Я XIII-рэ Дунэе фестиваль-зэнэкъокъоу «Адыгеим ижъогъожъыехэр» мэкъуогъум и 16 — 19-м Мыекъуапэ щыкIуагъ.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм, Урысыем щыпсэурэ лъэпкъхэм яискусствэрэ якультурнэ кIэнрэ я Илъэсэу мыгъэ зэрэщытым, Адыгэ Республикэм икъэралыгъо программэу «Культурэм хэхъоныгъэ ышIыныр» зыфиIорэм афэгъэхьыгъэу зэнэкъокъоу «Адыгеим ижъогъожъыехэр» зэхащагъ.
Адыгэ Республикэм культурэмкIэ и Министерствэ, АР-м лъэпкъ культурэмкIэ и Гупчэ Дунэе фестивалым кIэщакIо фэхъугъэх.
«Адыгеим ижъогъожъыехэм» япроект сэнаущыгъэ зыхэлъ кIэлэцIыкIухэр, ныбжьыкIэхэр илъэс къэс зэфещэх.
Хэлэжьагъэхэр
Илъэси 6 — 22-рэ зыныбжьхэр Дунэе зэнэкъокъу-фестивалым хэлэжьагъэх. IэкIыб къэралыгъуи 8-мэ яныбжьыкIэхэм ясэнаущыгъэ, искусствэм фыщытыкIэу фыряIэр къагъэлъэгъуагъ.
Тыркуер, Белоруссиер, Иорданиер, Молдовэр, Израиль, Босниер ыкIи Герцеговинэр, Сербиер, Казахстан заочнэ шIыкIэм тетэу фестивалым хэлэжьагъэх. Урысыем ишъолъырхэу Къэбэртэе-Бэлъкъарым, Къэрэщэе-Щэрджэсым, Дагъыстан, Ингушетием, Къалмыкъым, Краснодар краим, Ростов хэкум, Адыгеим якIэлэцIыкIухэмрэ ныбжьыкIэхэмрэ очнэ шIыкIэм тетэу заушэтыгъ.
КъафэгушIуагъ
Адыгэ Республикэм культурэмкIэ иминистрэу Аулъэ Юрэ ти ЛIышъхьэу КъумпIыл Мурат, Правительствэм ацIэкIэ Дунэе фестиваль-зэнэкъокъум хэлажьэхэ-
рэм къафэгушIуагъ. Сэнаущыгъэ зыхэлъ кIэлэцIыкIухэмрэ ныбжьыкIэхэмрэ фестивалым зэрэзэфищэхэрэм мэхьэнэ ин иIэу ылъытагъ, зэнэкъокъум гъэхъагъэ щашIынэу афиIуагъ.
IэкIыб къэралхэм ащыпсэурэ нэбгыри 152-рэ, Урысыем ишъолъырхэм къарыкIыгъэ ныбжьыкIэ 80, Адыгеим щыщхэу 173-рэ фестивалым щызэнэкъокъугъ.
ШIухьафтын шъхьаIэр
Зэнэкъокъум икIэуххэр осэшI купым зэфихьысыжьыгъэх. КIэлэцIыкIу орэдыIо-эстраднэ зыгъэсапIэу «Радугэм» щеджэрэ Саркис Сарьян шIухьафтын шъхьаIэу Гран-прир фагъэшъошагъ. Адыгэ Республикэм культурэмкIэ изаслуженнэ IофышIэу Елена Щербак зыгъэсапIэм ипащ.
— Дунэе фестивалыр зэнэкъокъу къодыеу щытыгъэп. Зэхахьэр бэмэ еджапIэ афэхъугъ. ЗэхэщакIохэм лъэшэу тафэраз, — къытиIуагъ Елена Щербак.
Адыгэ Республикэм культурэмкIэ иминистрэ игуадзэу, Адыгеим изаслуженнэ журналистэу Кушъу Светланэ Саркис Сарьян фэгушIуагъ. Дипломыр, Кубокыр, сомэ мин 30-р шIухьафтын фишIыгъэх.
«Лауреат» зыфиIорэ щытхъуцIэр зэнэкъокъум хэлэжьэгъэ ныбжьыкIэ 48-мэ афагъэшъошагъ.
Iэнэ хъураем зэфэхьысыжьхэр щашIыгъэх. ЗэкIэ зэнэкъокъум хэлэжьагъэхэм нэпэеплъ шIухьафтынхэр афашIыгъэх.
Музыкальнэ Iэмэ-псымэхэмкIэ орэдышъор къезыгъэIуагъэхэм якуп Тыгъужъ Джэнэт апэрэ чIыпIэр къыщыдихыгъ, пшъэшъэжъыер Аскъэлае щыщ, пащэр Еутых Къадырхъан. ГъукIэлI Дианэ ятIонэрэ чIыпIэр ыхьыгъ, ГъукIэ Замудин ипащэу Мыекъуапэ щеджэ.
Улапэ иансамблэу «Нур» зыфиIорэм апэрэ чIыпIэр фагъэшъошагъ. Адыгэ музыкальнэ Iэмэ-псымэхэмкIэ кIэлэеджакIохэм орэдышъор агъэжъынчыгъ.
КъэшъокIо ансамблэхэм язэнэкъокъу илъэси 6 — 9 зыныбжьхэр хэлэжьагъэх. Апэрэ чIыпIэр Пэнэхэс зыщызыгъасэхэрэм къыдахыгъ, пащэр Мерэмыкъо Элан. Илъэси 10 — 15 зыныбжьхэм якуп Кощхьэблэ районым щыщхэу Алыбэрд Махьмудэ зипащэм текIоныгъэр къыщыдихыгъ. Иорданием иансамблэу «Бгырысбынхэ» зыфиIорэмрэ, пащэр Умар Сэлам, Мыекъуапэ иансамблэу «Зэрдахэмрэ», пащэр Дэбагъо Фатим, ятIонэрэ чIыпIэхэр ахьыгъэх.
ОрэдыIохэм язэнэкъокъу Казахстан, Ингушетием, Адыгеим яныбжьыкIэхэм, нэмыкIхэм хагъэунэфыкIырэ чIыпIэхэр къыщахьыгъэх. Адыгеим щагъасэхэрэ Арина Акопян, Яна Щербак, Александра Зубковам, Къуанэ Миланэ, Татьяна Тарюхинам, Юлиана Гордиенкэм, Шахсане Акматалиевам, Гъуашъо Аминэ, Виктория Смычник, Даниил Теницкэм, Валерия Бавиновам, нэмыкIхэм тагъэгушIуагъ, щытхъуцIэхэр къахьыгъэх.
Мыекъопэ районым иансамблэу «Кубаночкэм» апэрэ чIыпIэр къыдихыгъ, пащэр Адыгэ Республикэм культурэмкIэ изаслуженнэ IофышIэу Полина Мокрова.
Зэнэкъокъоу «Адыгеим ижъогъожъыехэм» зеушъомбгъу. НахьыпэкIэ фестивалым хэлэжьагъэхэ Апэнэс Астемир, Быщтэкъо Азэмат, Дзыбэ Мыхьамэт, Дзыбэ Фатимэ, ансамблэхэу «Казачатэр», «Мыекъуапэ инэфылъэхэр», фэшъхьафхэри Урысыем, IэкIыб хэгъэгухэм ащызэлъашIэх. Тинепэрэ ныбжьыкIэхэм щысэ зытырахын яI, искусствэм лъагэу зыщаIэтынэу афэтэIо.
ЕмтIылъ Нурбый.
Сурэтхэм арытхэр: «Радугэм» зыщызыгъасэхэрэр.