Неущрэ мафэр зыIэ илъхэу, республикэм, къэралыгъом хэхъоныгъэхэр ашIынымкIэ гугъапIэхэр ныбжьыкIэхэр ары.
Ахэм ядунэееплъыкIэ, шIэныгъэу зэрагъэгъотырэм, пIуныгъэ-гъэсэныгъэу апагъохырэм елъытыгъэр макIэп. Адыгеим мы лъэныкъом мэхьанэшхо щыраты. АР-м и ЛIышъхьэу КъумпIыл Мурат ныбжьыкIэхэм ягъогу къыхахыным, яшIэныгъэхэм ахагъэхъоным фэIорышIэрэ Iофтхьабзэхэр тишъолъыр зэрэщызэхащэхэрэм ынаIэ лъэшэу тет.
Лъэныкъо зэфэшъхьафхэмкIэ сэнаущыгъэ ин зыхэлъэу, шIэныгъэм имызакъоу, общественнэ IофшIэнхэм чанэу ахэлажьэхэу, республикэ, урысые зэнэкъокъухэм текIоныгъэ, хагъэунэфыкIырэ чIыпIэхэр къащыдэзыхыхэу, Адыгеим ыцIэ чыжьэу зыгъэIурэ ныбжьыкIэу тиIэр макIэп.
Илэгъухэм ящысэтехыпI
Хьабый Айтэч Адыгэ къэралыгъо университетым социальнэ технологиехэмкIэ ыкIи зекIонымкIэ ифакультет ия 3-рэ курс щеджэ. Апэрэ мафэм къыщегъэжьагъэу общественнэ Iофтхьабзэхэм чанэу ахэлажьэ.
Мы апшъэрэ еджапIэмкIэ «НыбжьыкIэхэм я Урысые Союз» зыфиIорэм истуденческэ клуб ипащ, лъым итынкIэ апэрэ сатырхэм ахэт. Джащ фэдэу «Красный крест» зыфиIорэ организацием и Адыгэ шъолъыр отделение иинструктор шъхьаI.
— Еджэным нэмыкIэу общественнэ IофшIэныр лъэшэу сшIогъэшIэгъон. БэмышIэу, Урысыем и Мафэ ехъулIэу, джэгукIэ гъэшIэгъон ныбжьыкIэхэм афызэхэтщэгъагъ. Джы футболымкIэ республикэ зэнэкъокъум зыфэтэгъэхьазыры. Ар бэдзэогъум и 2-м МКъГТК-м щызэхащэщт. «Красный крестым» илъэс пчъагъэ хъугъэу зэхищэрэ Iофтхьабзэхэм сахэлажьэ. Нэбгырэ пэпчъ апэрэ IэпыIэгъоу цIыфым епшIылIэщтыр ышIэн фаеу сэлъытэ, сыда пIомэ псауныгъэм икъызэтегъэнэжьынкIэ ащ мэхьанэ ин иI. КIэлэеджакIохэм ыкIи студентхэм узэрэзекIон фаер къафэтэIуатэ, — еIо Айтэч.
КIэлэ ныбжьыкIэр ыпэкIэ маплъэ, апшъэрэ еджапIэм имагистратурэ чIэхьажьын гухэлъ иI, ащ нэмыкIэу зыщеджэрэ апшъэрэ еджапIэм ыкIи республикэм ащызэхащэхэрэ общественнэ Iофтхьабзэхэри IэкIыб ышIыщтхэп.
Студент пэрытхэм ащыщ
ГъукIэлI Альбинэ ицIыкIугъом къыщегъэжьагъэу илэгъухэм къахэщэу, пшъэшъэ чанэу щыт. Гурыт еджапIэм джыри щеджэзэ Iофтхьэбзэ зэфэшъхьафхэм, общественнэ IофшIэнхэм игуапэу ахэлажьэу щытыгъ. Адыгэ къэралыгъо университетым естествознаниемкIэ ифакультет иапэрэ курс пшъэшъэжъыем къыухыгъэ къодый нахь мышIэми, апшъэрэ еджапIэм исистемэ чанэу хэуцуагъ.
— 2015-рэ илъэсым къыщегъэжьагъэу кIэлэеджакIохэм я Урысые движение сыхэтыгъ. Ар лъэшэу сшIогъэшIэгъоныгъ. Апшъэрэ еджапIэм истудентхэм япрофсоюз орга-низацие сыхэхьагъ. ТифакультеткIэ профбюром сырипащ. БэмышIэу Урысые зэнэкъокъоу «Студенческий Лидер 2022-рэ» зыфиIорэм сыхэлэжьагъ ыкIи хагъэунэфыкIырэ чIыпIэ къыщыдэсхыгъ. НыбжьыкIэ форумэу тиапшъэрэ еджапIэ, республикэм щызэхащэхэрэм сахэлажьэ, — еIо Альбинэ.
