ЖъоныгъуакIэм и 13 — 14-м Адыгэ Республикэм и Къэралыгъо филармоние щыкIощт концертитIумэ бэрэ тяжагъ.Адыгэ Республикэм, Къэбэртэе-Бэлъкъарым, Къэрэщэе-Щэрджэсым язаслуженнэ артистэу Апэнэс Астемир ипчыхьэзэхахьэхэр филармонием щыкIощтых.
Сэнаущыгъэ зыхэлъ артистым ГИТИС-р къыухыгъ. Ар езыгъэджагъэхэм ащыщэу, Адыгэ Республикэм искусствэхэмкIэ изаслуженнэ IофышIэшхоу Хьакъуй Аслъан зэгъэпшэнхэр ышIыхэзэ, хъугъэ-шIагъэхэм тащигъэгъозагъ.
— Астемир игуетыныгъэкIэ, упчIэу къытитыхэрэмкIэ студентхэм къахэщыщтыгъ. Искусствэм цIэрыIо зэрэщыхъущтыр пшIэнэу щытыгъ, — къеIуатэ Хьакъуй Аслъан. — Лъэпкъ гупшысэр еджэным зэрэщигъэфедэрэр тшIогъэшIэгъоныгъ.
ИнджылызыбзэкIэ, испаныбзэкIэ, чэчэныбзэкIэ, бэлъкъарыбзэкIэ, адыгабзэкIэ, нэмыкI бзэхэмкIэ А. Апэнэсым орэдхэр къеIох. США-м, Австрием, Францием, Бельгием, Китаим, Урысыем, фэшъхьаф хэгъэгухэм иконцертхэр ащыкIуагъэх. Дунэе зэнэкъокъухэм ялауреат, «Кавказ имэкъэдышъ» зыфиIорэ шIухьафтыныр 2020-рэ илъэсым къыфагъэшъошагъ.
Дунаим щыцIэрыIо ансамблэу «Мыекуъапэ инэфылъэхэм» хэтэу орэд къыIоу бэрэ къыхэкIыгъ. Ыныбжь илъэси 6 зыхъугъэм къыщегъэжьагъэу концертхэм, телекъэтынхэм ахэлажьэ.
Аужырэ уахътэм Апэнэс Астемир ирепертуар къэзыгъэбаигъэмэ ащыщ «Я 9-рэ волна» зыфиIорэ телеканалым къыщиIорэ орэдыр. Жэнэ Къырымызэрэ Сэмэгу Гощнагъорэ зэдаусыгъэ орэдэу «Адыгэмэ яхабзэ джащ фэд» зыфиIорэ орэдым къэIокIэ гъэшIэгъон къыфигъотыгъ.
Орэдыр Апэнэс Астемир къырегъажьэ, нэмыкI артистхэм лъагъэкIуатэ. Сэкъурэ Ольгэ, Быщтэкъо Азэмат, Дзыбэ Мыхьамэт, Нэфышъэ Чэрим, фэшъхьафхэм лъэпкъ орэдыр агъэжъынчы. Псыблэнэ Муратрэ ЛIыбзыу Аслъанрэ япщынэхэр агъэбзэрабзэх. Орэдым уедэIузэ, адыгэр адыгэу дунаим зэрэщыпсэурэр, ихабзэхэр зэрэдахэхэр зэхэошIэх. Орэдыр гум къегущыIыкIы, гушхоныгъэ къыпхелъхьэ.
Опсэу, Астемир! Лъэпкъ искусствэр лъагэу оIэты, псэ зыпыт гущыIэхэмкIэ нэмыкI лъэпкъхэм уалъэIэсы. Уиорэдхэм цIыфыр апIу, щыIэныгъэм фагъасэ. Искусствэм ыбзэкIэ уадэгущыIэзэ, ячIыгу, яхэгъэгу шIулъэгъоу афыряIэр огъэпытэ.
КIэлэцIыкIухэр, зыныбжь икъугъэхэр, искусствэр гукIэ къызыгурыIохэрэр Адыгеим къыщыо-
дэIущтых, уагъэлъэпIэщт. ШIукIэ Тхьэм тызэIуегъакI.
