Петербург щыкIорэ дунэе экономическэ форумэу стратегическэ инициативэхэмкIэ Агентствэм ипащэу Светлана Чупшевар зыхэлэжьагъэм Лъэпкъ рейтингым икIэуххэр къырахьылIагъэх. Урысые Федерацием ишъолъырхэм инвестициехэм алъэныкъокIэ язытет ащ къеушыхьаты. Шъолъыр 20 анахь дэгъухэм Адыгеир ахэхьагъ, я 13-рэ чIыпIэр ащ ыубытыгъ.
Шъугу къэтэгъэкIыжьы: Лъэпкъ рейтингым инвестициехэмкIэ Iофхэм язытет зыфэдэр, бизнесымкIэ амалышIухэр гъэунэфыгъэнхэм ыкIи гъэфедэгъэнхэм хабзэм иIофышIэхэм анаIэ зэрэтырагъэтырэр ащ къегъэлъагъо, шъолъыр пэпчъ инвестициехэр нахьыбэ шIыгъэнхэм зэрэдэлажьэрэм икIэуххэр, анахь къулайныгъэ ащкIэ зыхэлъхэр къеушыхьатых. Рейтингыр лъэныкъуиплIымэ атегъэпсыхьагъэу щыт: Iофтхьабзэхэм язэшIохын зыщыкIорэ чIыпIэр, бизнесымкIэ институтхэр, инфраструктурэр ыкIи бизнес цIыкIумрэ гурытымрэ IэпыIэгъу зэраратырэр. Предпринимательхэмрэ экспертхэмрэ яеплъыкIэхэр къыдалъытэхэзэ, джащ фэдэу статистикэр агъэфедэзэ ящыкIэгъэ къэбарыр къызIэкIагъахьэ.
Лъэпкъ рейтингым икIэуххэм къатегущыIэзэ, КъумпIыл Мурат къызэрэхигъэщыгъэмкIэ, республикэм инвестициехэм алъэныкъокIэ амалышIухэр иIэх, Урысые Федерацием и Президентэу Владимир Путиным къыгъэуцугъэ пшъэрылъхэм атегъэпсыхьагъэу ащ ихэхъоныгъэ лъыкIотэщт.
«Зигугъу къэтшIыгъэ пшъэрылъхэм ягъэцэкIэн Адыгеим щыпхырытщы зыхъукIэ лъэпкъ проектхэм, къэралыгъо программэхэм такъыпкъырэкIы, федеральнэ гупчэм къытырэ амалхэр зэкIэ тэгъэфедэх, стратегическэ инициативэхэмкIэ Агентствэм игъоу ылъэгъухэрэри тэгъэфедэх. ТиIофшIэнкIэ гъэхъагъэу тиIэхэри, щыкIагъэу тфэхъухэрэри тэлъэгъух. ИнвестициехэмкIэ Iофхэм язытет нахьышIу зэрэтшIыщтым ренэу тынаIэ тедгъэтыщт, ащ къыхэдгъэлэжьэщтых къулыкъу зэфэшъхьафхэр, ведомствэхэу ин- фраструктурнэ псэуалъэхэм яшIын зэпхыгъэу щытхэр. Республикэм инвестицие- хэр нахьыбэу къызэрихьащтхэм тынаIэ ренэу тедгъэтыщт», — къыIуагъ КъумпIыл Мурат.
Мы IофшIэным мэхьанэшхо иIэ зыхъугъэр санкциехэр нахьыбэ ашIыхэ зыщыхъугъэ лъэхъаныр ары. Хэгъэгум и Правительствэ Iофыгъоу къэуцухэрэр зэкIэ инэплъэгъу итых, амал зэриIэу ахэм язэшIохынкIэ унашъохэр ештэх. Республикэм ихэбзэ IофышIэхэм зэрахьэрэ Iофтхьабзэхэр зэкIэ зыфытегъэпсыхьагъэхэр бизнесым нахь зегъэушъомбгъугъэныр ыкIи нахь шIогъэ ин къегъэтыгъэныр ары. Инвестиционнэ проектышхохэми ар япхьылIэн плъэкIыщт.
Адыгеим и ЛIышъхьэ къызэрэхигъэщыгъэмкIэ, республикэм инвестиционнэ проект 25-рэ мы лъэхъаным щагъэцакIэ, сомэ миллиард 77-рэ фэдиз ахэм атефэ. Проектышхохэу непэкIэ анахь Iофышхо зыдашIэхэрэм ащыщых гъэпсэфыпIэу «Лэгъонакъэрэ» промышленнэ паркымрэ. А проектыр щыIэныгъэм гъэцэкIагъэ зыщыхъукIэ, инвестициехэмкIи, IофшIэпIэ чIыпIэхэмкIи, республикэм иIофхэм язытет нахьышIу хъущт.
АР-м и ЛIышъхьэ ипресс-къулыкъу