Щагъдый идэхагъэ зеIэты

Шы спортымкIэ мэфэкI зэхахьэу «Адыгэ шыу джэгу» зыфиIорэр апэрэу Тэхъутэмыкъуае жъоныгъуакIэм и 7-м щыкIуагъ.Республикэ общественнэ движениеу «Адыгэ Хасэр», Адыгеим иобществэу «Шыу Хасэр» кIэщакIо зыфэхъугъэ-
хэ Iофтхьабзэр шыгъэчъапIэу «Щагъдыим» щырагъэкIокIыгъ. Тэхъутэмыкъое къоджэ псэупIэм иадминистрацие, нэмыкIхэри зэхэщэн IофхэмкIэ IэпыIэгъу къафэхъугъэх.
ЕгъэжьапIэр
ЗэхэщакIохэм пшъэрылъ инхэр зыфашIыжьыгъэх. Темыр Кавказым, Къыблэ шъолъы-
рым, Адыгэ Республикэм шы спортым зыщаушъомбгъуным, лъэпкъ шэн-хабзэхэр къэухъу­мэгъэнхэм, лъэпкъ шIэжьым зыкъырагъэIэтызэ, ныбжьыкIэ­хэм япатриотическэ пIуныгъэ лъэхъаным диштэу зэхэщэгъэным, лъэпкъхэм ыкIи лIэужхэм язэфыщытыкIэхэр гъэпытэгъэнхэм зэхэщакIохэр пылъыщтых.
ШыгъэчъапIэу «Щагъдыир» итеплъэкIэ зэтегъэпсыхьагъ. Спортыр зикIасэхэм апае тIысыпIэхэр фашIыгъэх. Концерт къыщатыщтми, зэIукIэгъухэр щызэхащэщтми амалышIухэр яIэх.
КъафэгушIуагъэх
МэфэкI зэхахьэм къыщыгущыIагъэх Тэхъутэмыкъое районым иадминистрацие ипащэу Шъэо Аскэр, республикэм иоб­щественнэ движениеу «Адыгэ Хасэм» итхьаматэу ЛIымыщэ-
къо Рэмэзан, Тэхъутэмыкъое районым инароднэ депутатхэм я Совет итхьаматэу Хьатитэ Алый, Адыгэ Республикэм иобществэу «Шыу Хасэм» ипащэу Тхьапшъэкъо Альберт, Тэхъутэмыкъое районым и Адыгэ Хасэ и Совет итхьаматэу Ацумыжъ Юсыф, къуаджэу Тэхъутэмы­къуае инахьыжъхэм я Совет ипащэу Гунай Аслъан, Къэ­рэщэе-Щэрджэсым къикIыгъэ Унэжъ Мусэ.
Адыгэ шы лъэпкъым итарихъ къытегущыIэхэзэ, Щагъдыим къыкIугъэ гъогур къыхагъэщыгъ.
Шыоу къэкIуагъ
Къэрэщэе-Щэрджэсым щы­псэурэ Унэжъ Мусэ шым тесэу ядэжь къыщыригъажьи, Тэхъу­тэмыкъуае къызэрэкIуагъэр зэхахьэм гъэшIэгъонэу къыща­Iотагъ.
— Шы спортыр лъэшэу сыгу рехьы, — къытиIуагъ Унэжъ Мусэ. — Юрист сэнэхьат сиI, бизнесым сыхэщагъэу сэпсэу. Сыд фэдэ Iоф сэгъэцакIэми,
шы спортыр зэрэзгъэлъапIэрэр цIыфхэм ашIэ, сэри ащ сегъэгушIо. Адыгеим дэгъоу къыщытпэгъокIыгъэх, зэхэщакIохэм, мэфэкIым хэлажьэхэрэм гъунэ имыIэу тафэраз. КIакIор Тэхъу­тэмыкъуае шIухьафтын къызэрэщысфашIыгъэм сигъэгушхуагъ.
Зэнэкъокъухэр
Шым идэхагъэ къэгъэлъэгъо­гъэным фэгъэхьыгъэ зэнэкъо­къур тшIогъэшIэгъоныгъ. Шыум шыр фэIэпэIасэу егъэIорышIэ. Шым ылъабжъэхэр лъагэу къе­Iэтых, къэшъощтым фэдэу пчэгум дахэу ар къеуцо.
IофшIэным иветеранхэр зэ­Iу­кIэгъухэр зэрэлъыкIуатэхэрэм лъыплъэхэзэ хъулъфыгъэхэм ащыщ къыIуагъ шымрэ цIыфым­рэ зэрэзэгурыIохэрэр, шыр, анахьэу адыгэ шыр, ныбджэ­гъушIоу зэрэщытыр.
Блащэпсынэ щапIугъэ КIэмэщ Азэмат шым итеплъэ (Абрек) икъэгъэлъэгъон фэгъэхьыгъэ зэ­нэкъокъум апэрэ чIыпIэр къы­щихьыгъ. Адыгэкъалэрэ Нэтыхъуаерэ къарыкIыгъэхэ шыухэу Пэнэшъу Азэмат, Ц­ушъхьэ Аслъан хагъэунэфыкIырэ чIыпIэхэр афагъэшъошагъэх.
