Дунэе Адыгэ Хасэм (ДАХ-м) и Хэсашъхьэ изэIукIэ мэкъуогъум и 10 — 11-м Мэздэгу щыкIуагъ.
Адыгабзэр, культурэр
ДАХ-м изэхахьэ рагъэжьэным ыпэкIэ Дунэе шIэныгъэ зэIукIэ Налщык щызэхащагъ. Къэбэртэе-Бэлъкъар къэралыгъо университетым щыкIогъэ зэхахьэм шIэныгъэлэжьхэр, ДАХ-м хэтхэр, культурэм иIофышIэхэр, нэмыкIхэри хэлэжьагъэх.
Адыгабзэмрэ лъэпкъ культурэмрэ ухъумэгъэнхэм япхыгъэ Iофыгъохэм къапыщылъ къиныгъохэр, ахэр къызэнэкIыгъэнхэр къэгущыIагъэхэм къыхагъэщыгъэх. ХэкIыпIэу щыIэхэр зэфахьысыжьыгъэх. Анахьэу анаIэ зытырадзагъэр лъэпкъ шIэжьым къыпкъырыкIыхэзэ, кIэлэцIыкIу IыгъыпIэхэм къащыублагъэу адыгабзэм изэгъэшIэн, игъэфедэн щыIэныгъэм зэрэщыпхыращыщтыр ары.
ШIэныгъэлэжьхэм, культурэм пыщагъэхэм ягупшысэхэр лIэужхэм язэпхыныгъэхэм ягъэпытэн ныдэлъфыбзэр, культурэр, искусствэр зэрафэлажьэхэрэм афэгъэхьыгъагъэх.
Республикэ общественнэ движениеу «Адыгэ Хасэм» илIыкIохэр зэхахьэм хэлэжьагъэх. МэщфэшIу Нэдждэт адыгабзэр щыIэныгъэм нахьышIоу щыгъэфедэгъэным ехьылIагъэу къэгущыIагъ. ЗэхэщакIохэр къелъэIухи, адыгабзэкIэ усэм къеджагъ.
Дунэе Адыгэ Хасэм ипрезидент иупчIэжьэгъоу МэщфэшIу Нэдждэт зэрагъэнэфагъэр къэзыушыхьатырэ тхылъыр ДАХ-м ипрезидентэу Сэхъурэкъо Хьаутий къыритыжьыгъ.
Пащэхэм язэIукI
ДАХ-м иIофшIэн чанэу хэлажьэхэрэ Вэрэкъо Зэтый — ар Европэм и Адыгэ Хасэ ипащ, ХьашIуцIэ Мухьамэд, Аслъанэ Алый, КIакIыхъу Мэджыд, ЛIымыщэкъо Рэмэзан, Шыбзыхъо Юр пэщэныгъэ зыдызэрахьэрэ Хасэмэ къатегущыIагъэх. Шъыгъо-шIэжь мафэм зэрэхэлэжьагъэхэр зэфахьысыжьыгъ. Тарихъым инэкIубгъохэр нахьышIоу зэгъэшIэгъэнхэм яеплъыкIэхэр къыраIолIагъэх.
Ставрополь краим щыпсэурэ тилъэпкъэгъухэм я Адыгэ Хасэ ипащэу Шыбзыхъо Юрэ къызэриIуагъэу, зэлъэпкъэгъухэм язэIукIэгъухэм унашъоу ащаштэрэр щыIэныгъэм дештэ, уапэкIэ уегъаплъэ.
Мэздэгу щызэIукIагъэх
Iоныгъом и 20-м «Адыгэм и Маф» зыфиIорэ мэфэкI зэхахьэр Налщык щыкIощт. Адыгеим къэралыгъо гъэпсыкIэ иIэу зыпсэурэр мыгъэ илъэси 100 мэхъу. ДАХ-м и Хэсашъхьэ изэIукIэ мэфэкIхэр зэрэхагъэунэфыкIыщтхэм щытегущыIагъэх.
Адыгэ лъэпкъым дунаим къыщикIугъэ гъогум зызэриушъомбгъурэм, ДАХ-р ащ зэрэхэлажьэрэм, адыгэр адыгэу дунаим тапэкIи зэрэщыпсэущтым яеплъыкIэхэр къыраIолIагъэх.
