ЧIыопс паркэу «Тхьачышхо» зыфиIорэм Iофтхьабзэу «Чистый лес, чистый родник» щызэхащэгъагъ.
АР-м тыкъэзыуцухьэрэ дунаим икъэухъумэнкIэ ыкIи чIыопсым икъэкIуапIэхэмкIэ и ГъэIорышIапIэ Iоф щызышIэхэрэр, Адыгэ къэралыгъо ыкIи Мыекъопэ къэралыгъо технологическэ университетхэм якIэлэегъаджэхэр, ястудентхэр, «НАБУ-Кавказ» зыфиIорэ Гупчэм иволонтерхэр ащ хэлэжьагъэх.
ЧIыопс паркым ипащэу Шэуджэн Инвер къызэриIуагъэмкIэ, Iофтхьабзэр мэфитIурэ кIуагъэ. Селоу Новопрохладнэм апэ щызэрэугъоихи, етIанэ купитIоу загощыгъагъ. Зым чIыпIэу «Тайвань» зыфиIорэм зыгъэпсэфыпIэу иIэхэр къыгъэкъэбзагъэх. ЯтIонэрэ купым «Юбилейный», «Шестаков» зыфиIорэ чылхэм адэжь зекIоу къакIохэрэм яуцупIэхэм хэкIыр къащиугъоигъ. Iэмэ-псымэу ящыкIэгъэщтхэр вездеходхэмкIэ зэращагъ, чэщырэ чэтэн гъэIагъэхэм ачIэлъыгъэх.
Iофтхьабзэм хэлэжьагъэхэм пстэумкIи дзыо 11 хэкIэу къаугъоигъ. Ахэр Новопрохладнэм къыращэлIэжьи, ООО-у «ЭкоЦентрэм» иавтомашинэхэм дащыжьыгъэх.