Проектэу «Билет в Будущее» зыфиIорэр 2019-рэ илъэсым къыщегъэжьагъэу УФ-м и Президентэу В.В. Путиным иунашъокIэ зэхащэ. Лъэпкъ проектэу «Гъэсэныгъэм» ифедеральнэ проектэу «Успех каждого ребенка» зыфиIорэм ар хэхьэ.
Гуманитар ПроектхэмкIэ Фондыр 2022-рэ илъэсым проектэу «Билет в Будущее» зыфиIорэм ифедеральнэ оператор хъугъэ.
Адыгэ Республикэм ыцIэкIэ проектым хэлажьэрэр кIэлэцIыкIухэм гъэсэныгъэ тедзэ зыщарагъэгъотырэ республикэ Гупчэр ары.
Адыгеим проектыр щыIэныгъэм зыщыпхыращырэ уахътэм къыкIоцI ныбжьыкIэ нэбгырэ 5500-рэ хэлэжьагъ. Республикэм ис кIэлэеджакIохэм нахьыжъхэр яIэпыIэгъухэу яшIэныгъэхэм ахагъэхъуагъ. Проектэу «Билет в Будущее» зыфиIорэм ишIуагъэкIэ кIэлэеджакIохэм ящыIэныгъэ гъогу зэрапхыщт сэнэхьатым икъыхэхын нахь IэшIэх къафэхъу.
Проектым джырэкIэ анахь къыхахырэ сэнэхьатыбэ къыделъытэ. Мыщ фэдэ Iофтхьабзэ республикэм зэрэщызэхащэрэм мэхьэнэ ин зэриIэм щэч хэлъэп. Ащ шIуагъэу пылъыр кIэлэегъаджэхэм къаIо.
Къадыр Фатим, лицееу N 19-м икIэлэегъадж:
— Гъэхъэгъэ инхэр зышIырэ ыкIи цIыф къызэрыкIо пэпчъ кIэлэегъаджэ ыкIыб дэт. КIэлэцIыкIум идунэееплъыкIэ, цIыфыгъэ хэлъыным ицIыкIугъом къыщегъэжьагъэу кIэлэегъаджэм Iоф адешIэ. Нэбгырэ пэпчъ сэнаущыгъэу хэлъым нахь зегъэушъомбгъугъэным тыпылъ. Джащ фэдэу кIэлэегъаджэ пэпчъ иIэпэIэсэныгъэ, ишIэныгъэхэр ыгъэфедэзэ сыд фэдэрэ лъэныкъуи хэкIыпIэ тэрэз къыфигъотын фае.
Ольга Петриенко, гимназиеу N 22-м икIэлэегъадж:
— КIэлэегъэджэ сэнэхьатымкIэ анахь мэхьанэ зиIэу слъытэрэр уишIэныгъэхэм ахэбгъэхъо зэпытын, ар кIэлэеджакIохэм ябгъэшIэжьын, нахь ашIогъэшIэгъон лъэныкъохэмкIэ Iоф адэпшIэн амал зэрэщыIэр ары.