Адыгеим и ЛIышъхьэу КъумпIыл Мурат дэкIыгъо зэхэсыгъоу зэрищагъэр зыфэгъэхьыгъагъэр сабыибэ зэрыс унагъохэм псэупIэ унэхэр зыщашIын алъэкIыщт чIыгу Iахьхэу къалэу Мыекъуапэ икъокIыпIэ лъэныкъокIэ щыIэхэм ящыкIэгъэ инфраструктурэр гъэпсыгъэным епхыгъэ Iофыгъохэр ары.
ЗэIукIэгъум хэлэжьагъэх Адыгэ Республикэм и Премьер-министрэ ипшъэрылъхэр зыгъэцакIэу КIэрэщэ Анзаур, Адыгеим псэолъэшIынымкIэ и Министерствэ ипащэ игуадзэу Лев Каракян, Мыекъуапэ имэрэу Геннадий Митрофановыр, АР-м икъэралыгъо бюджет учреждениеу «Стройзаказчикым» ипащэ ипшъэрылъхэр зыгъэцакIэу Хьаджымэ Аслъан, лодряднэ организациехэм ялIыкIохэр.
КъумпIыл Мурат къалэм икъокIыпIэ лъэныкъо, зэпахырэ узхэм зыщяIазэхэрэ сымэджэщым дэжь, IофшIэнхэр зэрэщыкIохэрэм зыщигъэгъозагъ. Нафэу зэрэщытымкIэ, унэхэр щашIынхэм пае мы чIыпIэм чIыгу Iахь 790-рэ щагъэнэфагъ. Псы ыкIи электричествэ рыкIуапIэхэм яшIын макIо, мы илъэсым Iоныгъом ыкIэм нэс ахэр аухынхэу щыт. НепэкIэ подряднэ организациеу пшъэдэкIыжьэу ыхьырэмкIэ гъунэпкъэ гъэнэфагъэ зиIэ «Монтажым» псыр аIэкIэгъэхьэгъэным тегъэпсыхьэгъэ IофшIэнхэу зэшIуахын фаехэм япроцент 40-р ыгъэцэкIэгъах. Подряднэ организациеу «Прогрессорым» электричествэ рыкIуапIэхэм ягъэпсын процент 60-кIэ зэшIуихыгъ.
Сабыибэ зэрыс унагъохэм апае къыхагъэкIыгъэ чIыгу Iахьхэм яинженер инфраструктурэ тегъэпсыхьэгъэ IофшIэнхэр Адыгеим исоциальнэ-экономикэ хэхъоныгъэкIэ программэм диштэу макIох. Мы илъэсым къалэу Мыекъуапэ икъокIыпIэ лъэныкъо псымрэ электричествэмрэ IэкIэхьанхэм пае сомэ миллион 210-рэ къыхагъэкIыгъ.
ТапэкIэ республикэ фондэу гъогушIыным тегъэпсыхьагъэм къыхэкIыгъэ мылъкумкIэ урам заулэмэ ягъогухэр ашIыгъэх. А IофшIэныр лъагъэкIотэщт. Къалэу Мыекъуапэ имэр къызэриIуагъэмкIэ, проектым къыделъытэ газыр рыщэгъэнымрэ гъогухэр гъэпсыгъэнхэмрэ. ИпIалъэм ыкIи дэгъоу IофшIэнхэр зэшIохыгъэ хъунхэм пае уплъэкIун Iофтхьабзэхэр нахь агъэлъэшынхэу Адыгеим и ЛIышъхьэ пшъэрылъ афишIыгъ. Ащ дакIоу чIыгу Iахьхэр зэратырэ унэгъо Iужъухэм гурыгъэIон-зэхэфын IофшIэныр тэрэзэу адызэрахьан зэрэфаери КъумпIыл Мурат къыхигъэщыгъ.
Къалэм иадминистрацие къызэритыгъэмкIэ, республикэм икъэлэ шъхьаIэ икъокIыпIэ лъэныкъо щыIэ, унэгъо Iужъухэм аратынэу агъэнэфэгъэ чIыгу Iахь 790-м щыщэу 708-р атырагощэгъах. ПстэумкIи 2017-рэ илъэсым къыщыублагъэу Мыекъуапэ чIыгу Iахь 1724-рэ щатырагощагъ. Ащ ишIуагъэкIэ мы аужырэ илъэсхэм зичэзыу ежэхэрэм япчъагъэ хэпшIыкIэу нахь макIэ хъугъэ, непэкIэ сабыибэ зэрыс унэгъо 25-рэ чэзыум ежэрэр. Зыми рамытыгъэ чIыгу Iахьэу къэнагъэр зэрэхъурэр 214-рэ. Ащ амал къытыщт мы илъэс блэгъищым чIыгу Iахь зищыкIэгъэ унэгъо пстэуми яшIоигъоныгъэ агъэцэкIэнэу. Ащ нэмыкIэу Адыгеим и ЛIышъхьэ пшъэрылъ зэрафишIыгъэм тетэу къалэм икъохьэпIэ лъэныкъо чIыгу Iахь 400 щагъэнэфэн алъэкIыным иамал щыIэмэ зэрагъашIэ.
КъумпIыл Мурат къызэрэхигъэщыгъэмкIэ, тапэкIи ащ фэдэу чIыгу Iахьхэр гъэнэфэгъэнхэм мэхьанэшхо иIэу щыт ыкIи илъэсыбэрэ цIыфхэм афэлэжьэн зылъэкIыщт коммуникацие дэгъур агъэпсынэу пшъэрылъ афишIыгъ.
«Сабыибэ зэрыс унагъохэр тапэкIи нахьыбэ хъунхэм пае ящыкIэгъэ амалхэр ядгъэгъотынхэм ыуж титыщт. Сабыйхэр зэрыс унагъохэм IэпыIэгъу ятыгъэнымкIэ Iофтхьэбзэ зэфэшъхьафхэр зэшIотэхых, Урысые Федерацием и Президентэу Владимир Путиным иунашъо диштэу ащ фэдэ IэпыIэгъум иамалыкIэхэр тэгъэфедэх. Арышъ, тапэкIэ тыплъэзэ IофшIэныр тэрэзэу зэхэтщэным мэхьанэшхо иI», — къыкIигъэтхъыгъ КъумпIыл Мурат.
АР-м и ЛIышъхьэ
ипресс-къулыкъу