Метрэ 1400-рэ хъурэ гъогур шыухэм къызакIум, КIэрмыт Рус­лъан ишэу Щэрджэсым апэ-
рэ чIыпIэр ыхьыгъ. Быщтэкъо Анзор ыкIи Щыгъущэ Айдэмыр ятIонэрэ, ящэнэрэ чIыпIэхэр къыдахыгъэх.
«Шыу джэгу» зыфиIорэ зэ­нэ­къокъум Тхъожъыем апэрэ чIыпIэр къыщихьыгъ, шыур Тхьаркъохъо Тимур. Щагъдыир, Захватыр ятIонэрэ ыкIи ящэнэ-
рэ хъугъэх. Шыухэр Огъурлэ Аслъан, Хьэблаукъо Алкъэс.
Шым уанэр теплъхьаным, зэIукIэгъум фэбгъэхьазырыным, нэмыкIхэм шыухэм яIэпэIэсэныгъэ къащагъэлъэгъуагъ. Шыр пэрыохъум елъэным, пчыр шыум пкъыгъом хисэным, нэмыкIхэм афэгъэхьыгъэ зэIукIэгъухэри мэфэкIым щытлъэгъугъэх.
Шыбзыхъо Амир, Огъурлэ Аслъан, Кемэ Заур, Быщтэ-
къо Анзор, Нэгъой Рустам, Хьэблаукъо Алкъэс, Нащ Расул, Нащ Азэмат, КIэрмыт Руслъан, Барон Ислъам, фэшъхьафхэм хагъэунэфыкIырэ чIыпIэхэр къыдахыгъэх.
Къашъом, орэдым заIэты
Пчэгум къыщышъогъэ ансамблэхэм, орэд къэзыIуагъэхэм, адыгэ орэдышъохэр зыгъэжъын­чыгъэхэм мэфэкI зэхахьэр къа­гъэдэхагъ. Урысые Феде­рацием лъэпкъ творчествэм-
кIэ изаслуженнэ коллективэу, адыгэ лъэпкъ музыкальнэ Iэ-
мэ-­псымэхэмкIэ орэдышъохэр къезыгъэIорэ купэу «Уджым» тигъэгушIуагъ, пащэр Адыгэ Республикэм изаслуженнэ артистэу Къэлэкъутэкъо Инвер. Орэдэу «Адыгэ хэкур», нэмыкI­хэри Адыгеим изаслуженнэ артистэу Ацумыжъ Адам къыхи­дзагъэх. Темырыкъо Бэлэ, Чэ­тыжъ Зарэ, Iэгу Рузанэ, Лъэ­п­шъыкъо Маринэ, Жьэлкъэщый Айнарэ орэдыбэ къаIуагъ. Ансамблэхэу «Къашъор», «Ма­шIор», «Адыгеим иныбжьыкIэ­хэр», «Нэфылъыр» мэфэкI зэха­хьэм щыуджыгъэх. Адыгэ шъуашэр зэкIэми ащыгъэу ­лъэпкъ къашъохэр узыIэпищэу къагъэлъэгъуагъэх.
ЗэхэщакIохэр
ЛIымыщэкъо Рэмэзан, Хьэ­блаукъо Адам, Хъот Юныс, Тхьапшъэкъо Альберт, Ацумыжъ Юсыф, нэмыкIхэу зэхэщэкIо купым хэтхэм язэфэхьысыжьхэм къащыхагъэщыгъ шы спортым пыщагъэхэм япчъагъэ зэ­рэхахъорэр. Адыгэ шэн-хабзэ­хэм ныбжьыкIэхэр нахьышIоу афэгъэсэгъэнхэм фэшI спор-
тым пIуныгъэ мэхьанэу иIэм зырагъэушъомбгъущт. Рязань къикIыгъэ Анна Николаевар зэхэщэн Iофхэм афэгъэсагъ. IэпыIэгъу къафэхъугъ. МэфэкI зэхахьэм ар къыщытхъугъ.
Тэхъутэмыкъое районым иадминистрацие ипащэу Шъэо Аскэр нахь къыхигъэщыгъэмэ ащыщ урысхэр, къэзэкъхэр, адыгэхэр, нэмыкI лъэпкъхэр зыхэлэжьэгъэхэ зэхахьэр хэ­гъэгум ишъолъырхэм шIукIэ зэралъыIэсыгъэр. Спортым, культурэм яIофышIэхэм гъусэныгъэ зэрэзэдашIырэм ишIуагъэкIэ лъэпкъ шIэжьым, пIуныгъэм хэхъоныгъэхэр афэхъух.
— Тэхъутэмыкъуае ыуж Къэ­рэщэе-Щэрджэсым «Шыу джэгу» зэхахьэр щыкIуагъ. ЗэIукIэгъум сигуапэу сыхэлэжьагъ, — къытиIуагъ Хьэблаукъо Адам.
МэфэкI зэхахьэр илъэс къэс зэхащэ зэрашIоигъори тигуапэ, егъэжьэпIэшIур лъагъэкIотэнэу тафэлъаIо.

ЕмтIылъ Нурбый.