афэхъоу къыхэкIы.

— Наркоманиер тищыIэныгъэ пытэу хэуцогъэ узышхохэм ащыщ. Ар бгъэ­хъужьышъунэу зэрэщымытыр тэ, нахьыжъхэм, къызэрэдгурыIорэм дакIоу, къыткIэхъухьэ­хэрэми зэхядгъэшIыкIыным тынаIэ тедгъэтын фае, — къыIуагъ тхылъ­еджапIэм ипащэ.

Джащ фэдэу Н. Алексеевам Iофтхьабзэр окIофэ зигугъу къышIыгъэхэм ащыщ наркотикхэр зэрахьылIэнхэм, агъэзекIонхэм, агъэтIылъынхэм щынагъо зэрэпылъым дакIоу, уголовнэ пшъэдэкIыжьри зэрагъэлъэшыгъэр.

Наркоманием пэуцужьырэ тхылъ къэгъэлъэгъонэу къагъэ­хьазырыгъэм къэзэрэугъоигъэ­хэр еплъынхэ амал яIагъ.

Iэшъынэ Сусан.