Лажьэ зышIоигъом IэпыIэгъу егъоты

Мэкъу-мэщым ылъэныкъокIэ лажьэ зышIоигъохэм апае грант IэпыIэгъоу атырэм процент 60 Адыгеим щыхагъэхъуагъ.

Ащ дакIоу ахэр къызIэкIэзыгъахьэ зышIоигъохэри нахьыбэ хъугъэх. ИкIыгъэ илъэсым, гущыIэм пае, «Агростартапым» къыдилъытэрэ грантхэр тиреспубликэ ифермер 28-мэ аратыгъагъэмэ, мы илъэсымкIэ ахэм япчъагъэ 43-рэ хъугъэ. Мы Iофтхьабзэм 2022-рэ илъэсым мылъкоу пэIуагъахьэрэр сомэ миллион 73-рэ, ар гъэрекIо атыгъэм нахьи процент 60-кIэ нахьыб, къыщаIуагъ АР-м мэкъу-мэщымкIэ и Министерствэ ипресс-къулыкъу.

Мы илъэсым къыщыублагъэу грантхэм ятынкIэ анахьэу анаIэ зытырагъэтыхэрэм ащыщ хэтэрыкIхэмрэ картофымрэ якъэгъэкIын изегъэушъомбгъун. Мы лъэныкъохэм атегъэпсыхьагъэу лажьэрэ нэбгыриплIымэ грантхэр аIэкIагъэхьэгъахэх.

ЕзыгъэжьэгъэкIэ фермерхэм къэралыгъо IэпыIэгъу ягъэгъотыгъэнымкIэ проектэу «Агростартапыр» ­лъэпкъ проектэу «Предпринимательствэ цIыкIумрэ гурытымрэ ыкIи унэе предпринимательствэм игукъэкIхэм IэпыIэгъу ягъэгъотыгъэныр» зыфиIорэм къыдыхэлъытагъэу агъэцакIэ. Ащ Iоф зэришIэрэр щысэ заулэкIэ къэд­гъэлъэгъон.

Осетрэ хъуным зырагъэушъомбгъущт

ЕзыгъэжьэгъэкIэ предпринимателэу Роман Шестовыр мы Iофым иунэ зыщыпылъыр бэшIагъэ, ау мыгъэ унашъо ышIыгъ ащ зыригъэушъомбгъунэу — зигугъу къэтшIыгъэ лъэпкъ проек­тым игрантэу «Агростартапыр» къыз­фигъэфедэнэу рихъухьагъ.

СатыумкIэ гухэлъэу иIэхэр комиссием ыпашъхьэ къызыщегъэшъыпкъэжьхэм, грантыр ащ къыратынэу унашъо ашIыгъ. А мылъкумрэ ежь иIэмрэ зэхигъэ­хьанхэшъ, пцэжъыемрэ ащ хэшIыкIыгъэ гъомылапхъэ­хэмрэ къызщыдигъэкIыщтхэ псэуалъэм ишIын ыкIи изэтегъэпсыхьан апэIуигъэхьан ыгу хэлъ.

— Осетрэ пцэжъые лъэпкъым икIэнкIэ осэшхо зыфашIырэ шхыныгъохэм ащыщ, пкъышъолым лъэшэу ишIуагъэ екIы. Ащ фэдэ гъомылапхъэхэм осэ ин яI ыкIи мы Iофым тэрэзэу, акъылыгъэ хэлъэу укъекIуа­лIэмэ, федэ къыхэпхышъущт. Ар зыщыIубгъэкIыщтым бэрэ улъыхъунэуи ищыкIагъэп, — къыщыхагъэщыгъ мэкъу-мэщымкIэ Министерствэм.

Хъызмэтым ипащэ къызэриIуагъэмкIэ, къышIырэ продукциер зыIуигъэкIыкIэ, къихьащт илъэсым федэу сомэ миллион 1,8-рэ къыхихыным щэгугъы, проектым зыкъызищэфыжьыкIэ, мы пчъагъэр зы илъэсым те­лъытагъэу сомэ миллиони 4-м нэсын ылъэкIыщт.

Голубикэм хагъэхъощт

Тишъолъыр зыщызыушъомбгъухэрэм ащыщ мэткIо лъэпкъ зэфэшъхьафхэм якъэгъэкIын. Мыщ дэжьым къыхэгъэ­щыгъэн фае, пчъагъэм имызакъоу, изэ­мылIэужыгъуагъи хагъахъо.

ГущыIэм пае, икIыгъэ илъэсым анахьыбэу къагъэ­кIыщтыгъэр цумпэр арымэ, аужырэ уахътэм къэц маркIор (ежевикэр), джы голубикэр ашIогъэшIэгъонхэм ащыщых.
Мэкъу-мэщымкIэ Министерствэм къызэрэщаIуа­гъэмкIэ, лъэпкъ проектым къыхиубытэу голубикэм икъэгъэкIынкIэ Iофтхьабзэм мылъку республикэм зэрэщыфатIупщыщтыр апэрэ. Ащ шъолъырым зыщиушъомбгъунымкIэ егъэжьапIэ хъун ылъэкIыщт.

ЕзыгъэжьэгъэкIэ фермерэу Бэгъ Дианэ грантэу «Агростартап» зыфиIорэм къыдыхэлъытэгъэ мылъкур къыфыхагъэкIы голубикэм игъэтIысыжьрэ ащ гъоткIо шIыкIэкIэ псыр зэрэIэкIигъэхьащт Iэмэ-псымэхэмрэ рищэфынхэу. Сатыур зы гектаркIэ ащ ригъэжьэн ыгу хэлъ. КъыгъэкIыщтым ыуасэ зэрэиныр къыдыхэплъы­тэмэ, мы чIыгу Iахьым федэу сомэ миллиони 4 фэдиз къыхихыщт, лэжьыгъэр нахьыбэу къытэу къызыригъа­жьэкIэ, пчъагъэр сомэ миллиони 6-м нэсышъущт. Дианэ игущыIэ къызэрэщыхигъэщыгъэмкIэ, лъэны­къуакIэу зыдэлэжьэщтым къыгъэщынэрэп, сыда зыпIокIэ, ятэ агроном сэнэхьатыр иI, ригъэжьэрэ IофымкIэ иIэпыIэгъущт.

Грантэу мы илъэсым атыгъэхэм яшIуагъэкIэ голубикэмрэ къэц маркIомрэ якъэгъэкIын республикэм ихъызмэтшIэпIи 9 пылъыщт, цумпэм — 7.

МэщлIэкъо Саид.