Кубокыр Москва къыщыдихыгъ

Дунэе зэIукIэгъоу «Зэкъошныгъэм и Кубок» зыфиIорэр Москва мэкъуогъум и 23 — 26-м щыкIуагъ.

Адыгэ Республикэм испорт еджапIэу N 2-м зыщызыгъэсэрэ Кристина Морозовар IэкIэ зэбэныхэрэм язэнэкъокъу IэпэIэсэныгъэ ин къыщигъэлъэгъуагъ. Республикэм щапIугъэ пшъашъэм кг 70-м нэс къэзыщэчыхэрэм якуп апэрэ чIыпIэр къыщыди­хыгъ, Кубокыр къыфагъэшъошагъ. Адыгэ Республикэм изаслуженнэ тренерэу НэмытIэкъо Аскэрбый ипащэу К. Морозовам зэнэкъо­къум зыфигъэхьазырыгъ.

— Кристина Морозовар Адыгэ къэралыгъо университетым физкультурэмрэ дзюдомрэкIэ и Институт щеджэ, — къытиIуагъ Адыгэ Республикэм испорт еджа­пIэу N 2-м ипащэу, Урысыем, Адыгэ Республикэм язаслуженнэ тренерэу Хъот Юныс. — Москва щызэхащэгъэ зэнэкъокъум къэралыгъо 19 хэлэжьагъ. Кристина Морозовам дунэе спор­тышхом гъэхъагъэу щишIырэр къэралыгъо гъэпсыкIэ иIэу Адыге­ир зыпсэурэр илъэси 100 зэрэ­хъурэм фегъэхьы.