Грузиер заокIэ Абхъазым ичIыгу зихьагъэр шышъхьэIум и 14-м илъэс 30 хъущт. Мамыр псэукIэр гъэпытэгъэным фэгъэхьыгъэ зэIукIэхэр ДАХ-м зэхищэщтых. Сыхъум щыкIощт Iофтхьабзэр зэрэрагъэкIокIыщтыр хагъэунэфыкIыгъ.
ЛIымыщэкъо Рэмэзан, МэщфэшIу Нэдждэт, Хьаджый Адам, ГъукIэлI Сусан, Хъот Юныс, ЦIыкIушъо Аслъан, Хьаблаукъо Адам Адыгеим ыцIэкIэ зэIукIэгъухэм ахэлэжьагъэх. Осетинхэм якIэлэцIыкIу IыгъыпIэ щыIагъэх, лъэпкъ Iофыгъохэр къыщаIотагъэх.
Хэгъэгу зэошхом щыфэхыгъэхэм, заом ыкIыб щыIэхэу яIофшIэнкIэ ТекIоныгъэр къэзыгъэблэгъагъэхэм язэхэт саугъэтэу Мэздэгу дэтым республикэм иобщественнэ движениеу «Адыгэ Хасэм» хэтхэу ДАХ-м и Хэсашъхьэ изэIукIэ хэлажьэхэрэм къэгъагъэхэр кIэралъхьагъэх, лIыхъужъхэм шъхьащэ афашIыгъ.
Лъэпкъ шэн-хабзэхэр
Мэздэгу адыгэхэм ялIэшIэгъу лъэпкъ-шэн хабзэхэм афэгъэхьыгъэ зэIукIэр гъэшIэгъонэу кIуагъэ. Мэздэгу лъэпкъ 70-м нахьыбэ щэпсэу.
Осетинхэм, нэмыцхэм, грузинхэм, къэзэкъхэм, урысхэм, адыгэхэм, дагъыстанхэм, фэшъхьафхэм яIэпэIасэхэм бгъэфедэн плъэкIыщт искусствэр, тарихъ пкъыгъохэр, IэпэIасэхэм яIофшIагъэхэр гъэшIэгъонэу къагъэлъэгъуагъэх.
МэщфэшIу Нэдждэт, ЦIыкIушъо Аслъан, Хъот Юныс яеплъыкIэхэм къащыхагъэщыгъ лъэпкъ пэпчъ итарихъ, иискусствэ къырыпшIэнэу IофшIагъэ зэриIэр. Лъэпкъ тхыпхъэхэр IэпэIасэхэм «къагъэгущыIэхэу» ЛIымыщэкъо Рэмэзан елъытэ.
Адыгэ шъуашэр итеплъэ изакъоп къэзыгъэдахэрэр, ар зэрэзепхьащтым имэхьани зэхахьэм щытегущыIагъэх. Адыгэм и Мафэ адыгэ шъуашэр нэбгырэ шъэ пчъагъэмэ къякIоу зыщалъэщт, адыгэ быракъэу жъогъо 12-р къызыхэлыдыкIырэр шъолъырхэм, тилъэпкъэгъухэр зыщыпсэурэ хэгъэгухэм ащагъэбыбэтэщт. Адыгэм иадыгагъэ зэригъэлъапIэрэр, псэ зыпыт зэIукIэгъухэм къащагъэлъэгъощт.
Унэ къаратыгъ
Мэздэгу и Адыгэ Хасэ Iоф зыщишIэщт унэ къыратыгъ. Тарихъ мэхьанэ зиIэ унэу Мэздэгу игупчэ итыр лъэгъупхъ, шIэхэу зэтырагъэпсыхьажьыщт.
Хабзэм икъулыкъушIэхэр IэпыIэгъу къафэхъухэзэ яIофхэр зэрэлъагъэкIуатэхэрэм, культурэм, спортым, ныбжьыкIэхэм яхьылIэгъэ Iофыгъохэм, нэмыкIхэм ДАХ-м изэхахьэхэм ащытегущыIагъэх, унэшъо хэхыгъэхэр аштагъэх.
ЕмтIылъ Нурбый.