Адыгеим и ЛIышъхьэу КъумпIыл Мурат адыгэ къуаем ифестиваль изыфэгъэхьазырын фэгъэхьыгъэ зэIукIэр тыгъуасэ зэрищагъ.
Iофтхьабзэм хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м мэкъу-мэщымкIэ иминистрэу Къуанэ Анзаур, АР-м экономикэ хэхъоныгъэмрэ сатыумрэкIэ иминистрэу Шэуджэн Заур, АР-м культурэмкIэ иминистрэу Аулъэ Юрэ, АР-м зекIонымкIэ ыкIи зыгъэпсэфыпIэхэмкIэ и Комитет итхьаматэу Былымгъот Ибрахьим, общественнэ организациеу «Адыгэ къуаер къэзышIхэрэм я Союз» итхьаматэу Лъэустэнджэл Мурат.
Къушъхьэтхэу УнэкIожь дэжь, Дахъо гъэхъунэм мыгъэ мыщ фэдэ фестивалыр зэрэщызэхащэщтыр шъугу къэтэгъэкIыжьы. ШышъхьэIум ыкIэхэм адэжь мэфитIурэ ар рагъэкIокIын ямурад.
Республикэм ипащэ фестивалым изэхэщэнкIэ лъэныкъо пстэуми икъоу ягупшысэнхэу, программэ гъэшIэгъон зэхагъэуцонэу, ермэлыкъ зэфэшъхьафхэр зэхащэнхэу, адыгэ къуаем фашIэу иIэр ауплъэкIун алъэкIынэу, мэфэкIыр щынэгъончъэу щытынэу, автомобиль уцупIэхэр зэтырагъэпсыхьанхэу пшъэрылъ афишIыгъ.
«Адыгэ къуаем ифестиваль цIыфхэм агу къинэжьэу зэхэщэгъэн фае. Пандемием ыпкъ къикIыкIэ цIыфхэр зызэIумыкIэхэрэр илъэситIу хъугъэ, ахэр мыщ фэдэ мэфэкIхэм афэзэщыгъэх. Зэхэщэн Iофтхьабзэхэм анэмыкIэу, фестивалым ипрограмми икъоу шъуегупшыс. Ащ хьакIэу къекIуалIэрэ пэпчъ адыгэ лъэпкъым хьакIэхэр зэригъэлъапIэхэрэр, адыгэ къуаем иIэшIугъэ зэхишIэн, лъэпкъ хабзэхэмрэ культурэмрэ нэIуасэ афэхъун фае», — къыIуагъ КъумпIыл Мурат.
Адыгеим и ЛIышъхьэ игъо афилъэгъугъ фестивалым икультурнэ программэ творческэ коллективхэмрэ общественнэ организациехэмрэ чанэу хагъэлэжьэнхэу. КъумпIыл Мурат ишIошIкIэ, «Шыу Хасэм» хэтхэми мэфэкIыр къагъэдэхэщт.
Ермэлыкъхэр зыщыкIощтхэ, фуд-кортхэр зыщызэхащэщт чIыпIэхэм нахь зарагъэушъомбгъунэу, республикэм, тихэгъэгу инэмыкI чIыпIэхэм, IэкIыб къэралыгъохэм къуаехэр къащыдэзыгъэкIыхэрэр, республикэм инэмыкI предприятиехэм ялIыкIохэр ащ къырагъэблэгъэнхэу рахъухьэ.
Фестивалым хьэкIабэ къызэрекIолIэщтым, зекIуабэ республикэм къызэрэкIощтым япхыгъэу Адыгеим и ЛIышъхьэ пшъэрылъ афишIыгъ туроператорхэм нахь чанэу адэлэжьэнхэу, хьакIэщхэм чIыпIэ пчъагъэу яIэр ауплъэкIунэу, логистикэм дегупшысэнхэу, автомобиль уцупIэхэм ячIыпIэ заулэ къагъэнэнэу, лъэсрыкIо лъагъохэр, фестиваль Iофтхьабзэхэр зыщызэхащэщт чIыпIэхэр зэтырагъэпсыхьанхэу, Iофтхьабзэхэр зыщыкIощт чIыпIэхэмкIэ цIыфхэм пэшIорыгъэшъэу макъэ арагъэIунэу.
Адыгеим и ЛIышъхьэ пшъэрылъ афишIыгъ КIэрэщэ Анзаур зипэщэ зэхэщэкIо комитет агъэнэфэнэу, фестивалыр зыщыIэщт мафэр, Iофтхьабзэхэм яплан аухэсынхэу, ахэм язэхэщэн фежьэнхэу.
КъумпIыл Мурат зэрэхигъэунэфыкIыгъэмкIэ, фестивалыр республикэм ихъугъэ-шIэгъэ шъхьаIэхэм ахалъытэ, илъэсым ихъугъэ-шIэгъэ гъэшIэгъонхэм ястатус мэфэкIым иIэ хъугъэ, Урысыем изекIохэм атегъэпсыхьэгъэ проект анахь дэгъухэмкIэ Лъэпкъ мэфэгъэпсым хагъэхьагъ. Адыгэ къуаем ифестиваль мыгъи илъэсым ихъугъэ-шIэгъэ анахь дэгъу 50-мэ ахалъытагъ.
Адыгеим и ЛIышъхьэ фестивалым нахь зырагъэушъомбгъунэу пшъэрылъ афишIыгъ. Къихьащт илъэсым чIыпIакIэм — псыхъоу Шъхьэгуащэ исэмэгу нэпкъ, ДжэгокIо гъэхъун зыфаIорэм дэжь, фестивалыр щызэхащэнэу рахъухьэ. Проект зэфэшъхьафхэм япхырыщынкIэ къызфагъэфедэн алъэкIыщт этнокомплекс гъэшIэгъоным тегъэпсыхьэгъэщт инфраструктурэм изэхэщэнкIэ мы чIыпIэм IофшIэн гъэнэфагъэхэр щэкIох.
АР-м и ЛIышъхьэ ипресс-къулыкъу