Анахь дэгъухэм ахалъытагъ

«Урысыем илъэсым ихъугъэ-шIэгъэ анахь дэгъухэр» зыфиIорэ зэнэкъокъум адыгэ къуаем ифестиваль хэлэжьагъ. Ар зэхэзыщагъэр — EventsInRussia.com.

Мыщ иофициальнэ портал илъэ­сым ихъугъэ-шIагъэхэм я Лъэпкъ мэфэпчъ цIыфхэм ыкIи экспертхэм амакъэ зыфатыгъэхэу текIоныгъэ къыдэзыхыгъэхэр къыщы­хаутыгъэх.

Мы илъэсымкIэ ахэм ахэфагъ адыгэ къуаем ишъолъыр фестиваль. Пандемием ыуж мыгъэ мэфэкI шIыкIэм тетэу ар рагъэкIо­кIыгъ. Илъэс къэс мыщ хэла­жьэ­хэрэм япчъагъэ нахьыбэ мэхъу.

Шъугу къэдгъэкIыжьын, адыгэ къуаер республикэм ибренд. Дунаим къое зэмылIэужыгъо минищ фэдиз къыщыдагъэкIы. Ахэм ащыщэу зыпэпшIын щымыIэ адыгэ къуаем идэгъугъэкIэ ыцIэ чыжьэу зэрэIугъэм уимыгъэгушхон плъэ­кIырэп. «Урысыем иIэшIугъакIэхэр» зыфиIорэ апэрэ лъэпкъ зэнэкъо­къум адыгэ къуаем ятIонэрэ чIыпIэр къыщыдихыгъ ыкIи лъэныкъоу «Зэрэкъэралыгъоу» зыфиIорэмкIэ хагъэунэфыкIырэ чIыпIищыр къыдэзыхыгъэхэм ахэфагъ. Фестивалыр анахь мэхьанэшхо зиIэ Iоф­тхьабзэхэм ахалъытагъ.

Коммуникацие жъугъэхэм ягуп­чэу «Рейтинг» зыфиIорэм ышIыгъэ ушэтынхэм къызэрагъэлъэгъуагъэм­кIэ, Адыгеим зекIо къакIохэу зэ­упчIыгъэхэм япроцент 73-м адыгэ къуаер ашхы ашIоигъу, процент 89-м Адыгеим игугъу къызашIыкIэ ыцIэ къуаем рапхы.