Адыгэ Республикэм и Къэралыгъо академическэ къэшъокIо ансамблэу «Налмэсым» иконцертхэр Тыркуем икъалэхэм ащыкIуагъэх.
Анкара, Анталие, Измир, Къайсыр «Налмэсым» ипчыхьэзэхахьэхэр гъэшIэгъон дэдэу ащыкIуагъэх, нэбгырэ шъэ пчъагъэ яплъыгъ. Тыркуем культурэмкIэ ихэбзэ къулыкъушIэхэр концертхэм ащыIагъэх, тиартистхэм гущыIэгъу къафэхъугъэх.
Анкара и Адыгэ Хасэ кIэщакIо фэхъуи, пчыхьэзэхахьэр адыгэ джэгушхокIэ аухыгъ.
Тыркуем щыщхэу къэшъуакIоу Айбарс Тамп, пщынаоу Жу Къайхъан «Налмэсым» иартистхэм ягъусэхэу концертхэм ахэлэжьагъэх. Зэлъэпкъэгъухэм лъэпкъ искусствэм ибаиныгъэ къагъэлъэгъуагъ.
Мэкъуогъум и 13 — 15-м «Налмэсым» иконцертхэр Къэрэщэе-Щэрджэсым щыкIощтых. Мэкъуогъум и 17-м «Налмэсым» имэфэкI мафэ фэгъэхьыгъэ концертыр Мыекъуапэ къыщитыщт.