Пшъэшъэжъые нэутхэм гъэхъэгъэшIухэр ыпэкIэ зэришIыщтым егупшысэ. Медиасферэм ыкIи ныбжьыкIэ политикэм ищыIэныгъэ гъогу арипхыныр имурад.
«ТишIуагъэ ядгъэкIыныр типшъэрылъ»
Гъурыжъ Дарихъан Адыгэ къэралыгъо университетым педагогикэмкIэ ыкIи психологиемкIэ ифакультет мы илъэсым къеухы. Пэублэ классхэмкIэ кIэлэегъэджэ сэнэхьат ащ зэригъэгъотыгъ.
Коронавирусыр къызежьагъэм къыщегъэжьагъэу «Колл-гупчэм» иоператэрэу Дарихъан Iоф ешIэ. Зэпахырэ узым пэшIуекIогъэным иIахьышIу хилъхьагъ. Волонтерскэ Iофтхьабзэу «Мы вместе» зыфиIорэм зэрэхэлэжьагъэм фэшI УФ-м и Президент и ШIэжь медаль къыфагъэшъошагъ. АР-м псауныгъэм икъэухъумэнкIэ и Министерствэ и Щытхъу тхылъ къыратыгъ. 2022-рэ илъэсым «Волонтерское движение» зыфиIорэ лъэныкъомкIэ студент анахь дэгъу хъугъэ.
— Апшъэрэ еджапIэм сыкъызычIэхьагъэм къыщегъэжьагъэу еджэн закъом нэмыкIэу Iофтхьэбзэ зэфэшъхьафэу зэхащэхэрэм сахэлэжьэныр сикIас. Пандемиер къызежьэм сэ сишIоигъоныгъэкIэ «Колл-гупчэм» сыIухьагъ. Телефоныр зэпымыоу цIыфэу гуIэхэр къытеощтыгъэх, нэбгырэ пэпчъ уишIуагъэ ебгъэкIынэу уфай. Джащ фэд, узыр зэпамыхыжьыным фэшI гъунэпкъэ хэхыгъэхэр загъэуцухэм, цIыфхэм анахь ящыкIэгъэщт гъомылапхъэхэр афащэщтыгъэх. Ахэм яугъоин мэзэ заулэрэ сыхэлэжьагъ. ТыкъэсымэджэнкIэ тыщынэщтыгъэ, ау нэжъ- Iужъхэм, IэпыIэгъу зищыкIагъэхэм тишIуагъэ ядгъэкIын зэрэфаер тыгу илъыгъ, ар типшъэрылъмэ ахахьэ», — еIо Дарихъан.
Пшъэшъэжъыем апшъэрэ еджапIэр къыухыгъ. Джы магистратурэм чIэхьажьын гухэлъ иI. Гурыт еджапIэм Iоф щишIэн мурад иI. Практикэр зехьым ыуж сабыйхэм ахэтынэу ыгукIэ зэрэфаер къыгурыIуагъ.
Урысые Универсиадэм хэлэжьэщт
Адыгэ къэралыгъо университетым физическэ культурэмкIэ ыкIи дзюдомкIэ и Институт ия 5-рэ курс щеджэрэ Кристина Дюбинам тхэквондомкIэ текIоныгъэ къыдихыгъ ыкIи Ульяновскэ щызэхащэщт аужырэ зэнэкъокъум хэлэжьэщт.
Кристина Дюбинар спортымкIэ мастер. 2016-рэ илъэсым къыщегъэжьагъэу Урысыем ихэшыпыкIыгъэ командэ хэт. Урысыем ичемпионат (2015 — 2017-рэ илъэсхэм) джэрз медаль къыщыфагъэшъошагъ. 2021-рэ илъэсым я VII-рэ Урысые гъэмэфэ Универсиадэм тхэквондомкIэ апэрэ чIыпIэ къыщыдихыгъ.
2022-рэ илъэсым я VIII-рэ Урысые гъэмэфэ Универсиадэм иаужырэ зэнэкъокъу мэкъуогъум и 20-м къыщегъэжьагъэу бэдзэогъум и 20-м нэс Урысыем ишъолъыри 6-мэ ащыкIощт. Ульяновскэ ар мэфэкI шIыкIэм тетэу бэдзэогъум и 3-м къыщызэIуахыщт. Спортсмен 900 фэдиз ащ хэлэжьэнэу агъэнафэ.
НэкIубгъор зыгъэхьазырыгъэр ДЕЛЭКЪО Анет.