Сэкъатныгъэ зиIэхэм ыкIи ветеранхэм яIофыгъохэмкIэ Советэу Адыгэ Республикэм и ЛIышъхьэ дэжь щызэхэщагъэм зичэзыу зэхэсыгъо мы мафэхэм иIагъ. Ар зэрищагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
Сэкъатныгъэ зиIэхэм ящыIэкIэ-псэукIэ нахьышIу шIыгъэным, ахэм ящыкIэгъэ Iэмэ-псымэхэр арагъэгъотыным пае ашIэрэ Iофыгъохэм Iофтхьабзэм ащытегущыIагъэх.
Къэралыгъо программэу «Формирование системы комплексной реабилитации и абилитации инвалидов, в том числе детей-инвалидов» зыфиIорэр щыIэныгъэм зэрэщыпхыращырэм къытегущыIагъ АР-м IофшIэнымкIэ ыкIи социальнэ хэхъоныгъэмкIэ иминистрэ игуадзэу Ирина Ширинар.
— УФ-м икъэралыгъо программэу «Доступная среда» зыфиIорэм къыдыхэлъытагъэу сэкъатныгъэ зиIэхэм, ахэм ахэхьэх кIэлэцIыкIу сэкъатхэри, щыIэныгъэм хэгъэгъозэгъэнхэм фытегъэпсыхьэгъэ системэм федеральнэ бюджетым щыщ ахъщэ субсидиеу къафатIупщынхэу щыт. Ащ къыхэкIыкIэ ищыкIэгъэ тхылъхэр 2020-рэ илъэсым тишъолъыр ыгъэхьазырыгъэх. ЗэрагъэнафэрэмкIэ, 2023-рэ илъэсым мы лъэныкъомкIэ республикэм субсидиеу сомэ миллиони 9-м ехъу, 2024-рэ илъэсым сомэ миллиони 6,6-рэ фэдиз къыфатIупщыщт. Федеральнэ субсидиер ыкIи республикэ бюджетым къыхэхыгъэ ахъщэр зэхэтэу сомэ миллион 16-рэ мини 143-рэ хъущт. Илъэсищым къыкIоцI тишъолъыр ар ыгъэфедэщт. Сэкъатныгъэ зиIэхэм ящыкIэгъэ Iэмэ-псымэхэм, техникэ зэфэшъхьафхэм якъэщэфын, ахэм яегъэджэн ыкIи нэмыкI хэушъхьафыкIыгъэ лъэныкъохэмкIэ ахъщэр гъэфедэгъэн фае. Сэкъатныгъэ зиIэ цIыфхэм ящыIэкIэ-псэукIэ нахьышIу шIыгъэныр, яцIыкIугъом къыщегъэжьагъэу ялэгъухэм ахэм адырагъэштэныр ары пшъэрылъ шъхьаIэу мыщ фэдэ программэхэм яIэр, — къыIуагъ Ирина Ширинам.
Урысые Федерацием социальнэ страхованиемкIэ и Фонд и Адыгэ республикэ Къутамэ ипащэ ипшъэрылъхэр зыгъэцэкIэрэ ПIатIыкъо Аслъан сэкъатныгъэ зиIэхэм техническэ Iэмэ-псымэхэр ащэфынхэм фэшI аратырэ электроннэ сертификатхэм къатегущыIагъ.
— Электроннэ сертификатым ишIуагъэкIэ сэкъатныгъэ зиIэ цIыфым къин ымылъэгъоу ищыкIэгъэ Iэмэ-псымэр зэригъэгъотын ылъэкIыщт. 2021-рэ илъэсым Iоныгъо мазэм къыщегъэжьагъэу ар къызытефэхэрэм аратэу аублагъ. Урысые Федерацием социальнэ страхованиемкIэ и Фонд 2021-рэ илъэсым электроннэ сертификат 219-рэ аритыгъ, 36-р агъэфедагъ. АдыгеимкIэ нэбгыри 7-мэ аштэнэу лъэIу тхылъ къатыгъ, 2-мэ ар агъэфедэ, — еIо ПIатIыкъо Аслъан.
Электроннэ сертификатыр зэрэгупсэфыр, ащ шIуагъэу пылъыр джыри икъу фэдизэу ашIэрэп. Ар бгъэфедэзэ, гущыIэм пае, костыльхэр, тхьакIумэм Iуалъхьэрэ аппаратыр ыкIи нэмыкIэу ящыкIэгъэщтхэу спискэм хахьэхэрэр къащэфынхэ алъэкIыщт. Унэм исхэу медицинэ Iэмэ-псымэхэр ыкIи тучанэу къызыщащэфыщтыр къыхахынхэ алъэкIыщт. Ащ ишIуагъэкIэ къэралыгъо IэпыIэгъур нахь IэшIэхэу къызфагъэфедэщт.
Сэкъатныгъэ зиIэм электроннэ сертификатыр къэралыгъо фэIо-фашIэхэмкIэ порталым, Урысые Федерацием социальнэ страхованиемкIэ и Фонд и Адыгэ республикэ Къутамэ къащыдахын алъэкIыщт. Зыщыщыр къэзыушыхьатырэ документ, лъэIу тхылъ ыкIи картэу «Мирым» иреквизитхэр ары ныIэп ищыкIагъэхэр.
Джащ фэдэу сэкъатныгъэ зиIэхэм автомобилыр афыным пае егъэджэнхэр зэрэзэхащэхэрэм къытегущыIагъ АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр.
Советым изэхэсыгъо хэлэжьагъэхэр Iофыгъоу агъэнэфагъэхэм ахэплъагъэх, унашъохэр аштагъэх.
ДЕЛЭКЪО Анет.