Медицинэм иIофышIэ и Мафэ ехъулIэу Адыгеим и ЛIышъхьэ хэлажьэзэ Адыгэ Республикэм и Къэралыгъо филармоние мэфэкI зэIукIэ щыкIуагъ.
Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, республикэмкIэ псауныгъэм икъэухъумэн иIофышIэхэр, ветеранхэр, общественнэ ыкIи профсоюз организациехэм ялIыкIохэр.
Республикэм и ЛIышъхьэ къыхигъэщыгъ медицинэм ылъэныкъокIэ Iоф зышIэхэрэм япшъэрылъ къин зэрифэшъуашэм тетэу зэрагъэцакIэрэм пае зэрафэразэр.
«Джырэ медицинэр шIэныгъэ ыкIи IэпэIэсэныгъэ закъохэмкIэ ухыгъэ хъурэп. Инновационнэ оборудованиер, IэзэнхэмкIэ пэрыт шIыкIэ-амалхэр, узыр игъом гъэунэфыгъэнымкIэ къызфагъэфедэрэ шIыкIэ зэфэшъхьафхэр ащ хэхьэх. Джащ пае республикэм икъэралыгъо хабзэ икъулыкъухэм псауныгъэм икъэухъумэн ренэу ыпэкIэ лъыгъэкIотэгъэным, уахътэм диштэу гъэпсыгъэным апшъэрэ мэхьанэ зыкIыратырэр», — къыIуагъ КъумпIыл Мурат.
Мы аужырэ илъэсхэм Урысыем и Президентэу Владимир Путиныр кIэщакIо зыфэхъурэ Iофтхьабзэхэм яшIуагъэкIэ тиреспубликэ, зэрэхэгъэгу фэдэу, медикхэм Iоф ашIэнымкIэ амалышIухэр зэрарагъэгъотыхэрэм, медицинэ IэпыIэгъур нахь дэгъоу зэхэщэгъэным анаIэ зэрэтырагъэтырэм, цIыфхэр бэгъашIэ хъунхэм тегъэпсыхьэгъэ амалхэр зэрагъэунэфыхэрэм Адыгеим и ЛIышъхьэ къащыуцугъ.
Республикэм ипащэ зэкIэ медицинэм иIофышIэхэм, волонтерхэм, псауныгъэм икъэухъумэнкIэ анахь мэхьанэшхо зиIэ Iофыгъоу къэуцухэрэр шIуагъэ хэлъэу зэшIохыгъэнхэмкIэ зишIуагъэ къэзыгъэкIорэ пстэуми зэрафэразэр къыIуагъ.
Къэралыгъо программэхэмрэ лъэпкъ проектхэмрэ ягъэцэкIэн фэгъэхьыгъэу республикэм и ЛIышъхьэ анахьэу къыхигъэщыгъэр илъэсэу икIыгъэм сомэ миллиарди 9 а къулыкъум ихэхъоныгъэ зэрэпэIуагъэхьагъэр ары.
2021-рэ илъэсым къыщыублагъэу 2025-рэ илъэсым нэс республикэ программэм къызэрэдилъытэрэм тетэу пэублэ звенокIэ заджэхэрэм игъэкIэжьын анахьэу анаIэ тырагъэтыщт. А гухэлъхэм апае сомэ миллиард 1,5-рэ фэдиз къыхагъэкIыщт. А программэм диштэу муниципалитет заулэмэ амбулаториехэр ащагъэпсыгъэх, район сымэджэщхэм яотделениехэр агъэцэкIэжьыгъэх, медицинэ Iэмэ-псымэхэу ящыкIагъэхэр къащэфыгъэх, джащ фэдэу автотранспортэу медицинэм ылъэныкъокIэ къызфагъэфедэщтхэр къызIэкIагъэхьагъэх. Къуаджэхэм яхэхъоныгъэ тегъэпсыхьэгъэ программэм тетэу джыри фельдшер-мамыку IэзапIэу 3, врач амбулаториеу 2 агъэпсыщт.
Кощхьэблэ гупчэ район сымэджэщым тегъэпсыхьагъэу цIыфхэу адэбз уз зиIэхэм амбулаторнэ IэпыIэгъу язытыщт ятIонэрэ Гупчэ республикэм щагъэпсыгъ. Джащ фэдэу онкодиспансерым пае джыри зы КТ-аппарат къащэфыгъ.
Кадрэхэм ягъэхьазырын къыдыхэлъытагъэу илъэсэу икIыгъэм апшъэрэ медицинэ еджапIэхэм нэбгыри 133-рэ ачIагъэхьагъ, ординатурэм – апшъэрэ медицинэ еджапIэхэр къэзыухыгъэ нэбгырэ 47-рэ.
Программэу «Земский доктор» зыфиIорэм тетэу врач 42-рэ ыкIи фельдшер 14 IофшIапIэхэм аIуагъэхьагъэх. Мы аужырэ илъэси 10-м врач 456-мэ ыкIи гурыт звеном хэхьэрэ медицинэ IофышIэ 64-мэ IофшIэн арагъэгъотыгъ. Мы илъэсым специалист-реаниматологхэр, неонатологхэр, неврологхэр ыкIи педиатрхэр нахьыбэу IофшIапIэхэм къаIугъэхьэгъэнхэм пае къалэу Мыекъуапэ фэтэрхэр къафыхагъэкIынхэу рахъухьагъ.
