Кинотеатрэхэр непэрэ мафэм къиныгъо хэтых. Урысыем къытыралъхьэгъэ санкциехэм апкъ къикIэу IэкIыбым щытырахырэ фильмхэр къаIэкIэхьажьхэрэп.
Арэу щытми, хэкIыпIэхэм алъэхъух, яIофшIэн зэрэлъагъэкIотэщтым егупшысэх. Экспертхэм зэралъытэрэмкIэ, онлайн- кинотеатрэхэм зыми темышIыкIыгъэ проектхэр къагъэлъагъо зыхъукIэ ар хэкIыпIэу хъун ылъэкIыщт. Ау а шIыкIэр кIэ ыкIи ар зэтебгъэпсыхьаным пае уахътэ ищыкIагъ.
«Урысые гъэзетым» къызэритырэмкIэ, 2022-рэ илъэсым тыгъэгъазэм нэс мы индустрием миллиард 11,5-рэ чIэнагъэ ышIын ылъэкIыщт. Кинотеатрэхэр зыгъэлажьэхэрэм я Совет и Ассоциацие хэтэу Алексей Воронковым къызэриIорэмкIэ, анахь гумэкIыгъоу къэуцурэр илъэсныкъом къыкIоцI мылъкоу къалэжьырэр икъу фэдизэу Iоф ашIэнымкIэ зэрафимыкъурэр ары. Кредит ахъщэкIэ гумэкIыгъор дэгъэзыжьыгъэ хъун ылъэкIыщтэп, сыда пIомэ кином къэралыгъо IэпыIэгъу егъэгъотыгъэнымкIэ программэм къыдыхэлъытагъэу бэмышIэу кинотеатрэхэм кредитхэр къырахыгъэх. Джырэ лъэхъан кредит пштэныр IэшIэхэп, процент инхэри иIэх. ЧIэнагъэ зэрашIырэм лъапсэу иIэхэм ащыщых гъэмэфэ-бжыхьэ лъэхъаным къагъэлъэгъон бэу зэрямыIэр. Хабзэ зэрэхъугъэу, урысыем щытырахыгъакIэхэр илъэсыкIэм ехъулIэу къагъэлъагъох. 2022-рэ илъэсым бжыхьэм ыкIэм нэс хэкIыпIэхэр къагъотызэ Iоф ашIэн фае.
Кинотеатрэхэм IэпыIэгъу афэхъуным фэшI сомэ миллиарди 6,5-рэ Минфиным къафитIупщынэу кIэлъэIугъэх, ау къаратыгъэп. Санкциехэм ялъэхъан урысые экономикэм хэхъоныгъэ ышIынымкIэ кинотеатрэхэм яIофшIэн анахь мэхьанэ зиIэхэм ащымыщэу Министерствэм ылъытагъ. Бэ темышIэу Президентым культурэмкIэ иупчIэжьэгъоу Владимир Толстоим кинотеатрэхэм IэпыIэгъу зэряIэщтыр къыIуагъ. УФ-м культурэмкIэ и Министерствэрэ «Фонд кино» зыфиIорэмрэ мы Iофыгъор зэрэзэхафырэр къыкIигъэтхъыгъ.
Мыекъуапэ дэт кинотеатрэхэр мы мафэхэм къиныгъоу зыхэтхэр зэдгъэшIагъ. Къэлэ гупчэм анахь инэу итхэм ащыщ JoY Land ыкIи ТРЦ-у «Майкоп Моллым» къычIагъэуцогъэ «Айко CINEMA».
КъэтэшIэжьы лъэхъан мыхэм цIыфхэр ачIэмыфэжьхэу зэрачIэсыщтыгъэхэр. Ау мы аужырэ илъэсхэм яIоф нахь къин хъугъэ. Коронавирусым ыпкъ къикIыкIэ ахэр зэфашIыхэуи къыхэкIыгъ, къызызэIуахыжьхэми цIыфэу къякIуалIэрэр нахь макIэ зэхапшIэу хъугъагъэ. Джы гъэтхэпэ мазэм къыщегъэжьагъэу голливуд студие анахь инхэу Universal, Disney, Warner Bros, Sony, Paramount зыфиIохэрэм Урысыем Iоф зэрэдамышIэжьырэм иягъэ къэкIуагъ, сыда пIомэ кинотеатрэхэм къащагъэлъагъохэрэм янахьыбэр мыхэм аубытыщтыгъэ. Ахэр нэмыкIхэмкIэ зэблэхъугъэныр IэшIэх хъущтэп. Ащ къыхэкIыкIэ ахъщэу къалэжьырэр нахь макIэ хъугъэ.
ЫпэкIэ Iоф зэрашIэщтыгъэм фэдэу джы цIыфхэр бэу къызэрэмыкIожьхэрэм тыщигъэгъозагъ «Майкоп Моллым» къыщызэIуахыгъэ «Айко CINEMA» ипащэу Бэгъушъэ Иринэ. ЦIыфхэм анахь агу рихьэу зэплъыщтыгъэхэр джы къагъэлъэгъонхэу къаратыжьхэрэп.
— IэкIыбым къыщыдагъэкIырэ фильм горэхэр джыри къытIэкIахьэх, къэтэгъэлъагъох, ау цIыфхэм анахь агу рихьэу, формат дэгъу зиIэхэр джырэкIэ зэпыугъэх. Анахьэу боевикхэр ыкIи Урысыем щытырахыгъэхэр ары къэдгъэлъагъохэрэр. ХэкIыпIэхэр къэтэгъотых, анахь гъэшIэгъонхэр къыхэтэхых. Мэфэку къэс тиспискэ кIэхэр къыхэтэгъахьэх, — еIо Иринэ.
Мэкъуогъум и 16-м къыщегъэжьагъэу «Бультерьер», «Время патриотов», «Экстрасенс. Дело Софии», «Криминальный город 2» ыкIи нэмыкIхэр кIэу къагъэлъэгъонхэу аублагъ. Джащ фэдэу кIэлэцIыкIухэм апайи мультфильмэ зэфэшъхьафхэр къагъэлъагъох. Сыхьатыр 10-м къыщегъэжьагъэу чэщым 12-м е 1-м нэс Iоф ашIэ. Билетхэм ауасэ соми 170-м къыщыублагъэу 350-м нэс. Ащ нэмыкIэу зэгъусэу къакIохэрэм фэгъэкIотэнхэр яIэх. Непэ 2Д форматым тетэу къаIэкIэхьэрэ фильмхэр къагъэлъагъох. Ар ежь фильмыр зэрэтырахырэм елъытыгъ. ЫпэкIэ 3Д форматыр нахь къебэкIыщтыгъэ.
Электроннэ шIыкIэм тетэу унэм уисэу къагъэлъэгъощтхэм защыбгъэгъозэн ыкIи билетыр пщэфын амал щыI.
Непэ Урысыем къытыралъхьэгъэ санкциехэм къахэкIэу гумэкIыгъохэр къэуцух. Шъыпкъэ, ахэм уапэшIуекIоным пае уахътэ ищыкIагъ, ау хэкIыпIэ къызэрагъотыщтым, гумэкIыгъохэр дэгъэзыжьыгъэ зэрэхъущтхэм тицыхьэ телъ.
ДЕЛЭКЪО Анет.