Урысые Федерацием и Президентэу Владимир Путиным ипшъэрылъхэм атегъэпсыхьагъэу Урысыем и Президент иприемнэу Адыгэ Республикэм щыIэм тыгъуасэ цIыфхэр щыригъэблэгъагъэх Адыгеим и ЛIышъхьэу КъумпIыл Мурат.
Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, Адыгэ Республикэм ипрокурор ипшъэрылъхэр зыгъэцэкIэрэ Бэрэтэрэ Заур.
Iофыгъоу къаIэтыгъэхэр зыфэгъэхьыгъагъэхэр Iэзэгъу уцхэр аIэкIэгъэхьэгъэнхэр, гъогухэр шIыгъэнхэр, зэзэгъыныгъэхэм атегъэпсыхьагъэу предприниматель IофшIэныр езыгъэжьэгъакIэхэм къэралыгъо IэпыIэгъу ятыгъэныр ары. Iофыгъо пстэумкIи зэшIохыкIэ амалхэр къагъотыгъэх ыкIи пшъэрылъ гъэнэфагъэхэр афашIыгъэх.
ГущыIэм пае, Адыгеим и ЛIышъхьэ дыригъэштагъ сабыибэ зиIэ тым илъэIу фэгъэцэкIэгъэным. Сатыум ылъэныкъокIэ бизнес-планыр гъэпсыгъэным пае IэпыIэгъу ащ ратынэу пшъэрылъ афишIыгъ. Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч ащ пшъэрылъ фишIыгъ предприниматель Iофтхьабзэм изэшIохын къыкIэлъэIугъэм ишIуагъэ ригъэкIынэу, гупчэу «Сибизнес» зыфиIорэм иэкспертхэри ащ къыхигъэлэжьэнхэу. Социальнэ контрактым тегъэпсыхьагъэу къэралыгъо IэпыIэгъум унагъор кIэдэунымкIэ амал иI. Мыщ дэжьым къэIогъэн фае анахь ахъщабэу аратын алъэкIыщтыр сомэ 250000-м зэрэшIомыкIырэр.
Адыгеим и ЛIышъхьэ къалэу Мыекъуапэ щыпсэурэ бзылъфыгъэм медицинэ IэпыIэгъу фэхъунхэм иIофыгъо ипIалъэм зэшIохыгъэ хъунэу пшъэрылъ афишIыгъ. Врачхэм зэрагъэунэфыгъэмкIэ, лъэшэу лъапIэу щыт уцыр ащ ищыкIэгъэ шъыпкъэу щыт.
Джыри зы лъэIу тхылъ къыхэдгъэщыщт, ар зэпхыгъэр урамэу Республиканскэм игъогу ишIын ары. Къалэу Мыекъуапэ икъокIыпIэ микрорайон цIыфхэр зычIэсыщтхэ унэхэр бэу зэрэщашIыхэрэм ар епхыгъ.
Адыгэ Республикэм и ЛIышъхьэ пшъэрылъ зэрафишIыгъэм тетэу километрэ 1,4-рэ зикIыхьэгъэщт гъогоу мыжъуакIэ зытетэкъогъэщтым ишIынкIэ унашъо аштагъ. Унэгъо 78-рэ фэдиз зыщыпсэурэ чIыпIэм екIолIэгъэным пае ар ашIыщт. Адыгэ Республикэм гъогухэмкIэ ифонд мылъкур къыхагъэкIынэу ары зэрэрахъухьагъэр.
Мыекъуапэ имэрэу Геннадий Митрофановым къызэриIуагъэмкIэ, мы лъэхъаным проект-сметнэ документациер зэхэгъэуцогъахэу щыт, къэралыгъо экспертизэр ашIыщт. Джащ фэдэу мы илъэсым аукционыр зэхащэщт ыкIи псэолъэшI-монтаж IофшIэнхэр агъэцэкIэщтых.
Адыгеим и ЛIышъхьэ къалэу Мыекъуапэ икъокIыпIэ лъэныкъо изэтегъэпсыхьан иIофыгъо лъэшэу анаIэ тырадзэнэу пшъэрылъ къыгъэуцугъ. Республикэм ихэбзэ къулыкъухэм а чIыпIэм нахь хэхъоныгъэ ышIынымкIэ зэшIохыгъэн фэе Iофтхьабзэхэр агу къыгъэкIыжьыгъэх, сабыибэ зэрыс унагъохэм унэхэр щашIынхэм пае инфраструктурэм игъэпсынкIи зэшIуахын фаехэр къыгъэнэфагъэх.
«Iофыгъоу къаIэтыгъэ пстэуми кIэухышIухэр зэрафэхъущтхэм игугъапIэ щыI. Урысые Федерацием и Правительствэ, партиеу «Единэ Россием» цIыфхэм IэпыIэгъу ятыгъэнымкIэ Iофышхоу агъэцакIэрэр республикэм игъэцэкIэкIо хабзэ икъулыкъухэми яIофшIэн къыхэщы. А IофшIэныр зытегъэпсыхьагъэр цIыфхэм ящыIакIэ нахьышIу шIыгъэныр ары», — къыIуагъ КъумпIыл Мурат.
ИкIэухым лъэIу тхылъ пэпчъ Iофэу дашIэщтымкIэ пшъэрылъхэр АР-м и ЛIышъхьэ афишIыгъэх, пIалъэу гъэцэкIагъэ зыщыхъущтхэри, пшъэдэкIыжь зыхьыщтхэри къыгъэнэфагъэх.
АР-м и ЛIышъхьэ ипресс-къулыкъу
Сурэтыр А. Гусевым тырихыгъ.