Республикэм и ЛIышъхьэ анахьэу ынаIэ зытыригъэтыгъэхэм ащыщых къэхъухэрэр нахьыбэ шIыгъэнхэм ыкIи зидунай зыхъожьыхэрэм япчъагъэ къыкIегъэчыгъэным япхыгъэ Iофыгъохэр.
«Ащ пае медицинэ IэпыIэгъур зэкIэми алъыгъэIэсыгъэным, нахь дэгъоу ар зэхэщэгъэным ренэу тынаIэ тедгъэтыщт. Адыгеим ипащэхэм тапэкIи апшъэрэ мэхьанэ зэратыхэрэм ащыщыщт псауныгъэм икъэухъумэн исистемэ хэхъоныгъэ егъэшIыгъэныр», — къыIуагъ КъумпIыл Мурат.
Ащ нэужым медицинэм иIофышIэ анахь дэгъухэу 2022-рэ илъэсымкIэ гъэхъэгъэ анахь инхэр зышIыгъэхэм афэгушIуагъэх. Мы Iофтхьабзэм анахьэу къыхэщыгъэхэм ащыщ республикэ зэнэкъокъоу «2022-рэ илъэсымкIэ анахь врач дэгъу» зыфиIорэм текIоныгъэр къыщыдэзыхыгъэ врач-терапевтэу Людмила Шопинар. Мыекъопэ къэлэ клиникэ сымэджэщым ащ Iоф щешIэ. Республикэм и ЛIышъхьэ зэнэкъокъум текIоныгъэр къызэрэщыдихыгъэр къэзыушыхьатырэ дипломыр, ахъщэ шIухьафтыныр ыкIи «Сэтэнае икъэгъагъэ» (адыгэхэм ялъэпкъ медицинэ итамыгъэу щытыр), ювелирэу Еутых Асе ышIыгъэр, ащ къыритыжьыгъэх.
ЩытхъуцIэу «Адыгэ Республикэм изаслуженнэ врач» зыфиIорэр къызфагъэшъошагъэхэм КъумпIыл Мурат удостоверениехэр аритыжьыгъэх: Адыгэ республикэ клиникэ сымэджэщым иврач-хирургэу Къэлэкъутэкъо Казбек, Кощхьэблэ гупчэ район сымэджэщым иврач-анестезиологэу Гостэкъо Казбек, Алыгэкъалэ дэт район сымэджэщым иотделение ипащэу КIубэ Сусаннэ, Мыекъопэ къэлэ поликлиникэм иврач-терапевтэу Сагидова Наталье, Мыекъопэ кIэлэцIыкIу поликлиникэм иотделение ипащэу Ольга Смолинам, Мыекъопэ къэлэ поликлиникэм иврач-терапевтэу Ольга Фенченкэм.
ЩытхъуцIэу «Адыгэ Республикэм псауныгъэм икъэухъумэнкIэ изаслуженнэ IофышI» зыфиIорэр афагъэшъошагъ Красногвардейскэ гупчэ район сымэджэщым иоперационнэ медсестра шъхьаIэу Вера Зайцевам, кIышъо узхэмкIэ Адыгэ республикэ клиникэ вендиспансерым имедсестрау Валентина Прилипко, Тэхъутэмыкъое гупчэ район сымэджэщым имедсестра шъхьаIэу Шъэо Сулиет, Шэуджэн гупчэ район сымэджэщым имедсестра шъхьаIэу Сихъу Лизэ, Адыгэ психоневрологическэ диспансерым имедсестрау Екатерина Слободянюк, Адыгэкъалэ дэт сымэджэщым иотделение ипащэу Хъут Сафыет.
Псауныгъэм икъэухъумэн иIофышIэхэм япрофсоюзхэм я Адыгэ республикэ организацие итхьаматэу Любовь Усачевам Адыгеим и ЛIышъхьэ псауныгъэм икъэухъумэн ренэу ынаIэ зэрэтыригъэтырэм пае зэрэфэразэр къыIуагъ ыкIи УФ-м псауныгъэм икъэухъумэнкIэ ипрофсоюз IофышIэхэм я Гупчэ комитет имедалэу «COVID-19-м пэшIуекIорэ бэнэныгъэмкIэ гъэхъагъэу иIэхэм апае» зыфиIорэр къыритыжьыгъ.
Псауныгъэм икъэухъумэн иIофышIэхэм джащ фэдэу къафэгушIуагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м псауныгъэм икъэухъумэнкIэ иминистрэу Мэрэтыкъо Рустем. Медицинэ учреждениехэм яIофышIэ заулэхэм АР-м и ЛIышъхьэ ирэзэныгъэ тхылъхэр, АР-м и Къэралыгъо Совет — Хасэм и Щытхъу тхылъхэмрэ ирэзэныгъэ тхылъхэмрэ, джащ фэдэу бгъэхэлъ тамыгъэу «Отличник здравоохранения» зыфиIорэр ыкIи нэмыкI ведомствэ тынхэр афагъэшъошагъэх.
Iофтхьабзэм икIэухым республикэм искусствэхэмкIэ иIэпэIасэхэм концерт къатыгъ.
АР-м и ЛIышъхьэ ипресс-къулыкъу