ИскусствэхэмкIэ кIэлэцIыкIу еджапIэхэм яхорхэм яфестиваль-зэнэкъокъу я IХ-рэу Мыекъуапэ щыкIуагъ. Адыгэ Республикэм культурэмкIэ и Министерствэ, республикэм искусствэхэмкIэ икIэлэцIыкIу еджапIэу N 1-м методикэмкIэ игупчэ зэхащэгъэ зэнэкъокъум Адыгеим икIэлэеджэкIо хор 19 хэлэжьагъ.
Илъэси 3-м зэ зэхащэрэ фестиваль-зэнэкъокъум иосэшI куп ипащэу А. Н. Гребень къыIуагъ IэкIыб хэгъэгухэм яшэн-хабзэхэр къаухъумэхэзэ, кIэлэцIыкIу академическэ хорхэм чIыпIэ композиторхэм аусыгъэхэр цIыфхэм алъагъэIэсынхэм зэрэпылъхэр. Хорхэр, кIэлэеджакIохэм япащэхэр кIагъэгушIухэзэ, зэнэкъокъухэм ащыIухэрэ орэдхэр нахьыбэ хъугъэх.
Купхэу «А-м» ыкIи «В-м» ахэтхэу кIэлэеджакIохэр гощыгъагъэх. Илъэси 7 — 10, 11 — 15 зыныбжьхэр зэнэкъокъугъэх. Классикэм хэхьэгъэ произведениехэр, Адыгеим икомпозиторхэм аусыгъэхэм осэшIхэр ядэIугъэх, зэфэхьысыжьхэр ашIыгъэх.
Зэгъэпшэнхэм ауж Iэнэ хъураем кIэлэегъаджэхэр къыщыгущыIагъэх. КIэлэеджакIохэм яшIэныгъэхэм ахагъахъозэ, искусствэм нахь пыщагъэхэ мэхъух. Ащ дакIоу, музыкальнэ искусствэр нахь ашIогъэшIэгъон шIыгъэным фэшI кIэлэеджакIохэм, кIэлэегъаджэхэм, ны-тыхэм язэпхыныгъэхэр агъэпытэщтых. Хорым орэд къыщызыIохэрэм сэнэхьатэу къыхахыщтым, щыIэныгъэм еплъыкIэу фыряIэр нахь куоу гъэпсыгъэ зэрэхъурэр зэхэщакIохэм къыхагъэщыгъ.
ТекIоныгъэр къыдэзыхыгъэхэр
Купэу «А-м» апэрэ чIыпIэхэр къыщыдахыгъэх, лауреат хъугъэх искусствэхэмкIэ кIэлэцIыкIу еджапIэу N 6-м зыщызыгъасэхэрэр, пащэр Л. Кушина. Дондуковскэ псэупIэм искусствэхэмкIэ иеджапIэ икIэлэеджакIохэр, пащэр А. Берестовая.
Яблоновскэм икIэлэеджакIохэм ятIонэрэ чIыпIэр ахьыгъ, М. Березнаям егъасэх. Кощхьаблэ искусствэхэмкIэ икIэлэцIыкIу еджапIэу М. Хьагъэуджым ыцIэ зыхьырэм, пащэр С. Алыбэрд, ятIонэрэ чIыпIэр къыдихыгъ.
Республикэм искусствэхэмкIэ икIэлэцIыкIу еджапIэу К. Лъэцэрыкъом ыцIэ зыхьырэмрэ Инэм икIэлэеджакIохэмрэ ящэнэрэ хъугъэх.
Купэу «Б-м» хэтхэу хагъэунэфыкIырэ чIыпIэхэр къыдэзыхыгъэхэр къахэтэгъэщых.
ИскусствэхэмкIэ кIэлэцIыкIу еджапIэу
N 6-р лауреат хъугъэ, апэрэ чIыпIэр фагъэшъошагъ, Л. Кушинам егъасэх. АР-м искусствэхэмкIэ икIэлэцIыкIу еджапIэу N 1-м ихор лауреат щытхъуцIэр къыдихыгъ, апэрэ чIыпIэр къыфагъэшъошагъ, пащэр Е. Попова.
ОрэдыIо купэу «А-м» хэтхэу М. Хьагъэуджым ыцIэ зыхьырэ еджапIэм зыщызыгъасэхэрэм апэрэ чIыпIэр къыдахыгъ, лауреат щытхъуцIэр афаусыгъ, С. Къушъхьэр япащ. ЯтIонэрэ, ящэнэрэ чIыпIэхэр къыдахыгъэх Тульскэм ыкIи Адыгэкъалэ яеджакIохэм. Пащэхэр Г. Мордвинова, М. Жанэ.
АфэгушIуагъэх
Лауреат щытхъуцIэхэр къыдэзыхыгъэхэр зыгъасэхэрэ кIэлэегъаджэхэм афэгушIуагъэх, щытхъу тхылъхэр аратыжьыгъэх. ЗыцIэ къыраIуагъэхэм ащыщых А. Берестоваяр,
Л. Кушинар, С. Алыбэрдыр, Е. Фирсовар, М. Маринец, Е. Поповар, М. Жанэр, С. Къушъхьэр, нэмыкIхэри.
Концертмейстер анахь дэгъухэри къыхагъэщыгъэх. Н. Цуамыкъом, Н. Бочарниковам, А. ЖэнэлIым, Р. ЕмыкIым, Э. Дыхъум, М. Забарэ, В. Сурнаковым, фэшъхьафхэм «тхьашъуегъэпсэу» араIожьыгъ.
Щытхъу тхылъхэр, нэпэеплъ шIухьафтынхэр хорхэм, кIэлэегъаджэхэм аратыжьыгъэх.
