Дунаир къызыфабэу, уцхэр нахь къэкIынхэу зыфежьэкIэ, уз щынагъохэр зезыхьэрэ хьацIэ-пIэцIэ лъэпкъэу бамыкIым Адыгеим ичIыпIэхэм защиушъомбгъоу хабзэ. Ащ къыдыхэлъытагъэу, гъэтхапэм и 14-м къыщегъэжьагъэу бамыкIым зэрихьэрэ уз щынагъом икъыхэгъэщынкIэ Роспотребнадзорым и ГъэIорышIапIэу АР-м щыIэм тхьамафэ къэс уплъэкIун Iофтхьабзэхэр зэхещэх.
ГъэIорышIапIэм эпидемиологиемкIэ иотдел мэкъуогъум и 14-м ехъулIэу къыIэкIэхьэгъэ къэбарымкIэ, мы илъэсыр къызихьагъэм къыщегъэжьагъэу бамыкIыр къяцэкъагъэу нэбгырэ 228-мэ медицинэ учреждениехэм зафагъэзагъэх, ахэм ащыщэу 119-р илъэс 14 мыхъугъэ кIэлэцIыкIух. ИкIыгъэ илъэсым мыщ фэдэ иуахътэ ебгъапшэмэ, нэбгырэ 342-мэ бамыкIыр яцэкъагъэу агъэунэфыгъ, 151-р – кIэлэцIыкIух. ЗэрэхъурэмкIэ, мыгъэ процент 33,3-кIэ нахь макI.
БамыкIыр къыщяцэкъагъэу анахьыбэу зыщагъэунэфыгъэр Мыекъуапэ ыкIи Мыекъопэ районыр арых.
2022-рэ илъэсым щылэ мазэм и 11-м бамыкIыр ахэпкIагъэхэу апэрэ хъугъэ-шIагъэр атхыгъ. Мы мафэм ом изытет фэбагъэ.
Адыгэ Республикэм бамыкI лъэпкъ 24-у щагъэунэфыгъэхэм ащыщ бамыкI 205-у псауныгъэм иучреждениеу АР-м къэбзэныгъэмрэ эпидемиологиемрэкIэ и Гупчэ илабораторие щауплъэкIугъэхэм уз щынагъохэу «клещевой боррелиоз» ыкIи «гранулоцитарный анаплазмоз» зыфиIохэрэр къахагъэщыгъ. Ау къызэцэкъэгъэ цIыфхэм мы узхэр яIэхэу джыри агъэунэфыгъэп. БлэкIыгъэ илъэсхэм язэфэхьысыжьхэм узахаплъэкIэ, бамыкIыр къызэцэкъагъэхэм зэпахырэ узхэр къапыхьагъэхэу гъогогъуи 2 — 8 фэдиз илъэсым къыкIоцI къыхэкIы.
КъэIогъэн фае, бамыкIыр щынагъоу зэрэщытыр, ар цIыфым къызецакъэкIэ, зэпахырэ узхэр къеузынхэ зэрилъэкIыщтыр республикэм иэпидемиологхэм шъугу къагъэкIыжьы. Арышъ, бамыкIыр цIыфым къецэкъагъэмэ, псынкIэу медицинэм иIофышIэхэм зафигъазэмэ нахьышIу.
БамыкIхэм зэрахьэрэ узхэр нахь псынкIэу къыхэгъэщыгъэнхэм фэшI ахэр къызэцэкъагъэхэм афэгъэхьыгъэ къэбарыр псынкIэу алъагъэIэсы нэбгырэ пэпчъ зэпхыгъэ медицинэ учреждением, ахэм алъыплъэнхэм, учетым хагъэуцонхэм афэшI.
ЦIыфхэм япсауныгъэ къэухъумэгъэным, бамыкIхэм зэрахьэрэ узхэм ахэр ащыухъумэгъэнхэм афэшI Роспотребнадзорым и ГъэIорышIапIэу АР-м щыIэм унашъохэр ышIыгъэх. Ахэм къащыгъэнэфагъэх бамыкIхэм апкъ къикIыкIэ цIыфхэм уз зэфэшъхьафхэр къямыузынхэм пае министерствэхэм, ведомствэхэм, муниципальнэ образованиехэм зэшIуахын фэе Iофтхьабзэхэр. Пстэуми апэ рагъэшъырэр цIыфхэм зызыщагъэпсэфырэ, спорт Iофтхьабзэхэр зыщыкIонхэу щыт чIыпIэхэр укъэбзыгъэнхэр, бамыкIхэр зыгъэкIодырэ щэнаутхэр атеутхэгъэнхэр ары. Джащ фэдэу кIэлэцIыкIу зыгъэпсэфыпIэ ыкIи былымхэр зыщагъэхъурэ чIыпIэхэр агъэкъабзэх.
БамыкIхэр нахьыбэ зэрэхъухэрэм ыпкъ къикIыкIэ цIыфхэр зыщызэрэугъоирэ чIыпIэхэм, пстэумкIи гектар 6500-м, щэнаутыр тыраутхэнэу агъэнэфагъ.
Роспотребнадзорым и ГъэIорышIапIэу АР-м щыIэм къызэриIуагъэмкIэ, къэзыкIухьэрэ цIыфхэр нахь зыфэсакъыжьынхэ, бамыкIыр къыозымыгъэкIолIэрэ шIыкIэхэр агъэфедэнхэ, щыгъынхэр, Iэпкъ-лъэпкъхэр къаплъыхьанхэ фае. БамыкIыр къызыплъэгъукIэ, пкъышъолым псынкIэу къытепхын ыкIи медицинэ учреждением охътэ кIэкIым къыкIоцI уекIолIэн фае.
Iэшъынэ Сусан.