БэнэкIо ныбжьыкIэхэм яушэтынхэр

Хэгъэгум икIэлэеджакIохэм якIэух Спартакиадэ мэкъуогъум и 21 — 23-м Ермэлхьаблэ щызэхащэщт.

СамбэмкIэ бэнакIохэр зэнэкъокъущтых. Къыблэ шъолъырым изэIукIэгъухэм апэрэ чIыпIэхэр къащыдэзыхыгъэ тиспортсменхэр Адыгэ Республикэм ыцIэкIэ Спартакиадэм хэлэжьэщтых.

Кушъу Тамерлан, кг 49-рэ, Хьакъуй Эльдар, кг 53-рэ, Апыщэ Ислъам, кг 58-рэ, Хьатхъохъу Рустам, кг 64-рэ, Мэлыщэ Аскэр, кг 88-м къехъу, алырэгъум щыбэнэщтых.
Тренерхэу Гъомлэшк Алый, Шъэумэн Байзэт, Ацумыжъ Руслъан нарт шъаохэм япащэхэу самбэм фагъасэх.

— Урысыем икIэлэеджакIохэм я Спартакиадэ тиныбжьыкIэхэм ушэтыпIэшIу афэхъущт, — къытиIуагъ Адыгэ Рес­публикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адам. – Самбэр Олимпиадэ джэгунхэм ахагъэхьащт спорт лъэпкъхэм ащыщ. ТибэнэкIо ныбжьыкIэхэм яIэпэIэсэныгъэ ха­гъэхъонэу, Адыгэ Республикэм щытхъоу къыфахьырэр дунаим нахь лъагэу щаIэтынэу тэгугъэ.