ЦIыфыр зэрыпсэун ылъэкIыщт ахъщэ анахь макIэу къэралыгъом щагъэнэфагъэр къызэраIэтыгъэм ишIуагъэкIэ, илъэси 8 — 17 зыныбжь кIэлэцIыкIу е зихэхъогъу зэрыс унагъохэм ыкIи сабый ежэрэ бзылъфыгъэхэм пособиеу къаратырэм мэкъуогъум и 1-м къыщыублагъэу къахэхъуагъ.
АР-м иминистрэхэм я Кабинет унашъоу ыштагъэм тетэу, цIыфыр зэрыпсэун ылъэкIыщт ахъщэ анахь макIэу республикэм щагъэнэфагъэр сомэ 11970-рэ хъугъэ. Ащ къыпкъырыкIыхэзэ, пособиехэр зыфэдизыщтхэри агъэнэфагъ. Джы бзылъфыгъэу сабый ежэхэрэм къафэкIорэ ахъщэ тыныр сомэ 6523,5-рэ хъугъэ. Ар цIыфыр зэрыпсэун ылъэкIыщт ахъщэ анахь макIэм ипроцент 50-м фэдиз.
КIэлэцIыкIур зэрыпсэун ылъэкIыщт ахъщэ анахь макIэу шъолъырым щагъэнэфагъэм ипроцент 50-м, процент 75-м е 100-м фэдиз пособиеу илъэси 8 — 17 зыныбжь кIэлэцIыкIу е зихэхъогъу зэрыс унагъохэм къаратырэр. Адыгеим ащ фэдэ ахъщэ анахь макIэу щагъэнэфагъэр сомэ 12018-рэ мэхъу. Арышъ, ащ ипроцент 50-р къызтефэхэрэм сомэ 6009-рэ, ипроцент 75-рэ къызфакIохэрэм сомэ 9013,5-рэ, проценти 100-у къызэратыхэрэм сомэ 12018-р къафатIупщыщт.
Пособиер къафэкIоным пае мэкъуогъу мазэм лъэIу тхылъыр зытыхэрэр ары апэ ащ тетэу къыхэхъуагъэу къызIэкIэхьащтыр. Ны-тыхэм атыгъэ тхылъхэм специалистхэр ахаплъэхэу, пособиер къатефэу алъытэмэ, ащ ыуж IофшIэгъу мэфитф нахьыбэ темышIэзэ ахъщэр счетым къырагъахьэ. Мэкъуогъур къимыхьэзэ тхылъыр зытыгъэхэм къызхэхъогъэ пособиер бэдзэогъу мазэм къаратынэу рагъэжьэщт.
УФ-м ПенсиехэмкIэ ифонд ыгъэпсырэ пособиеу мазэ къэс къатырэр къызтефэрэ кIэлэцIыкIухэмрэ зихэхъогъухэмрэ нэбгырэ 16970-рэ, сабый ежэрэ бзылъфыгъэхэр 1074-рэ мэхъух.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу.