Урысыем и Мафэ фэгъэхьыгъэ мэфэкI концертыр Зэкъошныгъэм игупчэу Мыекъуапэ дэтым игъэкIотыгъэу щыкIуагъ.
Пчэдыжьым къыщыублагъэу кIэлэцIыкIу ансамблэхэр, культурэм иIофышIэхэр пчэгум щыуджыгъэх, лъэпкъ орэдхэр къыщаIуагъэх.
Пчыхьэм зэхащэгъэ концертым Адыгэ Республикэм и ЛIышъхьэу КъумпIыл Мурат ыцIэкIэ Адыгеим и Къэралыгъо Совет — Хасэм и Тхьаматэу Владимир Нарожнэр къыщыгущыIагъ.
Лъэпкъыбэ зыщыпсэурэ Урысыем ищыIакIэ нахьышIу шIыгъэным лIэужхэр зэрэфэлажьэхэрэм, Адыгеим къэралыгъо гъэпсыкIэ иIэ зыхъугъэм ия 100-рэ илъэс мыгъэ игъэкIотыгъэу зэрэхэдгъэунэфыкIырэм Владимир Нарожнэр къатегущыIагъ.
Адыгэ Республикэм щыпсэухэрэм, хьакIэхэм Владимир Нарожнэр Урысыем имэфэкI фэгъэхьыгъэу къафэгушIуагъ. Псауныгъэ пытэ яIэнэу, мамырэу псэунхэу афиIуагъ.
УФ-м и ЛIыхъужъэу Цэй Эдуард Урысыем и Мафэ фэшI гущыIэ фабэхэр зэхахьэм къыщиIуагъэх. Къэралыгъом ыкIуачIэ нахь лъэш зэрэхъущтым тицыхьэ телъэу тызэрэпсэурэр хигъэунэфыкIыгъ. МэфэкIым хэлажьэхэрэм къафэгушIуагъ.
КIэлэцIыкIу ансамблэу «Мыекъуапэ инэфылъэхэм» лъэпкъ къашъохэр мэфэкI зэхахьэм къыщишIыгъэх. Художественнэ пащэу, Урысыем культурэмкIэ изаслуженнэ IофышIэу, Къэбэртэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр мэфэкIым лъэпкъыбэ зэрэщызэIукIагъэм, адыгэ къашъохэр Сыбыр, Украинэм, нэмыкIхэм къарыкIыгъэхэм зэрашIогъэшIэгъонхэр изэфэхьысыжьхэм къащыхигъэщыгъ.
Ансамблэу «Казачатэм» жанрэ зэфэшъхьафхэм ателъытэгъэ орэдхэр къыIуагъэх. Жэнэ Къырымызэрэ Тхьабысымэ Умаррэ зэдаусыгъэу «Сикъуадж» зыфиIорэр ансамблэм дахэу къыIуагъ. Орэдым хэгъэщагъэу адыгэ къашъор къызыхедзэм, нэбгырэ шъэ пчъагъэу яплъыхэрэр агъэгушIуагъэх, Iэгу афытеуагъэх.
— Лъэпкъхэм язэфыщытыкIэхэр гъэпытэгъэнхэр типшъэрылъ шъхьаIэхэм ахэтэлъытэх, — къытиIуагъ «Казачатэм» ипащэу, Адыгэ Республикэм культурэмкIэ изаслуженнэ IофышIэу Дмитрий Гордиенкэм. — Адыгеим къэралыгъо гъэпсыкIэ иIэу зыпсэурэр илъэси 100 зэрэхъурэм тигъэхъагъэхэр фэтэгъэхьых. Концерт хэушъхьафыкIыгъэ зэхэтщэн тимурад.
«Налмэсыр» Кавказ щэуджы
Дунаим щыцIэрыIо ансамблэу «Налмэсыр» Зэкъошныгъэм игупчэ лъэпкъ къашъохэр къыщишIыгъэх. КъыкIэлъыкIогъэ мафэм Къэрэщэе-Щэрджэсым икъуаджэу Хьабэз концерт къыщитыгъ. «Налмэсым» ипчыхьэзэхахьэ мэкъуогъум и 14-м Щэрджэскъалэ щыкIуагъ. Мэкъуогъум и 17-м «Налмэсым» имэфэкI мафэ фэгъэхьыгъэ концертыр Мыекъуапэ щызэхищэщт.
«Налмэсым» ихудожественнэ пащэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан тызэрэщигъэгъозагъэу, гъэпсыкIэ зэфэшъхьафхэр зиIэ концертхэр ансамблэм ыгъэхьазырыгъэх, лъэпкъ искусствэм ибаиныгъэхэр Урысыем ишъолъырхэм алъигъэIэсыщтых.
«Ошъадэр», «Ошъутенэр»…
Республикэм щыцIэрыIохэ творческэ купхэу «Ошъадэм», «Ошъутенэм», фэшъхьафхэм мэфэкI зэхахьэр къагъэдэхагъ. Урысыем фэгъэхьыгъэ орэдхэр Юрий Конжиным, Мамхыгъэ Маринэ, Алевтина Кобазевам, Мэкъоо Маринэ къаIугъэх.
«Ошъадэм» илъэпкъ къашъохэр нахь гъэшIэгъонэу къыгъэлъэгъонхэм пае шъонтырпаохэр, нэмыкIхэри егъэфедэх. КъэшъуакIохэри псынкIэу мэуджых.
КIэлэцIыкIу зыгъэсапIэу «Майкопчанкэм» Iошъхьэмафэ фэгъэхьыгъэ орэдым техыгъэ къашъор узыIэпищэу къыгъэлъэгъуагъ, пащэр Къулэ Мадин.
Елена Щербак зипэщэ кIэлэцIыкIу зыгъэсапIэу «Радугэм» лъэпкъхэм якъашъохэр, гум рихьэу къышIыгъэх. КIэлэеджакIохэм шъуашэу ащыгъыр зыми фэдэп, нэр пIэпахэу дахэх.
Адыгэ къэшъокIо ансамблэу «Абрекхэр» зызэхащагъэр илъэси 5-м къехъугъ. Художественнэ пащэу ТхьакIумэщэ Налбек концертым мэхьэнэ ин иIэу ылъытагъ. ЗэкIэ хэлажьэхэрэм яIэпэIэсэныгъэ къагъэлъагъозэ, искусствэр нахь лъагэу зэраIэтыщтым пылъых.
Адыгэ Республикэм и Къэралыгъо филармоние иоркестрэу «Русская удалым» иорэдыIоу Анастасия Истамуловам шIулъэгъу орэдыр мэкъэ IэтыгъэкIэ къыхидзи, узыIэпищэу къыIуагъ.
Владимир Ковальчук, Сергей Трутневыр, нэмыкI артистхэри концертым хэлэжьагъэх. Адыгэ Республикэм изаслуженнэ артистэу Еутых Вячеслав адыгабзэкIи, урысыбзэкIи орэдхэр ыгъэжъынчыгъэх.
Ахэджэго Рузанэрэ Мэкъулэ Руслъанрэ зэращэгъэ мэфэкI пчыхьэзэхахьэм хэлэжьагъэхэм Урысыем и Гимн къаIуагъ. МэшIоустхъохэм ошъогу къаргъор къагъэшIэтыгъ.
МэфэкI зэхахьэу «Мы Россия» зыфиIорэр гум шIукIэ къинэжьынэу Мыекъуапэ щыкIуагъ, зэхэщакIохэм тафэраз.
ЕмтIылъ Нурбый.